ຮັບປະກັນດ້ານເສດຖະກິດມີການຂະຫຍາຍຕົວໃນລະດັບ6.2% ຂອງ GDPບັນລຸໄດ້3,376ຕື້ກີບໃນນັ້ນຂະແໜງກະສິກຳເພີ່ມຂຶ້ນ4.34% ກວມເອົາ62.99%ຂະແໜງອຸດສະຫະກຳເພີ່ມຂຶ້ນ7.90% ກວມເອົາ23.20%.ຂະແໜງບໍລິການເພີ່ມຂຶ້ນ6.46% ກວມເອົາ 13.81% ຂອງ (GDP).ໃນຂະນະດຽວກັນຄາດຄະເນລາຍຮັບ ຈະສູ້ຊົນເກັບລາຍຮັບໃຫ້ໄດ້616ຕື້ກີບໃນນັ້ນ: ພູດຂອງສູນກາງ95ຕື້ກີບແລະພູດຂອງທ້ອງຖິ່ນ521ຕື້ກີບແລະປະຕິບັດລາຍຈ່າຍ472ຕື້ກີບ
ໃນໂອກາດເຂົ້າຮ່ວມກອງປະຊຸມ ລັດຖະບານເປີດກ້ວາງ ຄັ້ງທີ II ປີ 2024 ໃນລະຫວ່າງວັນທີ 6-7 ມັງກອນ ຜ່ານມາ, ທ່ານ ເຫຼັກໄຫຼ ສີວິໄລ ເຈົ້າແຂວງເຊກອງໄດ້ໃຫ້ສຳພາດຕໍ່ສື່ມວນຊົນວ່າ: ປີ 2025 ຈະກ້າວໃຫ້ເປັນແຂວງກຸ້ມຕົນເອງທາງດ້ານການເງິນເພື່ອສ້າງປະຫວັດສາດໜ້າໃໝ່ຈາກທີ່ເປັນແຂວງທຸກຍາກ,ພູດອຍໃຫ້ກຸ້ມຕົນເອງ ບໍ່ໃຫ້ເປັນພາລະຂອງລັດຖະບານ ແລະ ຈະກ້າວຂຶ້ນດຸ່ນດ່ຽງຊ່ວຍລັດຖະບານໃນປີຕໍ່ໆໄປ,ພ້ອມດຽວກັນນັ້ນຈະສືບຕໍ່ດຶງດູດການລົງທຶນຂອງຕ່າງປະເທດໃຫ້ນັບມື້ນັບຫຼາຍຂຶ້ນ ແລະ ຄຸ້ມຄອງບັນດາການລົງທຶນຂະໜາດໃຫຍ່,ໂຄງການຂຸດຄົ້ນບໍ່ຖ່ານຫີນ,ໂຄງການພະລັງງານລົມ,ໂຄງການຂຸດຄົ້ນແຮ່ບົກຊິດ ແລະ ໂຄງການພັດທະນາບໍ່ແຮ່ອື່ນໆໃຫ້ໄປຕາມແຜນການທີ່ລັດຖະບານໄດ້ວາງໄວ້ເພື່ອຮັບປະກັນຄວາມຍືນຍົງການປົກປັກຮັກສາສິ່ງແວດລ້ອມ.
ທ່ານກ່າວຕື່ມວ່າ:ໃນແຜນປີ2025ນີ້່ຈະເນັ້ນໃສ່ການສ້າງເສດຖະກິດເອກກະລາດເປັນເຈົ້າຕົນເອງ ແລະ ວຽກທີ່ເປັນວຽກບຸລິມະສິດໂດຍສະເພາະວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກເນື່ອງຈາກວ່າໄດ້ມີແຜນຄາດຄະເນ,ຄາດໝາຍວ່າຈະກຸ້ມຕົນເອງທາງດ້ານການເງິນ,ແຕ່ຄວາມທຸກຍາກເຫັນວ່າຍັງກວມອັດຕາສ່ວນສູງຢູ່ເມື່ອສົມທຽບໃສ່ມາດຕະຖານໃໝ່ໂດຍສະເພາະມາດຕະຖານ348ຊຶ່ງຈະສືບຕໍ່ໃນເຂດເມືອງກະລຶມ,ດາກຈຶງ ແລະ ເມືອງລະມາມຈຳນວນໜຶ່ງທີ່ຍັງບໍ່ທັນໄດ້ຕາມມາດຖານທີ່ໄດ້ກຳນົດໄວ້ ແລະ ບັນຫາສຳຄັນອີກອັນໜຶ່ງໃນການແກ້ໄຂຄວາມທຸກຍາກແມ່ນໄດ້ນຳໃຊ້ກຳລັງແຮງທີ່ມີໂດຍສະເພາະນຳໃຊ້ການລົງທຶນຂະໜາດໃຫຍ່ປະກອບສ່ວນເອົາບັນດາການລົງທຶນທີ່ມີກອງທຶນຕ່າງໆມາພັດທະນາໝາຍວ່າໃຫ້ປະຊາຊົນເຂົ້າຮ່ວມ ແລະ ມີສ່ວນຮ່ວມໃນບັນດາໂຄງການດັ່ງກ່າວໃຫ້ຫຼາຍຂຶ້ນ ເພື່ອໃຫ້ມີຊີວິດການເປັນຢູ່ຂອງເຂົາເຈົ້ານັບມື້ດີຂຶ້ນແລະ ສືບຕໍ່ມູນເຊື້ອດຸໝັ່ນ,ວິລະຊົນເອົາມາເປັນມູນເຊື້ອໃນການພັດທະນາ,ເຖິງແມ່ນວ່າພາຍໃນແຂວງຈະມີຫຼາຍເຜົ່າຢູ່ຮ່ວມກັນ ແຕ່ກໍມີຄວາມປອງດອງສາມັກຄີ ຊ່ວຍເຫຼືອຊຶ່ງກັນ ແລະ ກັນ ໂດຍສະເພາະໃນໄລຍະມີພັກນຳພາ ແລະ ມີແນວທາງທີ່ຖືກຕ້ອງເຫັນວ່າປະຊາຊົນມີຄວາມເຂົ້າໃຈ ປະຕິບັດຕາມແນວທາງນະໂຍບາຍຂອງພັກ, ຄວາມສາມັກຄີບັນດາເຜົ່າແມ່ນໄດ້ຖືເອົາອົງການຈັດຕັ້ງຂອງພັກໂດຍສະເພາະສະມາຊິກພັກຕ້ອງໄດ້ສືບຕໍ່ນຳພາການເມືອງແນວຄິດໃຫ້ປະຊາຊົນເຂົ້າໃຈສະພາບລວມໃນປັດຈຸບັນ,ໃນນັ້ນພ້ອມກັນປະຕິບັດມະຕິ 04 ໃນການສ້າງເສດຖະກິດເອກກະລາດເປັນເຈົ້າຕົນເອງ, ຕ້ອງເລີ່ມຈາກຄອບຄົວ,ປະຊາຊົນຕ້ອງຮູ້ຈັກປະຢັດ,ສະສົມ,ກຸ້ມຕົນເອງເພິ່ງພາຕົນເອງ,ບໍ່ເອື່ອຍອີງ,ບໍ່ລໍຄອຍການຊ່ວຍເຫຼືອ,ຕ້ອງຫັນປ່ຽນແນວຄິດ,ພວກເຮົາມີຊັບພະຍາກອນ,ດິນ,ນໍ້າ,ມີແນວທາງທີ່ຖືກຕ້ອງ,ມີກົດໝາຍ,ມີກົນໄກນຳພາທີ່ເປັນລະບົບຄົບຖ້ວນໂດຍໄດ້ໃຫ້ພະນັກງານສະມາຊິກພັກການນຳເປັນແບບຢ່າງໃນການຈັດຕັ້ງການປະຕິບັດ.
ທ່ານກ່າວໃຫ້ຮູ້ຕື່ມວ່າ:ໃນປີ 2024ຜ່ານມາເສດຖະກິດມີການຂະຫຍາຍຕົວໃນລະດັບ6% ຂອງ GDPມີມູນຄ່າ2,984ຕື້ກີບ. ໃນນັ້ນ:ຂະແໜງກະສິກຳເພີ່ມຂຶ້ນ4.32% ກວມເອົາ62.81%.ຂະແໜງອຸດສາຫະກຳເພີ່ມຂຶ້ນ7.10% ກວມເອົາ22.51%.ຂະແໜງບໍລິການເພີ່ມຂຶ້ນ6.84% ກວມເອົາ14.68% ຂອງGDP.ສາມາດເກັບລາຍຮັບໄດ້632.62 ຕື້ກີບລື່ນແຜນ211.61%, ໃນນັ້ນ: ພູດຂອງສູນກາງ127.21ຕື້ກີບແລະພູດຂອງທ້ອງຖິ່ນ505.07ຕື້ກີບ; ການລົງທຶນພາກເອກະຊົນພາຍໃນແລະຕ່າງປະເທດແມ່ນມີບັນຍາກາດຟົດຟື້ນເປັນຕົ້ນ: ໂຄງການເຂື່ອນໄຟຟ້າເຊກະໝານ3, ໂຄງການຂຸດຄົ້ນ-ປຸງແຕ່ງຖ່ານຫີນ, ໂຄງການພະລັງງານລົມ 600 ເມກະວັດມີຄວາມຄືບໜ້າ 90% ຄາດວ່າຈະປະຕິບັດສຳເລັດໃນປີ 2025 ແລະຈະທົດລອງຜະລິດກະແສໄຟຟ້າ 300 ເມກະວັດ, ຈະສົ່ງກະແສໄຟຟ້າອອກຂາຍໄປປະເທດຫວຽດນາມໃນເດືອນ 3-4 ປີ 2025 ນີ້ແລະໃນທ້າຍປີແມ່ນຈະໄດ້ຜະລິດເຕັມອັດຕາ 600 ເມກະວັດ; ສຳລັບໂຄງການລົງທຶນດ້ານກະສິກຳກໍເປັນຂະບວນການຟົດຟື້ນຊຶ່ງສາມາດສ້າງວຽກເຮັດງານທຳໃຫ້ແກ່ຄົນທ້ອງຖິ່ນຢ່າງຫຼວງຫຼາຍ, ສາມາດຫຼຸດຜ່ອນແລະສະກັດກັ້ນການໄປອອກແຮງງານຢູ່ຕ່າງປະເທດ.
(ຂ່າວ-ພາບ:ສຳນານ)
ຄໍາເຫັນ