ໃນແຕ່ລະປີ ພວກເຮົາ ກໍໄດ້ພ້ອມກັນຈັດກິດຈະກຳຕ່າງໆ ເພື່ອປູກຈິດສໍານຶກໃຫ້ແກ່ ເຍົາວະຊົນ ແລະ ອະນຸຊົນຮຸ່ນຫຼັງ ກໍຄືທົ່ວສັງຄົມ ໃຫ້ເຫັນຄວາມສໍາຄັນຂອງການອະນຸລັກປາ ແລະ ສັດນໍ້າ ແນໃສ່ເພີ່ມຄວາມອຸດົມສົມບູນໃຫ້ກັບທຳມະຊາດ, ປົກປັກຮັກສາລະບົບນິເວດແຫຼ່ງນໍ້າ ໃຫ້ມີຄວາມສົມດຸນ ແລະ ຍືນຍົງ. ພ້ອມທັງ ເພື່ອຈາລຶກ ບຸນຄຸນ ຄຸນງາມຄວາມດີ ແລະ ຜົນງານອັນໃຫຍ່ຫຼວງ ຂອງ ປະທານ ສຸພານຸວົງ ທີ່ອຸທິດຕົນໃຫ້ແກ່ພາລະກິດແຫ່ງການຕໍ່ສູ້ກູ້ຊາດ ກໍຄືການປົກປັກຮັກສາ ແລະ ສ້າງສາພັດທະ ນາ ປະເທດຊາດຂອງພວກເຮົາ ຊຶ່ງໃນແຕ່ລະປີ ກໍມີມວນຊົນເຂົ້າຮ່ວມກິດຈະກຳ ຕ່າງໆເພີ່ມຂຶ້ນ.
ເພື່ອຜັນຂະຫຍາຍ ເນື້ອໃນມະຕິກອງປະຊຸມໃຫຍ່ ຄັ້ງທີ 12 ຂອງພັກປະຊາຊົນ ປະຕິວັດລາວ, ມະຕິກອງປະຊຸມໃຫຍ່ ອົງຄະນະພັກກະຊວງກະສິກຳ ແລະ ສິ່ງແວດລ້ອມ ຄັ້ງທີ 7 ແລະ ແຜນພັດທະ ນາເສດຖະກິດ-ສັງຄົມ ຂອງລັດຖະບານ 5 ປີ ຄັ້ງທີ 10 (ປີ 2026-2030), ກະຊວງກະສິກຳ ແລະ ສິ່ງແວດລ້ອມ ໄດ້ຜັນຂະຫຍາຍ ເປັນຄໍາສັ່ງ, ແຈ້ງການ ໃຫ້ບັນດາກົມກ່ຽວຂ້ອງ ທັງສູນກາງ, ອົງການປົກຄອງຂັ້ນທ້ອງຖິ່ນ ຕະຫຼອດຮອດຜູ້ປະກອບການ ແລະ ພໍ່ແມ່ປະຊາຊົນ ໃນຂອບເຂດທົ່ວປະເທດ ເອົາໃຈໃສ່ ຕໍ່ວຽກງານການພັດທະນາ ການອະນຸລັກ, ການຄຸ້ມຄອງ ແລະ ນໍາໃຊ້ ປາ ແລະ ສັດນໍ້າ ໃຫ້ມີຄວາມຍືນຍົງ ເພື່ອປະກອບສ່ວນເຂົ້າໃນການຄໍ້າປະກັນດ້ານສະບຽງອາຫານ, ໂພຊະນາການ, ປະກອບ ສ່ວນສໍາຄັນໃນການພັດທະນາຊົນນະບົດ ແລະ ແກ້ໄຂຄວາມທຸກຍາກ ດ້ວຍການສ້າງລາຍຮັບໃຫ້ປະຊາ ຊົນລາວໃຫ້ນັບມື້ຫຼາຍຂຶ້ນ, ພ້ອມທັງເປັນການປົກປັກຮັກສາຄວາມອຸດົມສົມບູນ ຂອງຊີວະນາໆພັນ ທີ່ເປັນຊັບພະຍາກອນທຳມະຊາດ ອັນລໍ້າຄ່າ ໃຫ້ມີຄວາມຍືນຍົງ; ໃນປີ 2025 ທີ່ຜ່ານມາ, ຂະແໜງການກະສິກຳ ແລະ ສິ່ງແວດລ້ອມ ໄດ້ຈັດກິດຈະກຳໃນວັນປ່ອຍປາແຫ່ງຊາດ ສັງລວມໄດ້ ມີຈຳນວນປະມານ 71 ລ້ານກວ່າໂຕ; ສໍາລັບປີ 2026 ນີ້ ທາງຂະແໜງການກ່ຽວຂ້ອງໄດ້ສືບຕໍ່ສົມທົບກັບຄະນະພັກ, ອົງການປົກຄອງທ້ອງຖິ່ນ ກໍານົດແຜນປ່ອຍປາ ແລະ ສັດນໍ້າ ໃຫ້ໄດ້ທັງໝົດ 72 ລ້ານໂຕ.
ເນື່ອງໃນໂອກາດ ວັນປ່ອຍປາ ແລະ ສັດນໍ້າ ແຫ່ງຊາດ ວັນທີ 13 ກໍລະກົດ 2026 ນີ້, ທ່ານ ລິນຄໍາ ດວງສະຫວັນ ຕາງໜ້າໃຫ້ຂະແໜງການກະສິກຳ ແລະ ສິ່ງແວດລ້ອມ, ຮຽກຮ້ອງມາຍັງ ທຸກພາກ ສ່ວນທົ່ວສັງຄົມ, ພະນັກງານ, ທະຫານ, ຕຳຫຼວດ, ພໍ່ຄ້າຊາວ ຂາຍ, ຕະຫຼອດຮອດ ພໍ່ແມ່ປະຊາຊົນ ໂດຍສະເພາະ ຊາວໜຸ່ມ-ເຍົາວະຊົນ ຈົ່ງເອົາໃຈໃສ່ ຄື:
1. ຍົກສູງຄວາມຮັບຜິດຊອບ ແລະ ເພີ່ມທະວີຄວາມເປັນເຈົ້າ ໃນການຄຸ້ມຄອງ, ນໍ້າໃຊ້ ປາ ແລະ ສັດນໍ້າ ແບບຍືນຍົງ, ບໍ່ຈັບສັດນໍ້າ ໃນລະດູວາງໄຂ່ ຫຼື ລະດູຂະຫຍາຍພັນ (ໂດຍສະເພາະໄລຍະ ເຂົ້າພັນສານີ້); 2. ຢຸດຕິ ການລ່າ, ຫາປາ ແລະ ສັດນໍ້າ ແບບດັບສູນ ເປັນຕົ້ນ: ຫ້າມໃຊ້ກະແສໄຟຟ້າ ຊ໋ອດ, ການໃຊ້ລະເບີດ ຫຼື ສານເຄມີ ເບື່ອປາ ແລະ ສັດນໍ້າ ຊຶ່ງພຶດຕິກຳດັ່ງກ່າວຍັງເປັນການທໍາລາຍລະບົບນິເວດຢ່າງຮ້າຍແຮງອີກດ້ວຍ, 3. ຊ່ວຍກັນປົກປັກຮັກສາແຫຼ່ງນໍ້າ, ວັງສະຫງວນ ແລະ ປ່າໄມ້ຕົ້ນນໍ້າບໍ່ໃຫ້ມີການຖິ້ມຂີ້ເຫຍື້ອ ຫຼື ສານພິດລົງສູ່ທຳມະຊາດ. ດັ່ງຄໍາຂວັນຂອງປີນີ້ ທີ່ວ່າ: “ຊົມເຊີຍ ວັນປ່ອຍປາ ແລະ ສັດນໍ້າ ແຫ່ງຊາດ ວັນທີ 13 ກໍລະກົດ” “ຈົ່ງພ້ອມກັນປ່ອຍປາ ແລະ ສັດນໍ້າ ຄືນສູ່ທຳມະຊາດ ໃຫ້ມີຄວາມອຸດົມສົມບູນຕະຫຼອດໄປ”
“ການປົກປັກຮັກສາ ປາ ແລະ ສັດນໍ້າ ແມ່ນພັນທະຂອງປວງຊົນທັງຊາດ” ການຈັດກິດຈະກຳ ໃນວັນປ່ອຍປາ ແລະ ສັດນໍ້າ ໃນປີນີ້ ມອບໃຫ້ພາກສ່ວນກ່ຽວຂ້ອງ ທັງພາກລັດ, ເອກະຊົນ ແລະ ພໍ່ແມ່ປະຊາຊົນ ທັງສູນກາງ ແລະ ທ້ອງຖິ່ນ ພ້ອມກັນຈັດພິທີແບບກະທັດຮັດ, ແຕ່ໃຫ້ຮັບປະກັນທາງດ້ານເນື້ອໃນ, ຄວາມປອດໄພ ແລະ ຄວາມເປັນລະບຽບຮຽບຮ້ອຍ ຮອບດ້ານ.
(ຂ່າວ: ແສງຈັນ)
ຄໍາເຫັນ