ທ່ານ ສຸດສັກສິດ ຍິດແສນຫວັງ ຮອງປະທານຄະນະກໍາມະການປົກຄອງເມືອງຜູ້ຊີ້ນໍາເສດຖະກິດຂັ້ນເມືອງ ໃຫ້ຮູ້ວ່າ: ປີ 2025 ເມືອງກະລຶມ ສາມາດລະດົມແຫຼ່ງທຶນເຂົ້າໃນການພັດທະນາພື້ນຖານໂຄງລ່າງເສດຖະກິດທັງໝົດ 52 ໂຄງການ, ມູນຄ່າ 153.45 ຕື້ກີບ. ໃນນີ້, ການລົງທຶນຂອງລັດ 31 ໂຄງການ ມູນຄ່າ 89.10 ຕື້ກີບ ຄື: ການລົງທຶນພາກປົກກະຕິ 18 ໂຄງການ ມູນຄ່າ 53.48 ຕື້ກີບ ແລະ ການລົງທຶນພາກຟື້ນຟູໄພພິບັດ 13 ໂຄງການ ມູນຄ່າ 35,61 ຕື້ກີບ; ການລົງທຶນເອກະຊົນພາຍໃນ ແລະ ຕ່າງປະເທດ 7 ໂຄງການ ມູນຄ່າ 46.80 ຕື້ກີບ ແລະ ການລົງທຶນພັດທະນາຊຸມຊົນ (ທຶນທີ່ໄດ້ຮັບຈາກບັນດາໂຄງການທີ່ລົງທຶນພັດທະນາພື້ນຖານໂຄງລ່າງພາຍໃນເມືອງ ແລະ ທຶນຊ່ວຍເຫຼືອຈາກອົງການຈັດຕັ້ງທາງສັງຄົມ) 14 ໂຄງການ ມູນຄ່າ 17.55 ຕື້ກີບ.
ທ່ານ ສຸດສັກສິດ ຍິດແສນຫວັງ ໃຫ້ຮູ້ຕື່ມອີກວ່າ: ໃນປີນີ້, ຕາມແຜນການຄາດຄະເນຂອງເມືອງຈະສູ້ຊົນເກັບລາຍຮັບໃຫ້ໄດ້ 16.7 ຕື້ກວ່າກີບ ແລະ ຄຸ້ມຄອງລາຍຈ່າຍໃຫ້ຢູ່ໃນລະດັບ 43.9 ຕື້ກີບ. ພ້ອມນີ້, ກໍເອົາໃຈໃສ່ຍາດແຍ່ງ ແລະ ດຶງດູດການລົງທຶນ ຈາກທຸກພາກສ່ວນໃນທົ່ວສັງຄົມ ເຊັ່ນ: ການລົງທຶນຂອງລັດ; ທຶນຊ່ວຍເຫຼືອລ້າ-ກູ້ຢືມ ແລະ ການລົງທຶນຂອງພາກເອກະຊົນພາຍໃນ ແລະ ຕ່າງປະເທດໃຫ້ໄດ້ 29 ຕື້ກີບ ເພື່ອນໍາໃຊ້ເຂົ້າໃນການພັດທະນາພື້ນຖານໂຄງລ່າງ, ຍູ້ແຮງການພັດທະນາເສດຖະກິດ ແລະ ແກ້ໄຂຄວາມທຸກຍາກຂອງປະຊາຊົນພາຍໃນເມືອງ.
(ຂ່າວ: ສັນຍາ)
ຄໍາເຫັນ