ປກສ ເຂດເສດຖະກິດພິເສດສາມຫຼ່ຽມຄຳ ອະນຸມັດສ້າງຕັ້ງພະແນກຄຸ້ມຄອງພົນລະເມືອງ ພ້ອມທັງປະກາດການຈັດຕັ້ງ

ໃນພິທີ, ທ່ານ ພັອ ວັນນະສັກ ທອງອຸໄລ ຮອງຫົວໜ້າກອງບັນຊາການ ປກສ ເຂດເສດຖະກິດພິເສດສາມຫຼ່ຽມຄຳ ໄດ້ຂຶ້ນຜ່ານຂໍ້ຕົກລົງ ວ່າດ້ວຍການສ້າງຕັ້ງພະແນກຄຸ້ມຄອງພົນລະເມືອງ ເລກທີ 2148/ປກສ, ລົງວັນທີ 16 ກໍລະກົດ 2026; ຂໍ້ຕົກລົງ ວ່າດ້ວຍການຍົກຍ້າຍນາຍຕຳຫຼວດທີ່ຂຶ້ນກັບກົມຄຸ້ມຄອງສຳມະໂນຄົວ ແລະ ກໍ່ສ້າງຮາກຖານ ເລກທີ 2624/ປກສ, ລົງວັນທີ 31 ສິງຫາ 2026 ແລະ ຂໍ້ຕົກລົງ ວ່າດ້ວຍການແຕ່ງຕັ້ງນາຍຕຳຫຼວດໄປຮັບໜ້າທີ່ໃໝ່ ເປັນຫົວໜ້າ ແລະ ຮອງພະແນກ, ຫົວໜ້າໜ່ວຍງານ ແລະ ຮອງໜ່ວຍງານຂອງພະແນກຄຸ້ມຄອງສຳມະໂນຄົວ. ການສ້າງຕັ້ງພະແນກຄຸ້ມຄອງພົນລະເມືອງ ມີຄວາມຈໍາເປັນພາວະວິໃສ, ຖືກຕາມລະບົບສາຍຕັ້ງຂອງລະບົບກົງຈັກການຈັດຕັ້ງ ຂອງກະຊວງປ້ອງກັນຄວາມສະຫງົບ ທັງເປັນການຕອບສະໜອງ ກັບຄວາມຮຽກຮ້ອງຕ້ອງການຂອງບັນດາວຽກງານວິຊາສະເພາະ ທີ່ມີຄວາມຈໍາເປັນໃນການຄຸ້ມຄອງການພັກເຊົາ, ການເໜັງຕິງຂອງພົນລະເມືອງລາວ ແລະ ຊາວຕ່າງປະເທດ ທີ່ດໍາລົງຊີວິດຢູ່ໃນດິນແດນ ສປປ ລາວ ເວົ້າລວມ, ເວົ້າສະເພາະຢູ່ໃນເຂດເສດຖະກິດພິເສດສາມຫຼ່ຽມຄໍາ ແລະ ເພື່ອຕອບສະໜອງບັນດາຂໍ້ມູນອັນເປັນພື້ນຖານໃຫ້ ວຽກງານວິຊາສະເພາະອື່ນໆ ເປັນຕົ້ນ ການຫັນໄປສູ່ການຄຸ້ມຄອງພົນລະເມືອງແບບທັນສະໄໝອີແລັກໂທຣນິກໃນສະເພາະໜ້າ ແລະ ຍາວນານ.

ໂອກາດນີ້, ທ່ານ ພັອ ອານຸສິນ ສັກປະເສີດ ໄດ້ເນັ້ນໃຫ້ພະແນກຄຸ້ມຄອງພົນລະເມືອງ ຈົ່ງເປັນເສນາທິການໃຫ້ກອງບັນຊາການ ປກສ ເຂດເສດຖະກິດພິເສດສາມຫຼ່ຽມຄໍາ ໃນການລົງເລິກກວດກາ, ຄຸ້ມຄອງ, ເກັບກໍາສະຖິຕິຂອງພົນລະເມືອງລາວ ແລະ ຊາວຕ່າງປະເທດ ທີ່ດໍາລົງຊີວິດຢູ່ໃນເຂດເສດຖະກິດພິເສດສາມຫຼ່ຽມຄໍາ ສ້າງເປັນຖານຂໍ້ມູນທີ່ສໍາຄັນ ແລະ ຈໍາເປັນ ເພື່ອສະໜອງຕອບໃຫ້ການຫັນໄປສູ່ການຄຸ້ມຄອງພົນລະເມືອງແບບທັນສະໄໝຕາມແຜນການຂອງກົມ 509 ກະຊວງ ປກສ. ພົນລະເມືອງລາວຈໍານວນຫຼາຍໃນທົ່ວປະເທດ ທີ່ຫຼັ່ງໄຫຼເຂົ້າມາເຮັດວຽກ, ດໍາລົງຊີວິດຢູ່ໃນເຂດເສດຖະກິດພິເສດສາມຫຼ່ຽມຄໍາ ຈະໄດ້ຮັບການຂຶ້ນທະບຽນ, ຄຸ້ມຄອງການຍົກຍ້າຍ-ພັກເຊົາ ຖືກຕ້ອງຕາມລະບຽບການຄຸ້ມຄອງພົນລະເມືອງ, ຄຸ້ມຄອງການເໜັງຕິງຂອງພົນລະເມືອງລາວໃນທົ່ວປະເທດ.

ແຫຼ່ງຂ່າວ: ປກສ