ປກສ ແຂວງຄຳມ່ວນ ກຽມກຳລັງເພື່ອປ້ອງກັນອຸປະຕິເຫດໃນຊ່ວງບຸນປີໃໝ່ລາວ

ທ່ານ ພັທ ບຸນອ້ອມ ພົມມະຈັນ ຫົວໜ້າພະແນກຕໍາຫຼວດຈະລະຈອນ ປກສ ແຂວງຄຳມ່ວນ ໄດ້ໃຫ້ສຳພາດ ຕໍ່ສື່ມວນຊົນແຂວງ ໃນວັນທີ 11 ເມສາຜ່ານມາວ່າ: ການກະກຽມຄວາມພ້ອມປ້ອງກັນການເກີດອຸປະຕິເຫດໃນການສະເຫຼີມສະຫຼອງສົ່ງທ້າຍປີເກົ່າ ພສ 2566 ແລະ ຕ້ອນຮັບປີໃໝ່ລາວ ພສ 2567 ທີ່ຈະມາເຖິງນີ້ ໃຫ້ມີຄວາມສະຫງົບ ແລະ ປອດໄພ ໃນການສັນຈອນຕາມເສັ້ນທາງໃນໄລຍະດັ່ງກ່າວ ໂດຍປະຕິບັດຕາມທິດຊີ້ນໍາຂອງກົມຕໍາຫຼວດຈະລະຈອນ ກົມໃຫຍ່ຕໍາຫຼວດປ້ອງກັນຄວາມສະຫງົບ ກໍຄືແຜນປ້ອງກັນການສະເຫຼີມສະຫຼອງປີໃໝ່ລາວ ຂອງກອງບັນຊາການ ປກສ ແຂວງຄຳມ່ວນ.ພະແນກຈາລະຈອນ ໄດ້ມີແຜນປ້ອງກັນຢ່າງລະອຽດໃນການວາງ ຈຸກຳລັງລົງປະຈຳການໃນແຕ່ລະມື້ ໃນໄລຍະສະເຫຼີມສະຫຼອງບຸນປີໃໝ່ລາວ. ໃນນີ້, ມີຢູ່ 3 ຈຸໃຫຍ່ຄື: ຈຸປະຈຳການຄອຍເຫດກຽມພ້ອມຄອຍເຫດ ແລະ ໄດ້ປະຈຳການຕະຫຼອດ 24 ຊົ່ວໂມງ ແລະ ອີກ 2 ຈຸແມ່ນໄດ້ລົງເຄື່ອນໄຫວຕັ້ງຈຸດກວດກາຢູ່ເສັ້ນທາງຫຼວງແຫ່ງຊາດທາງເລກທີ 13 ຢູ່ເຂດບ້ານໃໝ່ໂພສີ ເມືອງທ່າແຂກ ແລະ ຈຸດບ້ານຖໍ້າ ເມືອງທ່າແຂກ. 
ສຳລັບໃນເຂດເທສະບານເມືອງທ່າແຂກ ແມ່ນໄດ້ເອົາໃຈໃສ່ປະສານສົມທົບກັບເຈົ້າໜ້າທີ່ຕໍາຫຼວດຈະລາຈອນເມືອງໃຫ້ເຂົ້າປະຈຳການເຮັດໜ້າທີ່ປ້ອງກັນ ແລະ ລະບາຍການສັນຈອນໃຫ້ເຂັ້ມງວດ.ນອກນັ້ນຍັງໄດ້ປະສານສົມທົບບັນດາເມືອງຈັດຕັ້ງປະຕິບັດເຊັ່ນດຽວກັນ. ຄຽງຄູ່ກັບແຜນຈັດຕັ້ງປະຕິບັດຄືດັ່ງກ່າວນັ້ນຍັງໄດ້ ໂຄສະນາສຶກສາອົບຮົມໃຫ້ບັນດານັກຂັບຂີ່ ຜູ້ທີ່ໃຊ້ລົດ ໃຊ້ຖະໜົນໃຫ້ມີຄວາມເອົາໃຈໃສ່ປະຕິບັດຕາມລະບຽບກົດຈະລາຈອນຢ່າງເຂັ້ມງວດ, ພ້ອມນີ້ກໍມີການກວດກາຕໍ່ກັບການໃຊ້ລົດໃຫ້ມີຄວາມຖືກຕ້ອງ ແລະ ໄດ້ແນະນໍາສຶກສາອົບຮົມ, ການກວດກາຈັບຄວາມໄວ ແລະ ກວດທາດເຫຼົ້າຂອງບັນດານັກຂັບຂີ່. ຕໍ່ກັບມາດຕະການຜູ້ທີ່ລະເມີດແມ່ນຈະໄດ້ສຶກສາອົບຮົມແນະນຳໃຫ້ເອົາໃຈໃສ່ປະຕິບັດຕາມກົດລະບຽບຈາລະຈອນໃຫ້ເຂັ້ມງວດ, ຖ້າຜູ້ຂັບຂີ່ມີຄວາມມຶນເມົາ ແມ່ນຈະໄດ້ກັກພາຫະນະໄວ້ ແລ້ວປະສານຫາຍາດພີ່ນ້ອງມາພົວພັນຈຶ່ງຈະປ່ອຍເມືອ ແລະ ຖ້າມີການລະເມີດຢ່າງຮ້າຍແຮງ ຈະໄດ້ດຳເນີນຄະດີຕາມລະບຽບກົດໝາຍ.
ໃນໂອກາດດຽວກັນນີ້, ຫົວໜ້າພະແນກຕຳຫຼວດຈະລາຈອນ ຍັງໄດ້ຮຽກຮ້ອງມາຍັງບັນດານັກຂັບຂີ່ ຜູ້ໃຊ້ລົດໃຊ້ຖະໜົນ ຈົ່ງພ້ອມກັນປະຕິບັດກົດລະບຽບຈະລາຈອນໃຫ້ເຂັ້ມງວດ, ເພື່ອຫຼີກລ້ຽງຈາກການເກີດອຸປະຕິເຫດທາງຖະໜົນໃຫ້ລຸດໜ້ອຍຖອຍລົງກວ່າປີຜ່ານມາ ແລະ ຫຼີ້ນບຸນປີໃໝ່ຢ່າງມີຄວາມສຸກ, ປອດໄພ.
(ຂ່າວ: ມະນີວັນ)