ປກສ ແຂວງເຊກອງ ປະກາດເລື່ອນຊັ້ນໃຫ້ນາຍຕຳຫຼວດ

ພິທີປະກາດເລື່ອນຊັ້ນໃຫ້ນາຍ ແລະ ພົນຕຳຫຼວດຂອງກອງບັນຊາການປ້ອງກັນຄວາມສະຫງົບ (ປກສ) ແຂວງເຊກອງ ໄດ້ຈັດຂຶ້ນເມື່ອບໍ່ດົນຜ່ານມາ ທີ່ສະໂມສອນກອງບັນຊາການ ປກສ ແຂວງ ໂດຍການເຂົ້າຮ່ວມເປັນປະທານ ແລະ ປະດັບຊັ້ນຂອງສະຫາຍ ພັອ ຄຳບານ ພົມມະນີວົງ ກຳມະການພັກແຂວງ ເລຂາພັກ ຫົວໜ້າກອງບັນຊາການ ປກສ ແຂວງ, ມີຄະນະພັກ-ຄະນະບັນຊາ, ແຂກຖືກເຊີນ, ນາຍ ແລະ ພົນຕຳຫຼວດເຂົ້າຮ່ວມ.
ສະຫາຍ ພັທ ພອນວິຈິດ ກີບແກສອນ ຮອງຫົວໜ້າຫ້ອງການເມືອງ ກອງບັນຊາການ ປກສ ແຂວງ ໄດ້ຂຶ້ນຜ່ານຂໍ້ຕົກລົງຂອງລັດຖະມົນຕີກະຊວງປ້ອງກັນຄວາມສະຫງົບ ສະບັບເລກທີ 620/ປກສ, ລົງວັນທີ 22 ມີນາ 2024 ວ່າດ້ວຍການປະຕິບັດນະໂຍບາຍ ຊັ້ນພັນໂທ ຂຶ້ນເປັນຊັ້ນພັນເອກ ໃຫ້ນາຍຕໍາຫຼວດກອງບັນຊາການ ປກສ ແຂວງເຊກອງ ຈໍານວນ 6 ສະຫາຍ. ຈາກນັ້ນ, ກໍໄດ້ຜ່ານຂໍ້ຕົກລົງຂອງລັດຖະມົນຕີກະຊວງປ້ອງກັນຄວາມສະຫງົບ; ຂໍ້ຕົກລົງຂອງຫົວໜ້າກົມໃຫຍ່ການ ເມືອງປ້ອງກັນຄວາມສະຫງົບ ແລະ ຂໍ້ຕົກລົງຂອງຫົວໜ້າກອງບັນຊາການ ປກສ ແຂວງເຊກອງ ວ່າດ້ວຍການເລື່ອນຊັ້ນໃຫ້ນາຍ ແລະ ພົນຕຳຫຼວດ. ໃນນີ້, ເລື່ອນຊັ້ນພັນຕີ ຂຶ້ນພັນໂທ 10 ສະຫາຍ; ຮ້ອຍເອກ ຂຶ້ນພັນຕີ 11 ສະຫາຍ; ຮ້ອຍໂທ ຂຶ້ນຮ້ອຍເອກ 21 ສະຫາຍ; ຮ້ອຍຕີ ຂຶ້ນຮ້ອຍໂທ 17 ສະຫາຍ; ວາທີຮ້ອຍຕີ ຂຶ້ນຮ້ອຍຕີ 8 ສະຫາຍ; ສິບເອກ ຂຶ້ນວາທີຮ້ອຍຕີ 2 ສະຫາຍ ແລະ ສິບໂທ ຂຶ້ນສິບເອກ 6 ສະຫາຍ.
(ຂ່າວ: ສັນຍາ, ພາບ: ປກສ ແຂວງເຊກອງ)