 |
ສະຫາຍ ພັອ ອາຄົມ ວົງພະຈັນ ໄດ້ຍົກໃຫ້ເຫັນການກຳເນີດຂອງກຳລັງພະລາທິການ ປກສ ນັບແຕ່ທ້າຍປີ 1969-1970 ກຳລັງແນວລາວຮັກຊາດໄດ້ເປີດບັ້ນຕ່າວໂຈມຕີພວກສັດຕູຢູ່ຫຼາຍບັ້ນຮົບ ຍິ່ງຕີຍິ່ງໄດ້ຮັບໄຊຊະ ນະ. ໃນເວລານັ້ນ, ກໍາລັງ ປກສ ໄດ້ມີບົດບາດສໍາຄັນໃນການເຮັດໜ້າທີ່ປ້ອງກັນຜູ້ນຳພັກ-ລັດ, ເປັນກຳລັງຫຼັກ ແຫຼ່ງໃນການກໍ່ສ້າງຮາກຖານການເມືອງ, ປຸກລະດົມຂົນຂວາຍປະຊາຊົນ, ພາຍຫຼັງກໍາລັງ ປກສ ໄດ້ຮັບການສ້າງຕັ້ງຂຶ້ນ ຊຶ່ງປະກອບດ້ວຍຫຼາຍເຫຼົ່າຮົບ. ໃນນັ້ນ, ວຽກງານພະລາທິການກໍໄດ້ເກີດຂຶ້ນພ້ອມໆ ກັບບັນດາເຫຼົ່າຮົບດັ່ງກ່າວ, ແຕ່ກົງຈັກການຈັດຕັ້ງສະເພາະບໍ່ທັນມີ ມີແຕ່ພະນັກງານເຮັດໜ້າທີ່ຄຸ້ມຄອງການຮັບ-ຈ່າຍເທົ່ານັ້ນ, ອີງໃສ່ຄວາມຮຽກຮ້ອງຕ້ອງການ ເພື່ອຕອບສະໜອງດ້ານພະລາທິການໃຫ້ກຳລັງ ໄດ້ເຄື່ອນໄຫວເຮັດໜ້າທີ່ການ ເມືອງທີ່ພັກ-ລັດມອບໝາຍໃຫ້, ຫ້ອງການ ປກສ ສູນກາງຈຶ່ງໄດ້ສ້າງຕັ້ງພະແນກພະລາທິການຂຶ້ນໃນວັນທີ 2 ພຶດສະພາ 1971 ຢູ່ຖານທີ່ໝັ້ນຂອງການປະຕິວັດ ທີ່ເມືອງວຽງໄຊ ແຂວງຫົວພັນ.
ຫຼັງຈາກກຳລັງພະລາທິການໄດ້ຮັບການສ້າງຕັ້ງຂຶ້ນ ກໍໄດ້ປະຕິບັດພາລະບົດບາດຂອງຕົນ ໃນການຮັບປະ ກັນ ແລະ ຕອບສະໜອງພະລາທິການຮອບດ້ານໃຫ້ກໍາລັງ ປກສ ເຮັດສໍາເລັດໜ້າທີ່ຕະຫຼອດມາ; ກໍາລັງພະລາທິ ການໄດ້ຮັບການປັບປຸງແຕ່ລະໄລຍະ ມີຄວາມເຕີບໃຫຍ່ຂະຫຍາຍຕົວມາເຖິງທຸກວັນນີ້ ກໍຍ້ອນມີພັກປະຊາຊົນ ປະ ຕິວັດລາວ ກໍຄື ຄະນະພັກ, ຄະນະນໍາ ກະຊວງ ປກສ ນໍາພາ-ຊີ້ນຳ, ເດັດຂາດ, ໂດຍກົງ ແລະ ຮອບດ້ານຕໍ່ຂົງເຂດວຽກງານພະລາທິການ. ສະນັ້ນ, ຍ້ອນເຫັນໄດ້ຄວາມໝາຍ, ຄວາມສໍາຄັນຂອງວຽກງານພະລາທິການ ມາຮອດວັນທີ 13 ກຸມພາ 2012 ລັດຖະມົນຕີວ່າການກະຊວງ ປກສ ໄດ້ອອກຂໍ້ຕົກລົງ ສະບັບເລກທີ 237/ປກສ ວ່າດ້ວຍການຮັບຮອງເອົາວັນທີ 2 ພຶດສະພາ 1971 ເປັນວັນສ້າງຕັ້ງກໍາລັງພະລາທິການ ປກສ ຢ່າງເປັນທາງການ. ໃນພິທີໄດ້ປະກາດຕຳແໜ່ງງານໃຫ້ນາຍຕຳຫຼວດຈຳນວນ 135 ສະຫາຍ ຍິງ 18 ສະຫາຍ ແລະ ຜ່ານເອກະສານທີ່ສໍາຄັນອື່ນໆ ຕື່ມອີກ.
 |
ໂອກາດນີ້, ສະຫາຍ ພັອ ອາຄົມ ວົງພະຈັນ ໄດ້ໃຫ້ກຽດໂອ້ລົມ ເນັ້ນໜັກໃຫ້ນາຍຕຳຫຼວດຜູ້ທີ່ໄດ້ຮັບຕຳ ແໜ່ງໃໝ່ ຈົ່ງເພີ່ມທະວີຄວາມຮັບຜິດຊອບຂອງຕົນຕໍ່ໜ້າທີ່ວຽກງານ ຕັ້ງໜ້າຝຶກຝົນຫຼ່ໍຫຼອມຕົນເອງຢ່າງບໍ່ຢຸດຢັ້ງ ທາງດ້ານຄຸນທາດການເມືອງ, ຄຸນສົມບັດສິນທຳປະຕິວັດ ແລະ ຍົກລະດັບຄວາມຮູ້-ຄວາມສາມາດທາງດ້ານວິຊາສະເພາະໃຫ້ແຫຼມຄົມກວ່າເກົ່າ ເປັນແບບຢ່າງທີ່ດີໃຫ້ນາຍ ແລະ ພົນຕຳຫຼວດພາຍໃນກົມກອງ, ເສີມຂະຫຍາຍຄວາມສາມັກຄີຮັກແພງພາຍໃນກົມກອງໃຫ້ແໜ້ນແຟ້ນ ຮັບໃຊ້ປະຊາຊົນດ້ວຍຄວາມບໍລິສຸດໃຈ ແລະ ເປັນກຳລັງຫຼັກແຫຼ່ງທີ່ໄວ້ວາງໃຈໄດ້ຂອງພັກ, ຂອງລັດ ແລະ ຂອງປະຊາຊົນຢ່າງແທ້ຈິງ. ຂ່າວ: ປກສ ຫຼວງນ້ຳທາ
ຄໍາເຫັນ