ສະຫາຍ ພັນໂທ ພອນໃຈ ພາມຸງຄຸນ ຫົວໜ້າກອງບັນຊາການ ປກສ ເມືອງຈັນທະບູລີ ນະຄອນຫຼວງວຽງຈັນ ໄດ້ໃຫ້ສຳພາດຕໍ່ສື່ມວນຊົນ ໃນວັນທີ 12 ເມສາ 2026 ທີ່ເມືອງຈັນທະບູລີ ນະຄອນຫຼວງວຽງຈັນ ກ່ຽວກັບຄວາມພ້ອມຮັກສາຄວາມເປັນລະບຽບຮຽບຮ້ອຍ ແລະ ຄວາມສະຫງົບປອດໄພ ໃຫ້ແກ່ງານສະເຫຼີມສະຫຼອງບຸນປີໃໝ່ລາວ ພ.ສ 2569 ປະຈຳປີ 2026 ວ່າ:
ການຈັດວາງກໍາລັງ ເຂົ້າແຕ່ລະຈຸດປ້ອງກັນ ໃນແຕ່ລະວັນ (14-16 ເມສາ 2026) ເອົາກໍາລັງເຂົ້າ ເວລາ 7:00 ໂມງ
1. ຈຸດພື້ນທີ່ບໍລິເວນຫາດດອນຈັນ 10 ສະຫາຍ, 2. ເຂດບໍລິເວນຄຸ້ມເມືອງເກົ່າ, ສວນສະຫຼອງໄຊ, ສວນເຈົ້າອານຸວົງ 20 ສະຫາຍ, 3. ວັດສີສະເກດ 10 ສະຫາຍ ,4.ວັດອົງຕື້ 10 ສະຫາຍ, 5. ເຂດສວນນໍ້າພຸ 10 ສະຫາຍ, 6. ຖະໜົນແຫ່ງບຸນ 6 ສຫາຍ, 7. ຖະໜົນສາມແສນໄທ 52 ສະຫາຍ, 8. ຈຸດຈັດງານເຂດຜາມໄຊແຄມຂອງ 18 ສຫາຍ, 9. ຈຸດຈັດງານເຂດຫໍວັດທະນະທໍາ 12 ສະຫາຍ, 10. ຈຸດຈັດງານເຂດຂ້າງສະໜາມກິລາເຈົ້າອະນຸວົງ 12 ສະຫາຍ, 11. ປະຈໍາການກອງບັນຊາການ 32 ສະຫາຍ, 12. ປະຈໍາການ ປກສ ກຸ່ມບ້ານທັງ 5 ກຸ່ມ 56 ສະຫາຍ, 13. ປະຈໍາການສະຖານີຮັບແຈ້ງເຫດທັງ 2 ສະຖານີ 12 ສະຫາຍ, 14. ກໍາລັງຈາລະຈອນ ເຮັດໜ້າທີ່ລະບາຍການສັນຈອນຕາມເສັ້ນທາງ 46 ສະຫາຍ ແລະ ຄອຍເຫດ8 ສະຫາຍ
ສະເພາະ ວັນທີ 14 ເມສາ 2026 ໄດ້ມີການນໍາຂັ້ນສູງ ມາຮ່ວມພິທີທາງສາສະໜາ ທີ່ວັດອົງຕື້, ວັດສີສະເກດ ແລະ ພິທີແຫ່ພະພຸດທະຮູບ ໄປຕາມເສັ້ນທາງເສດຖາທິລາດ (ທາງລ່ອງ) ຫາໄພແດງນະຄອນບານ ລ້ຽວຊ້າຍຫາໄພແດງທາດດໍາ ລ້ຽວຊ້າຍຂຶ້ນມາຕາມເສັ້ນທາງສາມແສນໄທ ຮອດໄພແດງສີຫອມ ລ້ຽວຊາຍມາຫາໄພແດງຫຼັກ 1 ແລະ ລ່ອງລົງຕາມເສັ້ນທາງເສດຖາທິລາດ ແລ້ວຄືນເຂົ້າວັດ.
ນອກຈາກບັນຈຸກໍາລັງ ໃສ່ແຕ່ລະຈຸດທີ່ກ່າວມາຂ້າງເທິງນັ້ນ. ພວກເຮົາຍັງໄດ້ຈັດວາງກໍາລັງ ໃສ່ແຕ່ລະຈຸດ 3 ແຍກ, 4 ແຍກ ( ໂດຍສະເພາະແມ່ນກໍາລັງຈາລະຈອນ) ຕາມເສັ້ນທາງທັງການນໍາຜ່ານ ແລະ ຂະບວນແຫ່ພະພຸດທະຮູບຜ່ານ. ເພື່ອຮັບປະກັນເຮັດໃຫ້ງານສະເຫຼີມສະຫຼອງບຸນປີໃໝ່ລາວໃນປີນີ້ໃຫ້ມີຄວາມສະຫງົບປອດໄພ ແລະ ເປັນລະ ບຽບຮຽບຮ້ອຍ ໃນທົ່ວນະຄອນຫຼວງວຽງຈັນ ເວົ້າລວມ, ເວົ້າສະເພາະ ຢູ່ເມືອງຈັນທະບູລີ ຊຶ່ງມີຫຼາຍກິດຈະກໍາ ແລະ ມີທັງງານມ່ວນຊື່ນ-ບັນເທິງ ເພື່ອເສີມຂະຫຍາຍມູນເຊື້ອ ແລະຮັກສາໄດ້ຮີດຄອງປະເພນີອັນດີງາມຂອງຊາດ ໃນການສະເຫຼີມສະຫຼອງບຸນປະເພນີປີໃໝ່ ລາວ ດ້ວຍຄວາມເບີກບານມ່ນຊື່ນ. ໂດຍຈັດຕັ້ງຜັນຂະຫຍາຍແຈ້ງການຂອງຫ້ອງວ່າການນະຄອນຫຼວງວຽງຈັນ ແລະ ກອງບັນຊາການ ປກສ.ນວ ກໍໄດ້ອອກແຈ້ງການກ່ຽວກັບການເພີ້ມທະວີປ້ອງກັນຄວາມສະຫງົບ, ຮັກສາຄວາມເປັນລະບຽບຮຽບຮ້ອຍ ໃນໄລຍະສະເຫຼີມສະຫຼອງບຸນປີໃໝ່ລາວ ພ.ສ 2569 (ຄສ 2026) ຢູ່ນະຄອນຫຼວງວຽງຈັນ ສະບັບເລກທີ 168/ປກສ.ນວ, ລົງວັນທີ 7 ເມສາ 2026. ໂດຍໄດ້ອອກ 8 ຂໍ້ຫ້າມ:
1. ຫ້າມຊື້-ຂາຍ ວັດຖຸກໍ່ໃຫ້ເກີດສຽງແຕກ ເຊັ່ນ: ໝາກກະໂພກ, ພຸ, ທາດແຕກ. ວັດຖຸອອກລິດ ແລະ ສິ່ງເສບຕິດ ທຸກປະເພດ.
2. ຫ້າມໃຊ້ນໍ້າສີ, ນໍ້າເປື້ອນ, ນໍ້າກ້ອນ ແກວ່ງໃສ່ກັນ-ໃສ່ລົດ, ຫ້າມລັດທາງຫົດນໍ້າ, ຕັ້ງກຸ່ມເຕັ້ນຟ້ອນຕາມຫົນທາງ.
3. ຫ້າມແຕ່ງກາຍບໍ່ສຸພາບຫົດສົງ (ຜູ້ຊາຍນຸ່ງສົ້ງ-ຜູ້ຍິງນຸ່ງສິ້ນ), ຫ້າມທ່ຽວຫຼິ້ນແບບລາມົກ (ນຸ່ງໂປ້ເປືອຍ), ຫ້າມຫຼິ້ນການພະນັນ, ຫ້າມອາລະວາດຕີກັນ ແລະ ການປະພຶດ ທີ່ເປັນການກໍ່ຄວາມບໍ່ສະຫງົບ.
4. ຫ້າມລົງຫຼິ້ນນໍ້າຂອງ ທີ່ບໍ່ໄດຮັບອະນຸຍາດ ເພື່ອຮັບປະກັນຄວາມປອດໄພ ຫຼີກລ່ຽງສິ່ງທີ່ບໍ່ເພິ່ງປາຖະໜາອາດເກີດຂຶ້ນ.
5. ຫ້າມຂະບວນແຫ່ຄົບງັນ ຕາມທ້ອງຖະໜົນ (ຍົກເວັ້ນຂະບວນແຫ່ພຣະພຸດທະຮູບ ທີ່ທາງການອະນຸມັດ). ການສັນຈອນ ແລະການຈອດລົດ ຕາມທ້ອງຖະໜົນ ຕ້ອງປະຕິບັດລະບຽບຈາລະຈອນ ຢ່າງເຂັ້ມງວດ.
6. ຫ້າມວາງວັດຖຸສິ່ງຂອງ, ຕັ້ງຮ້ານຂາຍເຄື່ອງ ຕາມເສັ້ນທາງ, ທາງຄົນຍ່າງ ຊຶ່ງເປັນການກີດຂວາງການສັນຈອນ;
7. ຫ້າມເປີດເຄື່ອງສຽງດັງເກີນຂອບເຂດ (80 ດີຊີເບວ) ແລະ ກໍານົດເວລາ 8:00-23:00 ໂມງ;
8. ຫ້າມຫົດນໍ້າໃສ່ເຈົ້າໜ້າທີ່ ໃນເວລາປະຕິບັດໜ້າທີ່.
ທ່ານຍັງຝາກເຖິງປະຊາຊົນ ໃຫ້ມີສະຕິໃນການປົກປັກຮັກສາຊັບສິນທີ່ມີຄ່າຂອງຕົນ ບໍ່ວ່າຢູ່ເຮືອນຊານ ແລະ ຕິດຕົວໄປມາທ່ຽວຫຼິ້ນຕ່າງໆ. ພ້ອມນັ້ນ, ຊ່ວຍເປັນຫູເປັນຕາຊ່ວຍເຈົ້າໜ້າທີ່ປະກອບສ່ວນເຂົ້າໃນວຽກງານປ້ອງກັນຄວາມສະຫງົບ., ສຶກສາອົບຮົມລູກ -ຫຼານ ໃນການໄປມາທ່ຽວຫຼິ້ນຕ່ງາໆ ບໍ່ໃຫ້ມີການພົວພັນສິ່ງພິດກົດໝາຍທຸກປະເພດ (ສິ່ງເສບຕິດ, ການພະນັນ) ໃຫ້ປະຕິບັດບັນດາຂໍ້ຫ້າມໃນແຈ້ງການ ເພື່ອຮັກສາລະບຽບການ ແລະ ປະເພນີອັນດີງາມໄດ້ສືບສານຕໍ່ໄປ, ການໃຊ້ລົດໃຊ້ຖະໜົນຂໍໃຫ້ກຽດຊຶ່ງກັນ ແລະ ກັນ. ເສັ້ນທາງໃດມີຄວາມສັບສົນ-ແອອັດ ຂໍໃຫ້ເວັ້ນໄປທາງອື່ນ (ໂດຍສະເພາະຖະໜົນສາມແສນໄທ ເປັນຈຸດຫຼິ້ນຂອງຊາວໜຸ່ມ-ໄວໜຸ່ມ), ຕ້ອງເອົາໃຈໃສ່ປະຕິບັດກົດລະບຽບຈາລະຈອນຢ່າງເຂັ້ມງວດ. ດື່ມສິ່ງມຶນເມົາແລ້ວຫ້າມຂັບຂີ່ຍານພາຫະນະ, ຕັ້ງກຸ່ມແຂ່ງລົດກວນເມືອງ, ໃຊ້ສຽງດັງລົບກວນເຮືອນໃກ້ຄຽງ ແລະ ອື່ນໆ, ເອົາໃຈໃສ່ຕິດຕາມການເຄື່ອນໄຫວຂອງກຸ່ມຄົນບໍ່ດີ ເປັນການປະກອບສ່ວນເຂົ້າຮ່ວມໃນວຽກງານປ້ອງກັນຄວາມສະຫງົບ ກໍລະນີພົບເຫັນເຫດການໃຫ້ແຈ້ງຕໍ່ອົງການປົກຄອງບ້ານ; ປກສ ກຸ່ມ; ປກສ ເມືອງ ຫຼື ເຈົ້າໜ້າທີ່ ທີ່ກໍາລັງປະຕິບັດໜ້າທີ່ຢູ່ໃກ້ຄຽງເປັນຕົ້ນ, ເດືອນເມສານີ້ ອາກາດຮ້ອນເອົ້າ, ແຫ້ງແລ້ງ ນອກຈາກຮັກສາດ້ານສຸຂະພາບແລ້ວ ແລະ ຮັບປະກັນດ້ານອັກຄີໄຟ ກໍຂໍໃຫ້ມີສະຕິແທ້ໆກ່ອນອອກຈາກເຮືອນກວດກາລະບົບໄຟຟ້າ, ການໃຕ້ທູບທຽນ, ການຈູດຂີ້ເຫຍື່ອ ແລະ ອື່ນໆ.
ຕາງໜ້າຄະນະພັກ-ຄະນະກອງບັນຊາການ ປກສ ເມືອງຈັນທະບູ ອວຍພອນໃຫ້ການນຳ ພັກ-ລັດ ແລະ ປະຊາຊົນ ທຸກຊັ້ນຄົນ ຈົ່ງມີສຸຂະພາບເຂັ້ມແຂງ ປະສົບຜົນສໍາເລັດໃນໜ້າທີ່ວຽກງານຂອງຕົນ ຕະຫຼອດໄປ.
(ຂ່າວ: ຕຸໄລເພັດ ພິມເມືອງ)
ຄໍາເຫັນ