ກໍຄືທົ່ວສັງຄົມໃຫ້ເຫັນໄດ້ເຖິງຄວາມສໍາຄັນຂອງປ່າໄມ້, ການປົກປັກຮັກສາ, ພັດທະນາ ແລະ ນໍາໃຊ້ປ່າໄມ້ຕາມທິດສີຂຽວ ແລະ ຍືນຍົງ. ຄຳຂວັນຂອງວັນປູກຕົ້ນໄມ້ແຫ່ງຊາດ ປະຈໍາປີ 2025 ແມ່ນ: “ປູກຕົ້ນໄມ້ໃນວັນນີ້ ເພື່ອລູກຫຼານ ໃນວັນໜ້າ”, “ຈົ່ງຊ່ວຍກັນປູກຕົ້ນໄມ້ໃຫ້ເປັນປ່າ ເພື່ອເປັນສິນຄ້າ ແລະ ປະກອບສ່ວນໃນການປົກປັກຮັກສາສິ່ງແວດລ້ອມ, ຫຼຸດຜ່ອນການປ່ຽນແປງດິນຟ້າອາກາດ”.
ປ່າໄມ້ມີຄວາມສໍາຄັນທີ່ສຸດຕໍ່ການພັດທະນາເສດຖະກິດ-ສັງຄົມແຫ່ງຊາດທັງທາງກົງ ແລະ ທາງອ້ອມ, ມີຄວາມສຳຄັນຕໍ່ການປົກປັກຮັກສາດິນ, ແຫຼ່ງນໍ້າ ແລະ ຊີວະນາໆພັນໃຫ້ມີຄວາມອຸດົມສົມບູນ, ພ້ອມທັງ ຫຼຸດຜ່ອນຜົນກະທົບຂອງການປ່ຽນແປງດິນຟ້າອາກາດ ຊຶ່ງບົດບາດນີ້ມະນຸດເຮົາບໍ່ສາມາດຈະເຮັດແທນໄດ້. ປ່າໄມ້ຍັງປະກອບສ່ວນຢ່າງຫຼວງຫຼາຍ ຕໍ່ການພັດທະນາ ຂະແໜງ ກປ ຕິດພັນກັບອຸດສາຫະກຳ ແລະ ການບໍລິການ ແລະ ການພັດທະນາພື້ນຖານໂຄງລ່າງເຊັ່ນ: ເຂື່ອນໄຟຟ້ານ້ຳຕົກ, ອ່າງເກັບນ້ຳເພື່ອການຜະລິດກະສິກຳ, ການຜະລິດເປັນສິນຄ້າ, ການຄົມມະນາຄົມ, ການຂຸດຄົ້ນຊັບພະຍາກອນປ່າໄມ້ ແລະ ເຄື່ອງປ່າຂອງດົງແບບຍືນຍົງ ຊຶ່ງໄດ້ປະກອບສ່ວນສຳຄັນຕໍ່ການປັບປຸງຊີວິດການເປັນຢູ່ຂອງປະຊາຊົນ ຕິດພັນກັບການພັດທະນາຊົນນະບົດ ແກ້ໄຂຄວາມທຸກຍາກຂອງປະຊາຊົນບັນດາເຜົ່າ, ດັ່ງທີ່ທ່ານປະທານ ໄກສອນ ພົມວິຫານ ຜູ້ນໍາທີ່ແສນເຄົາລົບຮັກ ໄດ້ເວົ້າໄວ້ວ່າ “ປ່າໄມ້ຄືຄໍາຂຽວຂອງຊາດ“.
ເປົ້າໝາຍການກຳນົດເອົາວັນດັ່ງກ່າວ ເປັນວັນປູກຕົ້ນໄມ້ແຫ່ງຊາດ ແມ່ນເພື່ອປູກຈິດສຳນຶກໃຫ້ອະນຸຊົນ ແລະ ເຍົາວະຊົນຂອງຊາດ ກໍຄືລູກຫຼານຜູ້ເກີດໃໝ່ໃຫຍ່ລຸນ ໃຫ້ມີສະຕິຕື່ນຕົວຮັກ ແລະ ຫວງແຫນປ່າໄມ້ ແລະ ຊັບພະຍາກອນປ່າໄມ້ ທັງເປັນການປຸກລະດົມຂົນຂວາຍ ໃຫ້ທົ່ວປວງຊົນເຂົ້າຮ່ວມໃນການຄຸ້ມຄອງ, ປົກປັກຮັກສາ ແລະ ພັດທະນາປ່າໄມ້, ແນໃສ່ເຮັດໃຫ້ປ່າໄມ້ມີຄວາມອຸດົມສົມບູນ, ກາຍເປັນທ່າແຮງ ແລະ ເປັນອົງປະກອບທີ່ສໍາຄັນ ຢູ່ໃນໂຄງປະກອບເສດຖະກິດແຫ່ງຊາດ. ຕະຫຼອດໄລຍະເວລາ ກວ່າ 45 ປີຜ່ານມາ, ພັກ ແລະ ລັດຖະບານ ຍາມໃດກໍມີຄວາມເປັນຫ່ວງເປັນໃຍ ຕໍ່ວຽກງານຄຸ້ມຄອງປ່າໄມ້ ໂດຍໄດ້ກຳນົດນະໂຍບາຍ, ກົດໝາຍ, ມະຕິ, ຄໍາສັ່ງ ແລະ ນິຕິກຳຕ່າງໆ ທີ່ກ່ຽວຂ້ອງໃນການຄຸ້ມຄອງ, ປົກປັກຮັກສາ, ພັດທະນາ, ນໍາໃຊ້ປ່າໄມ້, ທີ່ດິນປ່າໄມ້ໃຫ້ແທດເໝາະກັບແຜນພັດທະນາເສດຖະກິດ-ສັງຄົມໃນແຕ່ລະໄລຍະ.
ເຖິງຢ່າງໃດກໍຕາມ, ການປົກປັກຮັກສາປ່າໄມ້ ຍັງມີສິ່ງທ້າທາຍ ແລະ ຜົນກະທົບທັງທາງກົງ ແລະ ທາງອ້ອມຕໍ່ ປ່າໄມ້ ແລະ ທີ່ດິນປ່າໄມ້ ໂດຍສະເພາະ ການຖາງປ່າ ແລະ ຈຸດປ່າ ທີ່ມີທ່າອ່ຽງເພີ່ມຂຶ້ນໃນແຕ່ລະປີ ລວມທັງ ການບຸກລຸກ, ຈັບຈອງ, ຊື້-ຂາຍ ພື້ນທີ່ດິນ 3 ປະເພດປ່າ. ຜ່ານມາ ກະຊວງ ກປ ໄດ້ປະສານສົມທົບກັບກະຊວງ ແລະ ອົງການປົກຄອງທ້ອງຖິ່ນ ທີ່ກ່ຽວຂ້ອງ ເພື່ອຄົ້ນຄວ້າ ກໍານົດນະໂຍບາຍ ຊອກຫາວິທີໃນການແກ້ໄຂບັນຫາດັ່ງກ່າວ ໄປຄຽງຄູ່ກັບການປັບປຸງຊີວິດການເປັນຢູ່ຂອງປະຊາຊົນ ທີ່ອາໄສຢູ່ໃນເຂດປ່າໄມ້ດ້ວຍການຮັບຮູ້ສິດນໍາໃຊ້ທີ່ດິນ, ຂຶ້ນທະບຽນອອກໃບຕາດິນ, ຂຶ້ນທະບຽນອອກໃບຢັ້ງຢືນການນໍາໃຊ້ທີ່ດິນປ່າໄມ້, ເຮັດສັນຍາການຄຸ້ມຄອງ ແລະ ປົກປັກຮັກສາປ່າໄມ້ ແລະ ທີ່ດິນປ່າໄມ້ ຕາມຄຳສັ່ງ ສະບັບເລກທີ 20/ນຍ ເພື່ອສົ່ງເສີມການຜະລິດ ແລະ ສ້າງເສດຖະກິດຄອບຄົວ ຮູບແບບຕ່າງໆທີ່ເໝາະສົມ ຕາມທ່າແຮງຂອງແຕ່ລະທ້ອງຖິ່ນ ໃຫ້ປະຊາຊົນທີ່ຕັ້ງພູມລໍາເນົາ, ອາໄສ ແລະ ທໍາການຜະລິດຖາວອນ ຢູ່ໃນ ແລະ ຕິດກັບທີ່ດິນ 3 ປະເພດປ່າ.
ເພື່ອຜັນຂະຫຍາຍມາດຕາ 60 ຂອງກົດໝາຍວ່າດ້ວຍປ່າໄມ້, ສືບຕໍ່ຈັດຕັ້ງປະຕິບັດຄໍາສັ່ງ ສະບັບເລກທີ 15/ນຍ ແລະ ຄໍາສັ່ງ ສະບັບເລກທີ 11/ນຍ, ທັງເປັນການສ້າງຂະບວນການປູກຈິດສຳນຶກໃຫ້ທົ່ວສັງຄົມໃນການສົ່ງເສີມປູກໄມ້ ແລະ ຟື້ນຟູປ່າໃຫ້ກວ້າງຂວາງ ແລະ ບັນລຸຕາມແຜນການທີ່ວາງໄວ້, ກະຊວງ ກປ ຈຶ່ງໄດ້ອອກແຈ້ງການ ສະບັບເລກທີ1687/ກປ, ລົງວັນທີ 13 ພຶດສະພາ 2025 ເພື່ອເປັນການສ້າງຂະບວນການປູກຕົ້ນໄມ້ ເນື່ອງໃນວັນປູກຕົ້ນໄມ້ແຫ່ງຊາດ ວັນທີ 1 ມິຖຸນາ 2025. ນອກຈາກນີ້, ກະຊວງ ກປ ໄດ້ສົມທົບກັບຄະນະພັກ-ຄະນະນຳອົງການປົກຄອງທ້ອງຖິ່ນທົ່ວປະເທດ ກະກຽມແຜນການ ແລະ ຂະບວນການປູກໄມ້ຢູ່ທ້ອງຖິ່ນໃຫ້ເປັນຂະບວນຟົດຟື້ນ, ໂດຍມີແຜນການເກັບແກ່ນພັນໄມ້ ໃຫ້ໄດ້ 45,000 ກວ່າກິໂລກຣາມ, ກ້າເບ້ຍໄມ້ 24,300,000 ກວ່າເບ້ຍ ແລະ ປູກໄມ້ 37,200 ກວ່າເຮັກຕາ.
ສຳລັບ ວັນທີ 1 ມິຖຸນາ 2025 ນີ້, ໃນທົ່ວປະເທດ ມີແຜນການຈະຈັດພິທີ ສ້າງຂະບວນການປູກຕົ້ນໄມ້ ໃນເນື້ອທີ່ ປະມານ 1,600 ກວ່າເຮັກຕາ ໂດຍຈະນໍາໃຊ້ເບ້ຍໄມ້ ຈໍານວນ 997,000 ກວ່າເບ້ຍ. ສຳລັບ ກະຊວງ ກປ ໄດ້ປະສານສົມທົບກັບ ພະແນກ ກປ ນະຄອນຫຼວງວຽງຈັນ ແລະ ພາກສ່ວນທີ່ກ່ຽວຂ້ອງ ຮ່ວມກັນຈັດພິທີ ສ້າງຂະບວນການປູກຕົ້ນໄມ້ ເພື່ອສະເຫຼີມສະຫຼອງ ວັນປູກຕົ້ນໄມ້ແຫ່ງຊາດ ຢູ່ນະຄອນຫຼວງວຽງຈັນໃນເນື້ອທີ່ ປະມານ 3 ເຮັກຕາ; ໃນນັ້ນ, ຊະນິດພັນໄມ້ ທີ່ຈະນຳໄປປູກມີ: ໄມ້ດູ່, ໄມ້ຍາງ, ໄມ້ແຄນ ຈຳນວນ 3,000 ກວ່າເບ້ຍ.
ເນື່ອງໃນໂອກາດວັນປູກໄມ້ແຫ່ງຊາດ ວັນທີ 1 ມີຖຸນາ 2025 ນີ້, ຮຽກຮ້ອງມາຍັງປວງຊົນລາວທັງຊາດຈົ່ງເຊີດຊູສະຕິຮັກ ແລະ ຫວງແຫນ ຊັບພະຍາກອນປ່າໄມ້, ປະກອບສ່ວນໃນການປູກໄມ້, ຟື້ນຟູປ່າ ໄປຄຽງຄູ່ກັບການຄຸ້ມຄອງ, ປົກປັກຮັກສາປ່າໄມ້ ອັນເປັນມໍລະດົກ ແລະ ຊັບສົມບັດຂອງວົງຄະນະຍາດແຫ່ງຊາດ ໃຫ້ນັບມື້ມີຄວາມອຸດົມສົມບູນ ແລະ ຍືນຍົງໂດຍບໍ່ມີວັນບົກແຫ້ງ, ເຮັດໃຫ້ຊັບພະຍາກອນປ່າໄມ້ປະກອບອັນສຳຄັນ ຂອງການພັດທະນາເສດຖະກິດ-ສັງຄົມ ຂອງຊາດ.
ສໍາລັບການຈັດກິດຈະກໍາໃນວັນປູກຕົ້ນໄມ້ແຫ່ງຊາດໃນປີນີ້, ກະຊວງ ກປ ຂໍເຊີນຊວນທຸກພາກສ່ວນທີ່ກ່ຽວຂ້ອງທັງພາກລັດ, ເອກະຊົນ ແລະ ປະຊາຊົນ ພ້ອມກັນຈັດພິທີໂດຍໃຫ້ອີງໃສ່ເງື່ອນໄຂຕົວຈິງຂອງແຕ່ລະທ້ອງຖິ່ນ ເນັ້ນໃສ່ເນື້ອໃນປຸກລະດົມເປັນຕົ້ນຕໍ. ການປູກຕົ້ນໄມ້ ແມ່ນສາມາດປູກໄດ້ແຕ່ດຽວນີ້ເປັນຕົ້ນໄປ ຈົນຮອດທ້າຍລະດູຝົນໃນບ່ອນທີ່ມີເງື່ອນໄຂ ໃນເນື້ອທີ່ດິນເປົ່າວ່າງຂອງຕົນ, ໃນຮົ້ວ, ສວນ, ທີ່ດິນປຸກສ້າງ, ເດີ່ນໂຮງຮຽນ, ສໍານັກງານ, ອົງການ ແລະ ແຄມທາງ ຕາມເງື່ອນໄຂຕົວຈິງ. ຖ້າຫາກວ່າໃນປີນີ້ ພວກເຮົາພ້ອມກັນປູກຕົ້ນໄມ້ຜູ້ລະ 1-2 ຕົ້ນ ກໍຈະເຮັດໃຫ້ພວກເຮົາມີຕົ້ນໄມ້ເພີ່ມຂຶ້ນປະມານ 7,000,000 ຫາ 14,000,000 ກວ່າຕົ້ນ.
(ຂ່າວ-ພາບ: ແສງຈັນ)
ຄໍາເຫັນ