ປຶກສາຫາລື ບັນຫາການຂາດແຄນແຮງງານພາຍໃນແຂວງໄຊສົມບູນ

ໃນກອງປະຊຸມ, ໄດ້ຮັບຟັງການ ຜ່ານຮ່າງບົດສະຫຼຸບການຈັດຕັ້ງສົ່ງເສີມວຽກງານຈັດຫາງານ ແລະ ວຽກງານຄຸ້ມຄອງແຮງງານ 9 ເດືອນ ປີ 2025 (ຕີລາຄາຂໍ້ສະດວກ, ຂໍ້ຫຍຸ້ງຍາກ) ແຜນການ 3 ເດືອນທ້າຍປີ 2025 ແລະ ທິດທາງແຜນການ ປີ 2026. ຕະຫຼອດໄລຍະ 9 ເດືອນຜ່ານມາ ໄດ້ລົງກວດກາແຮງງານປົກກະຕິ ແລະ ຕິດຕາມຜົນການຈັດຕັ້ງປະຕິບັດກົດໝາຍວ່າດ້ວຍແຮງງານໄດ້ທັງ ໝົດ 39 ຫົວໜ່ວຍ (61 ແຫ່ງ). ໃນນັ້ນ, ກວດກາປົກກະຕິ 35 ຫົວໜ່ວຍ ແລະ ກວດກາຕິດຕາມຜົນ 4 ຫົວໜ່ວຍ, ມີຜູ້ອອກແຮງງານທັງໝົດ 2,020 ຄົນ ຍິງ 182 ຄົນ, ແຮງງານຕ່າງປະເທດ 678 ຄົນ ຍິງ 25 ຄົນ. ຜ່ານການກວດກາພົບເຫັນແຮງງານ ຕ່າງປະເທດ ຈໍານວນ 224 ຄົນ ຍິງ 1 ຄົນບໍ່ມີເອກະສານຖືກຕ້ອງຕາມລະບຽບການ. ປັດຈຸບັນ, ແຂວງໄຊສົມບູນຍັງຕ້ອງການແຮງງານປະເພດ ໂຮງຈັກໂຮງງານ, ອຸດສາຫະກຳ, ກະສິກຳ, ການບໍລິການ ແລະ ອື່ນໆ. ພ້ອມດຽວກັນນີ້, ຍັງໄດ້ຮັບຟັງການເຜີຍແຜ່ ດຳລັດວ່າດ້ວຍການກວດກາແຮງງານ ສະບັບເລກທີ 289/ລບ, ກົດໝາຍວ່າດ້ວຍການຈັດຫາງານ ສະບັບເລກທີ 37/ສພຊ. ພ້ອມນີ້ ຜູ້ເຂົ້າຮ່ວມຍັງໄດ້ປຶກສາຫາລື ກ່ຽວກັບ ບັນຫາການບໍລິການຈັດຫາງານ, ການແກ້ໄຂບັນຫາການຂາດແຄນແຮງງານພາຍໃນແຂວງ ແລະ ການຮ່ວມມືໃນຕໍ່ໜ້າ ລະຫວ່າງ ພາກລັດ ແລະ ເອກະຊົນ ເປັນຕົ້ນການບໍລິການຈັດຫາງານ ຂອງຈຸດບໍລິການຈັດຫາງານ, ການເຂົ້າເຖິງການບໍລິການຈັດຫາງານ ຂອງຫົວໜ່ວຍແຮງງານ, ການປະກາດຕຳແໜ່ງງານວ່າງ, ການຮ່ວມຈັດງານຕະຫຼາດນັດແຮງງານ ແລະ ແຜນການຮ່ວມມືລະຫວ່າງ 3 ຝ່າຍ ຄື: ພະແນກ ແຮງງານ ແລະ ສະຫວັດດີການສັງຄົມແຂວງ, ສະຫະພັນກຳມະບານແຂວງ ແລະ ສະພາການຄ້າ ແລະ ອຸດສາຫະກຳແຂວງ ຫຼື ຫົວໜ່ວຍແຮງງານຕື່ມອີກ. ຈາກນັ້ນ, ບັນດາຜູ້ເຂົ້າຮ່ວມ ກໍໄດ້ພ້ອມກັນຍົກສູງສະຕິປັນຍາຂອງຕົນ ປະກອບຄຳຄິດເຫັນຕໍ່ກັບບັນຫາດັ່ງກ່າວຢ່າງກົງໄປກົງມາ. ທັງນີ້ ກໍເພື່ອເປັນການປຶກສາຫາລື ແກ້ໄຂບັນຫາການຂາດແຄນ ແຮງງານພາຍໃນແຂວງ ແນໃສ່ສົ່ງເສີມໃຫ້ກຳລັງແຮງງານ ມີວຽກເຮັດງານທໍາຕາມຄວາມຕ້ອງການຂອງຕະຫຼາດແຮງງານ, ໄດ້ປະກອບອາຊີບອິດສະລະ ມີລາຍໄດ້ທີ່ເປັນທໍາ, ມີຊີວິດການເປັນຢູ່ທີ່ດີຂຶ້ນ, ຫຼຸດຜ່ອນການວ່າງງານ ແລະ ຜູ້ໃຊ້ແຮງງານ ກໍມີແຮງງານບັນຈຸເຂົ້າ ຕາມຕຳແໜ່ງງານທີ່ຕ້ອງການ.

(ຂ່າວ: ຄຳໝັ້ນ ພຽງພິລາ)