ປຶກສາຫາລືກ່ຽວກັບ ການສະໝັກເຂົ້າເປັນສະມາຊິກຂອງອົງການການຮ່ວມມືປັນຍາປະດິດໂລກ

ທ່ານ ໄຊຊະນະ ສິດທິພອນ ໄດ້ກ່າວວ່າ: ປັນຍາປະດິດ (AI) ໄດ້ກາຍມາເປັນເຕັກໂນໂລຊີ ທີ່ມາປະຕິວັດຂະແໜງການຕ່າງໆ ແລະ ສົ່ງຜົນກະທົບອັນໃຫຍ່ຫຼວງຕໍ່ການພັດທະນາເສດຖະກິດ ແລະ ສັງຄົມຂອງໂລກ ແຕ່ໃນລະດັບສາກົນ ຍັງບໍ່ມີອົງການຮ່ວມມືດ້ານ AI ຢ່າງເປັນທາງການເກີດຂຶ້ນ. ໃນພິທີເປີດການປະຊຸມ World Artificial Intelligence Conference, ທີ່ນະຄອນຊຽງໄຮ, ເດືອນກໍລະກົດ, ປີ 2025 ທີ່ຜ່ານມາ, ທ່ານ ລີ ຊຽງ ນາຍົກລັດຖະມົນຕີ ຂອງ ສາທາລະນະລັດ ປະຊາຊົນ ຈີນ ໄດ້ສະແດງອອກຊັດເຈນວ່າ ສປ ຈີນ ປາດຖະນາທີ່ຈະສ້າງໂອກາດ ໃນການຈັດຕັ້ງ “ອົງການຮ່ວມມືປັນຍາປະດິດໂລກ” ເພື່ອເປັນແພລດຟອມສາກົນ ສຳລັບການປຶກສາຫາລື, ການກຳນົດມາດຕະຖານ ແລະ ການຮ່ວມມືໃນການພັດທະນາ AI ຢ່າງປອດໄພ ແລະ ເປັນປະໂຫຍດຕໍ່ມວນມະນຸດໃນທົ່ວໂລກ. ພາຍຫຼັງການປະຊຸມດັ່ງກ່າວ ກະຊວງການຕ່າງປະເທດ ຂອງ ສປ ຈີນ ໄດ້ເປັນເຈົ້າພາບໃນການຮ່າງສັນຍາ ສ້າງຕັ້ງ “ອົງການຮ່ວມມືປັນຍາປະດິດໂລກ” ແລະ ຈັດກອງປະຊຸມປຶກສາຫາລື ກ່ຽວກັບຮ່າງສັນຍາດັ່ງກ່າວ ໂດຍເຊີນປະເທດຕ່າງໆ ເຂົ້າຮ່ວມເຊັ່ນ: ສປປ ລາວ, ກຳປູເຈຍ, ໄທ, ມາເລເຊຍ, ລັດເຊຍ, ບຣາຊິວ, ອາຟຣິກາໃຕ້, ບັນດາປະເທດອາຊີກາງ ແລະ ອາເມຣິກາລາຕິນ ລວມປະມານ 40 ປະເທດ. ມາຮອດປັດຈຸບັນ ສປ ຈີນ ໃນຖານະປະເທດເຈົ້າພາບ ໄດ້ສົ່ງຮ່າງສັນຍາສຸດທ້າຍ ເພື່ອສະເໜີໃຫ້ບັນດາປະເທດຕ່າງໆ ລົງນາມເຂົ້າເປັນສະມາຊິກ. ດັ່ງນັ້ນ, ກຕສ ຈຶ່ງໄດ້ຈັດກອງປະຊຸມຄັ້ງນີ້ຂຶ້ນ ເພື່ອປຶກສາຫາລືກ່ຽວກັບຂໍ້ສະເໜີ ດັ່ງກ່າວ ໃຫ້ມີຜົນປະໂຫຍດສູງສຸດ.

(ຂ່າວ-ພາບ: ເລັກເຊ່ຍ ສຸດທິວົງ)