ກົດໝາຍສະບັບນີ້ໄດ້ຮັບການຮັບຮອງເອົາຈາກສະພາແຫ່ງຊາດໃນການລົງຄະແນນສຽງໃນວັນທີ 27 ສິງຫາ ຜ່ານມາ, ດ້ວຍຄະແນນສຽງ 115 ສຽງ ຈາກສະມາຊິກທີ່ເຂົ້າຮ່ວມ 163 ທ່ານ. ໃນຂະນະທີ່ໂຮງຮຽນສ່ວນໃຫຍ່ໃນ ສ ເກົາຫຼີ ໄດ້ມີມາດຕະການຈໍາກັດການນໍາໃຊ້ໂທລະສັບມືຖືແລ້ວ, ແຕ່ການເຄື່ອນໄຫວຄັ້ງນີ້ຖືວ່າເປັນການຍົກລະດັບໃຫ້ມີຜົນທາງກົດໝາຍໂດຍກົງ.
ຜູ້ສະຫນັບສະໜູນຊີ້ໃຫ້ເຫັນວ່າ: ການນໍາໃຊ້ໂທລະສັບມືຖືມີຜົນກະທົບຕໍ່ການຮຽນ ແລະ ຫຼຸດຜ່ອນເວລາທີ່ນັກຮຽນຄວນໃຊ້ໃນການສຶກສາ ແລະ ພັດທະນາທັກສະທາງສັງຄົມ. ໃນຂະນະທີ່ການສໍາຫຼວດຂອງລັດຖະບານໃນປີ 2024 ພົບວ່າ: ປະຊາກອນ ສ ເກົາຫຼີ ເກືອບ 1 ສ່ວນ 4 ອາໄສໂທລະສັບມືຖືຫຼາຍເກີນໄປ, ໂດຍກຸ່ມໄວໜຸ່ມທີ່ມີອາຍຸ 10-19 ປີ ສູງເຖິງ 43% ແລະ ໂຕເລກນີ້ຍັງສືບຕໍ່ເພີ່ມຂຶ້ນ.
ຜູ້ປົກຄອງຈຳນວນຫຼາຍໄດ້ສະແດງຄວາມກັງວົນວ່າ: ໂທລະສັບມືຖືເຮັດໃຫ້ລູກໆຂາດສະມາທິໃນການຮຽນ ແລະ ຍັງສ່ຽງຕໍ່ການຖືກຂົ່ມເຫັງໃນສື່ສັງຄົມອອນລາຍ. ໃນຂະນະທີ່ນັກການເມືອງທີ່ໄດ້ນຳສະເໜີຮ່າງກົດໝາຍດັ່ງກ່າວໄດ້ເນັ້ນໜັກວ່າ: ມີຫຼັກຖານທາງວິທະຍາສາດ ແລະ ການແພດທີ່ຈະແຈ້ງຊີ້ໃຫ້ເຫັນອັນຕະລາຍຮ້າຍແຮງຕໍ່ການພັດທະນາສະ ໝອງ ແລະ ອາລົມຂອງໄວໜຸ່ມ.
ຢ່າງໃດກໍຕາມ, ກົດໝາຍບໍ່ໄດ້ຫ້າມການນໍາໃຊ້ໂທລະສັບມືຖືຢ່າງສິ້ນເຊີງ. ແຕ່ອະນຸຍາດໃຫ້ຄູສອນຈໍາກັດການນໍາໃຊ້ພາຍໃນໂຮງຮຽນ ແລະ ຮຽກຮ້ອງໃຫ້ໂຮງຮຽນສອນການນໍາໃຊ້ເຕັກໂນໂລຊີຢ່າງເໝາະສົມ. ທັງນີ້, ມີຂໍ້ຍົກເວັ້ນສໍາລັບນັກຮຽນທີ່ມີຄວາມພິການ ຫຼື ຄວາມຕ້ອງການພິເສດ, ລວມເຖິງການນໍາໃຊ້ເພື່ອການສຶກສາ ແລະ ສຸກເສີນ.
ມາດຕະການນີ້ຈະເຮັດໃຫ້ ສ ເກົາຫຼີ ເປັນໜຶ່ງໃນປະເທດທີ່ຫ້າມການນຳໃຊ້ໂທລະສັບມືຖືໃນຫ້ອງຮຽນໄວ້ໃນກົດໝາຍ ເຊັ່ນດຽວກັບອີຕາລີ, ໂຮນລັງ ແລະ ຈີນ. ແຕກຕ່າງຈາກປະເທດທີ່ໃຊ້ສະເພາະກັບໂຮງຮຽນອະນຸບານເຊັ່ນ: ແຟັງລັງ ແລະ ຝຣັ່ງ.
ຄໍາເຫັນ