 |
ທ່ານ ຝືລີ ລີເລ່ຍນູ ໄດ້ຜ່ານບົດສະຫຼຸບຕີລາຄາການຈັດຕັ້ງປະຕິບັດວຽກງານກໍາມະບານ 6 ເດືອນຕົ້ນປີ ແລະ ວາງທິດທາງ 6 ເດືອນທ້າຍປີ 2026 ໃຫ້ຮູ້ວ່າ: ສະຫະພັນກຳມະບານເມືອງໝື່ນ ໄດ້ເອົາໃຈໃສ່ໂຄສະນາອົບຮົມວຽກງານການເມືອງ-ແນວຄິດໃຫ້ສະມາຊິກກຳມະບານ, ກຳມະກອນ ແລະ ຊາວຜູ້ອອກແຮງງານໃຫ້ມີຄວາມໜັກແໜ້ນທາງດ້ານການເມືອງ, ມີສະຕິລະວັງຕົວຕໍ່ກົນອຸບາຍຫັນປ່ຽນໂດຍສັນຕິຂອງອິດທິກຳລັງປໍລະປັກ, ມີສະຕິຕໍ່ການຈັດຕັ້ງ, ມີຄວາມສາມັກຄີໃນຖັນແຖວສະມາຊິກກຳມະບານ ພ້ອມກັນຕັ້ງໜ້າເຄື່ອນໄຫວໜ້າທີ່ວຽກງານ, ມີຄວາມຕື່ນຕົວເຂົ້າຮ່ວມຂະບວນການຕ່າງໆ. ທົ່ວເມືອງມີ 35 ຮາກຖານ, ມີສະມາຊິກກຳມະບານ 572 ສະຫາຍ ຍິງ 251 ສະຫາຍ, ມີຄະນະບໍລິຫານງານກຳມະບານ 13 ສະຫາຍ ຍິງ 2 ສະຫາຍ, ມີຄະນະກຳມະ ບານ 113 ສະຫາຍ ຍິງ 31 ສະຫາຍ, ມີສະມາຊິກກອງທຶນ 575 ສະຫາຍ. ກອງປະຊຸມຍັງໄດ້ເຜີຍແຜ່ກົດລະບຽບກຳມະບານລາວສະໄໝ IX, ຜ່ານບົດແນະນໍາຂອງສູນກາງສະຫະພັນກໍາມະບານລາວ ສະບັບເລກທີ 299/ສກລ, ລົງວັນທີ 6 ກຸມພາ 2026, ການຈັດຕັ້ງປະຕິບັດເນື້ອໃນຂໍ້ແຂ່ງຂັນ 5 ເປັນເຈົ້າຂອງສະຫະພັນກໍາມະບານ ແລະ ຜ່ານລະບຽບກອງທຶນຊ່ວຍເຫຼືອຊຶ່ງກັນ ແລະ ກັນ.
ໂອກາດນີ້, ທ່ານ ວໍຣະສອນ ສີອັກຄະສອນ ໄດ້ໃຫ້ກຽດໂອ້ລົມ ພ້ອມທັງເນັ້ນໜັກໃຫ້ຮາກຖານກຳມະບານແຕ່ລະຂັ້ນ ຕ້ອງເອົາໃຈໃສ່ໂຄສະນາສຶກສາອົບຮົມ, ເຜີຍແຜ່ເຊື່ອມຊຶມບັນດານິຕິກຳຕ່າງໆ ທີ່ຕິດພັນກັບວຽກງານກອງທຶນໃຫ້ເລິກເຊິ່ງ, ກວ້າງຂວາງ ແລະ ທົ່ວເຖິງໃນຂົງເຂດຄວາມຮັບຜິດຊອບຂອງຕົນ, ສ້າງຄວາມສາມັກຄີ, ເຕົ້າໂຮມສະມາຊິກກຳມະບານ, ເພື່ອນຮ່ວມງານ ເພື່ອຊ່ວຍເຫຼືອຊຶ່ງກັນ ແລະ ກັນໃນເວລາເຈັບເປັນ ແລະ ເສຍຊີວິດ, ເລັ່ງຂະຫຍາຍສະມາຊິກກອງທຶນກຳມະບານໃຫ້ຖືກຕ້ອງ, ສອດຄ່ອງກັບລະບຽບກົດໝາຍທີ່ວາງອອກ.
ຂ່າວ-ພາບ: ນາງ ວັນນາ
ຄໍາເຫັນ