 |
ໃນພິທີ, ໄດ້ຮັບຟັງເຜີຍແຜ່ບົດສະຫຼຸບການເຄື່ອນໄຫວວຽກງານຂອງສະຫະພັນແມ່ຍິງ ທຫລ ປະຈຳປີ 2025 ແລະ ແຜນການປີ 2026 ໂດຍທ່ານ ນາງ ຟອງຈິນດາ ແສງສຸລິວົງ ປະທານຄະນະບໍລິຫານງານ ສະຫະພັນແມ່ຍິງ ທຫລ ແລະ ຮັບຊົມວີດີໂອເປີດໂຕແພລັດຟອມກຸ່ມຊື້-ຂາຍສິນຄ້າ ຂອງອົງການຈັດຕັ້ງມະຫາຊົນ.
ຈາກນັ້ນ, ທ່ານຮອງປະທານ ສສຍລ ໄດ້ຫວນຄືນປະຫວັດຄວາມເປັນມາວັນແມ່ຍິງສາກົນ ໃນການຕໍ່ສູ້ຕ້ານກັບການກົດຂີ່ຂູດຮີດຂອງນາຍທຶນ, ແມ່ຍິງຖືກກົດຂີ່ຂູດຮີດຢ່າງໜັກໜ່ວງ, ເຮັດວຽກຫຼາຍຊົ່ວໂມງ, ບໍ່ມີລະບົບການປົກປັກຮັກສາສຸຂະພາບຂອງແມ່ຍິງ ແລະ ເດັກນ້ອຍ; ຕໍ່ກັບເຫດການດັ່ງກ່າວ, ກຳມະກອນແມ່ຍິງ ຈຶ່ງໄດ້ສາມັກຄີກັນລຸກຂຶ້ນຕໍ່ສູ້, ໂຮມຊຸມນຸມປະທ້ວງ ແລະ ຄັດຄ້ານຕໍ່ການໃຫ້ຄ່າແຮງງານຕ່ຳ ເພື່ອທວງໃຫ້ນາຍທຶນຫຼຸດຜ່ອນຊົ່ວໂມງເຮັດວຽກ, ຢຸດເຊົາການຂູດຮີດແຮງງານເດັກ, ທວງໃຫ້ແມ່ຍິງມີສິດອອກສຽງເລືອກຕັ້ງ ແລະ ລົງຮັບສະໝັກເລືອກຕັ້ງ, ນັ້ນເປັນຂີດໝາຍແຫ່ງໄຊຊະນະພື້ນຖານ ຂອງຂະບວນການແມ່ຍິງສາກົນໃນການຕໍ່ສູ້ທວງເອົາສິດຜົນປະ ໂຫຍດອັນຊອບທໍາໃຫ້ແມ່ຍິງຊາວຜູ້ອອກແຮງງານໃນທົ່ວໂລກ, ພາຍໃຕ້ຄຳຂວັນ: ຜູ້ໜຶ່ງເຮັດວຽກມື້ລະ 8 ຊົ່ວໂມງ ແມ່ຍິງ ແລະ ຜູ້ຊາຍເຮັດວຽກຄືກັນ ຕ້ອງໄດ້ຮັບເງິນເດືອນເທົ່າກັນ, ຕ້ອງມີລະບົບການປ້ອງກັນສຸຂະພາບຂອງແມ່ຍິງ ແລະ ເດັກນ້ອຍ. ນັບແຕ່ນັ້ນມາວັນທີ 8 ມີນາ ຈຶ່ງໄດ້ຮັບການສະເຫຼີມສະຫຼອງຢູ່ໃນຫຼາຍປະເທດທົ່ວໂລກ.
ນອກຈາກນີ້, ທ່ານໄດ້ເຜີຍແຜ່ຜົນສໍາເລັດກອງປະຊຸມໃຫຍ່ຜູ້ແທນແມ່ຍິງລາວທົ່ວປະເທດ ຄັ້ງທີ IX ຊຶ່ງໄດ້ຮັບຮອງເອົາເນື້ອໃນສໍາຄັນ ແລະ ບັນດາເອກະສານຕ່າງໆທີ່ສຳຄັນ ເປັນຕົ້ນ ຮັບຮອງເອົາລາຍງານການເມືອງ ທັງສອງພາກ ພ້ອມທັງກໍານົດທິດທາງ, ຄາດໝາຍສູ້ຊົນ 5 ປີ (2026-2030); ຮັບຮອງເອົາວິໄສທັດຮອດປີ 2035, ແຜນພັດທະນາແມ່ຍິງລາວ 5 ປີ (2026-2030) ຊຶ່ງມີ 9 ເປົ້າໝາຍ, 31 ແຜນວຽກຈຸດສຸມ ແລະ 144 ວຽກຈຸດສຸມ, ທັງໄດ້ຮັບຮອງເອົາກົດລະບຽບຂອງສະຫະພັນແມ່ຍິງລາວ ສະໄໝທີ IX; ຄໍາຂວັນ ແລະ ຂໍ້ແຂ່ງຂັນ ຂອງສະຫະພັນແມ່ຍິງລາວ ສະໄໝ IX; ສືບຕໍ່ຮັກສາ ແລະ ປະຕິບັດ: ຄໍາຂວັນ: “ພັດທະນາຄວາມສະເໝີພາບຍິງ-ຊາຍ ຕິດພັນກັບການພັດທະນາປະເທດຊາດ” ແລະ ຂໍ້ແຂ່ງຂັນ 3 ດີຄື: “ພົນລະເມືອງດີ, ພັດທະນາດີ ແລະ ສ້າງຄອບຄົວດີ”. ພ້ອມນັ້ນ, ທ່ານຍັງໄດ້ເນັ້ນໃຫ້ຄະນະສະຫະພັນແມ່ຍິງ ທຫລ ນໍາເອົາເນື້ອໃນຂອງມະຕິກອງປະຊຸມດັ່ງກ່າວມາຜັນຂະຫຍາຍເຂົ້າສູ່ວຽກງານຕົວຈິງ ແລະ ນຳພາຈັດຕັ້ງປະຕິບັດໃຫ້ປະສົບຜົນສຳເລັດຢ່າງມີຄຸນນະພາບ ແລະ ປະກົດຜົນເປັນຈິງ, ເອົາໃຈໃສ່ສຶກສາອົບຮົມການເມືອງ-ແນວຄິດໃຫ້ກັບພະນັກງານ, ຊຸກຍູ້ເອື້ອຍນ້ອງແມ່ຍິງໃຫ້ເຂົ້າເຖິງຂໍ້ມູນຂ່າວສານໃນຍຸກດີຈີຕອນ (AI), ສືບຕໍ່ເອົາໃຈໃສ່ພັດທະນາຍົກລະດັບຄວາມຮູ້ຮອບດ້ານໃຫ້ເອື້ອຍນ້ອງແມ່ຍິງໃຫ້ດີຂຶ້ນເທື່ອລະກ້າວ.
 |
ໂອກາດນີ້, ທ່ານ ນາງ ວັດທະນາ ດາລາລອຍ ໄດ້ມີຄຳເຫັນໂອ້ລົມຕໍ່ພິທີ ຊຶ່ງທ່ານໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານດີເດັ່ນທີ່ຍາດມາໄດ້ ຂອງສະຫະພັນແມ່ຍິງ ທຫລ ແລະ ເນັ້ນໜັກໃຫ້ຄະນະບໍລິຫານງານ ສະຫະພັນແມ່ຍິງ ທຫລ ແລະ ຜູ້ເຂົ້າຮ່ວມ ເພີ່ມທະວີການສຶກສາອົບຮົມການເມືອງ-ແນວຄິດ ໃຫ້ຖັນແຖວສະມາ ຊິກແມ່ຍິງພາກສ່ວນຕົນ, ສືບຕໍ່ຄົ້ນຄວ້າເຊື່ອມຊຶມບັນດາມະຕິ, ຄຳສັ່ງ, ແນວທາງນະໂຍບາຍຕ່າງໆຂອງພັກ ຂອງລັດ, ລະບຽບກົດໝາຍຕ່າງໆ ເພື່ອສ້າງເງື່ອນໄຂໃຫ້ເອື້ອຍນ້ອງແມ່ຍິງ ສາມາດຍົກລະດັບຕົນເອງໃຫ້ຢູ່ໃນຂັ້ນຄະນະນຳ, ເພີ່ມທະວີການເຕົ້າໂຮມຄວາມສາມັກຄີພາຍໃນ ແລະ ພາຍນອກ, ເອົາໃຈໃສ່ປະຕິບັດວຽກງານຂອງຕົນ ໂດຍສະເພາະການໃຫ້ບໍລິການຕໍ່ມວນຊົນທົ່ວໄປໃຫ້ເຂົ້າເຖິງຂໍ້ມູນຂ່າວສານທີ່ແທ້ຈິງ.
ຂ່າວ: ສສຍລ
ຄໍາເຫັນ