 |
ສະຫາຍ ນາງ ແກ້ວ ຈັນທະວີໄຊ ໄດ້ຍົກໃຫ້ເຫັນການກໍາເນີດວັນທີ 8 ມີນາ, ຊຶ່ງທຸກໆປີເອື້ອຍນ້ອງແມ່ຍິງໄດ້ພາກັນສະເຫຼີມສະຫຼອງວັນສຳຄັນດັ່ງກ່າວ ຕິດພັນກັບປະຫວັດສາດຂອງໂລກ ບໍ່ພຽງແຕ່ປະຊາຊົນລາວ ກໍຄືແມ່ຍິງລາວເທົ່ານັ້ນ ຍັງໄດ້ຕິດພັນກັບຂະບວນການກົດຂີ່ຂູດຮີດຂອງພວກຈັກະພັດ. ພາຍຫຼັງປ່ຽນຈາກລະບອບສັກດີນາ ມາເປັນລະບອບນາຍທຶນ ພວກມັນຍິ່ງກົດຂີ່ຂູດຮີດແຮງງານຂອງແມ່ຍິງ ເພື່ອສ້າງຮັ່ງຄູນມີໃຫ້ພວກເຂົາ, ພວກນາຍທຶນໃຊ້ແຮງງານແມ່ຍິງໄປເປັນກໍາມະກອນຢູ່ຕາມໂຮງຈັກ-ໂຮງງານເປັນຂ້າທາດ, ເປັນນາງບໍາເລີໃຫ້ພວກເຂົາ ໂດຍບໍ່ຄໍານຶງເຖິງຊີວິດການເປັນຢູ່ຂອງແມ່ຍິງເຫຼົ່ານັ້ນ. ຈາກເຫດການດັ່ງກ່າວ, ແມ່ຍິງຈຶ່ງເພີ່ມຄວາມເຈັບແຄ້ນເປັນທະວີຄູນ ຕໍ່ພວກນາຍທຶນທີ່ກົດຂີ່ຂູດຮີດແຮງງານ ຈຶ່ງພາກັນລຸກຮື້ຂຶ້ນຕໍ່ສູ້ ທວງເອົາສິດ ແລະ ເອກະລາດຄືນມາ ຍ້ອນແນວນັ້ນໃນໂຮງຈັກ-ໂຮງງານຂອງສະຫະລັດອາເມຣິກາ ຈຶ່ງໄດ້ຢຸດການເຮັດວຽກ ເພື່ອທວງໃຫ້ນາຍທຶນ ຕ້ອງໄຊ້ຄ່າແຮງງານຢ່າງເໝາະສົມ, ແຕ່ການຕໍ່ສູ້ດັ່ງກ່າວກໍບໍ່ໄດ້ຮັບໄຊຊະນະ, ແຕ່ມັນໄດ້ສ່ອງແສງເຖິງກະແສຟອງຂອງຄວາມຄຽດແຄ້ນໄປທົ່ວໂລກ, ໂດຍສະເພາະ ແມ່ນແມ່ຍິງຢູ່ທະວີບອາເມຣິກາ ແລະ ທະວີບເອີຣົບ ໄດ້ທວງເອົາເວລາເຮັດວຽກມື້ໜຶ່ງ 8 ຊົ່ວໂມງ, ທວງເອົາການຮັບປະກັນສິດທິພື້ນຖານດ້ານສະຫວັດດີການສັງຄົມ, ການເບິ່ງແຍງໃນເວລາເຈັບ-ປ່ວຍ, ການອອກລູກ ແລະ ທວງເອົາສິດອື່ນໆ.
 |
ພາຍຫຼັງໄດ້ຮັບຮອງເອົາວັນທີ 8 ເດືອນ 3 ເປັນວັນແມ່ຍິງສາກົນ ນັບແຕ່ນັ້ນມາຈົນເຖິງປັດຈຸບັນ ແມ່ນຄົບຮອບ 116 ປີ, ການສະເຫຼີມສະຫຼອງແຕ່ລະປີ ເປັນການລະນຶກເຖິງແມ່ຍິງ ທີ່ໄດ້ເສຍສະຫຼະຊີວິດຕົນເອງເພື່ອຊາວກໍາມະກອນໃນທົ່ວໂລກ ຊຶ່ງບໍ່ພຽງແຕ່ເອື້ອຍນ້ອງແມ່ຍິງເທົ່ານັ້ນ ແຕ່ຍັງລວມເຖິງກໍາມະກອນທີ່ເປັນເພດຊາຍ ກໍໄດ້ຮັບຜົນປະໂຫຍດເຊັ່ນກັນ. ຈາກນັ້ນໃນແຕ່ລະປີ ກໍໄດ້ຈັດກອງປະຊຸມຕ່າງໆ ເພື່ອປຶກສາຫາລືກ່ຽວກັບວຽກງານແມ່ຍິງເປັນອັນສະເພາະ ແລະ ໄດ້ວາງຄໍາຂັວນ ເພື່ອສູ້ຊົນຈັດຕັ້ງປະຕິບັດໃຫ້ສໍາເລັດ ເປັນຕົ້ນ ສົນທິສັນຍາແມ່ຍິງ ແລະ ເດັກນ້ອຍ, ການຕ້ານການໃຊ້ຄວາມຮຸນແຮງຕໍ່ແມ່ຍິງ ແລະ ເດັກຍິງ ແລະ ອື່ນໆ ໃນທົ່ວໂລກ ໄດ້ມີຄະນະກໍາມະການສາກົນທີ່ເວົ້າເລື່ອງວຽກແມ່ຍິງ.
ສໍາລັບ ສປປ ລາວ ພັກ, ລັດ ຍາມໃດກໍໃຫ້ຄວາມສໍາຄັນຕໍ່ວຽກງານຂອງແມ່ຍິງ-ເດັກນ້ອຍ, ໃຫ້ສິດສະເໝີພາບລະຫວ່າງຍິງ-ຊາຍ ທັງໄດ້ຍົກບົດບາດຂອງແມ່ຍິງສູ່ລະດັບສູງ, ມີຄະນະກໍາມາທິການແຫ່ງຊາດ ເພື່ອຄວາມກ້າວໜ້າຂອງແມ່ຍິງ ແລະ ເດັກນ້ອຍ, ແຕ່ລະໄລຍະໄດ້ວາງທິດທາງນໍາພາແມ່ຍິງໄດ້ມີການເຄື່ອນໄຫວ, ຊຶ່ງຄໍາຂວັນ ວັນແມ່ຍິງສາກົນປີ 2026 ຄົບຮອບ 116 ປີ ພາຍໃຕ້ຄໍາຂວັນ: “ສິດທິ, ຄວາມຍຸຕິທໍາ, ການລົງມືປະຕິບັດເພື່ອແມ່ຍິງ ແລະ ເດັກຍິງທຸກຄົນ”,. ນັບຕັ້ງແຕ່ມີພັກນໍາພາ ພັກໄດ້ວາງແນວທາງ, ກໍານົດແຕ່ຫົວທີ ຖ້າຢ້ອນໄປເບິ່ງໂຄງການ ການເມືອງ 12 ຂໍ້ ຂອງພັກ ກໍໄດ້ມີໂຄງການ ການເມືອງໜຶ່ງທີ່ເວົ້າເຖິງຄວາມສະເໝີພາບ ຈຶ່ງເຮັດໃຫ້ແມ່ຍິງດໍາລົງຊີວິດພາຍໃຕ້ພັກນໍາພາ ຊີວິດການເປັນຢູ່ນັບມື້ໄດ້ຮັບການປັບປຸງດີຂຶ້ນເປັນກ້າວໆ, ແມ່ຍິງໄດ້ມີສິດ ແລະ ປະກອບສ່ວນໃນທຸກຂົງເຂດວຽກງານ ເປັນຕົ້ນ ດ້ານການເມືອງ, ການທະຫານ, ດ້ານເສດຖະກິດ-ສັງຄົມ ນັບມື້ໄດ້ປະກອບສ່ວນຢ່າງເຕັມສ່ວນ.
 |
ທ່ານ ນາງ ມອນທອງ ອິນທະວົງ ຍັງໄດ້ເຜີຍແຜ່ມະຕິກອງປະຊຸມໃຫຍ່ຜູ້ແທນແມ່ຍິງລາວທົ່ວປະເທດ ຄັ້ງທີ IX, ເຜີຍແຜ່ກົດລະບຽບຂອງສະຫະພັນແມ່ຍິງລາວ ຄັ້ງທີ IX, ຂໍ້ຕົກລົງວ່າດ້ວຍການແຕ່ງຕັ້ງຄະນະກໍາມາທິການເພື່ອຄວາມກ້າວໜ້າຂອງແມ່ຍິງ, ແມ່ ແລະ ເດັກ ຮສສ.
ໃນພິທີໄດ້ມີກິດຈະກຳຖາມ-ຕອບ ແລະ ທ່ຽວຊົມຮ້ານວາງສະແດງຜະລິດຕະພັນ, ອາຫານຂອງເອື້ອຍນ້ອງໜ່ວຍແມ່ຍິງກະຊວງ ຮສສ ຕື່ມອີກ. (ຂ່າວສານຮສສ)
ຄໍາເຫັນ