ພ້ອມດ້ວຍ ຮອງຫົວໜ້າຫ້ອງວ່າການສູນກາງພັກ ຮອງຫົວໜ້າຫ້ອງວ່າການສຳນັກນັກງານປະທານປະເທດ ພ້ອມດ້ວຍຄະນະ ໄດ້ຢ້ຽມຢາມ, ເລາະຊົມ ງານບຸນນະມັດສະການພະທາດຫຼວງວຽງຈັນໃນວັນທີ 14 ພະຈິກນີ້; ໂດຍການຕ້ອນຮັບຂອງທ່ານ ພູວົງ ວົງຄຳຊາວ ຮອງເຈົ້າຄອງນະຄອນຫຼວງວຽງຈັນ, ທ່ານ ນາງ ວຽງພອນ ແກ້ວຄູນສີ ຫົວໜ້າພະແນກຖະແຫຼງຂ່າວ, ວັດທະນະທໍາ ແລະ ທ່ອງ ທ່ຽວນະຄອນຫຼວງວຽງຈັນ ແລະ ພາກສ່ວນກ່ຽວຂ້ອງໄດ້ກ່າວລາຍງານວ່າ: ງານບຸນນະມັດສະການພະທາດຫຼວງວຽງຈັນ ແລະ ງານວາງສະແດງສິນຄ້າ ປະຈຳປີ 2024 ໄດ້ມີຮ້ານວາງສະແດງສິນຄ້າຢູ່ເດີ່ນສະໜາມຫຼວງ 1,463 ຫ້ອງ, ຢູ່ສູນການຄ້າ ລາວ-ໄອເຕັກ 142 ຮ້ານ. ສິນຄ້າສ່ວນຫຼາຍຈະເປັນຜະລິດຕະພັນພາຍໃນເຊັ່ນ: ຜະລິດຕະພັນສິນຄ້າກະສິກຳ, ຫັດຖະກຳ ແລະ ຜະລິດຕະພັນວັດທະນະທຳ, ຜະລິດຕະພັນອຸດສາຫະກຳໂຮງຈັກ, ໂຮງງານຂະໜາດໃຫຍ່, ກາງ ແລະ ຂະໜາດນ້ອຍ. ພ້ອມນີ້, ຍັງໄດ້ເຊີນບັນດານະຄອນເພື່ອນມິດຕ່າງປະເທດ ເຂົ້າມາຮ່ວມງານ ແລະ ສ້າງເງື່ອນໄຂໃຫ້ມີການນຳເອົາຜະລິດຕະພັນສິນຄ້າມາແລກປ່ຽນວາງສະແດງ ແລະ ຂາຍໃນງານ ຊຶ່ງມີ 2 ນະຄອນເຂົ້າຮ່ວມຄື: ແຂວງຢຸນນານ ສປ ຈີນ ແລະ ແຂວງໜອງຄາຍ ປະເທດໄທ. ພາຍໃນງານບຸນນະມັດສະການພະທາດຫຼວງ ປີນີ້, ໄດ້ຈັດໃຫ້ມີຫຼາກຫຼາຍກິດຈະກຳ ທີ່ໜ້າທ່ຽວຊົມ ເປັນຕົ້ນ ເຮືອນຊົງລາວ, ຮ້ານວາງສະແດງສິນຄ້າ ເຄື່ອງອຸປະໂພກ, ບໍລິໂພກ, ມີອາຫານພື້ນບ້ານ ປະເພດເຂົ້າຫຼາມ, ປີ້ງໄກ່, ອາຫານລາວ. ນອກຈາກນີ້, ຍັງມີການສະແດງສິລະປະວັນນະຄະດີ (ເວທີກາງ) ການສະແດງການຟ້ອນ, ຂັບລຳ ຈາກກອງສິລະປະກອນສູນກາງ, ສິລະປະກອນກອງທັບ, ສິລະປະຈາກບັນດາເມືອງ, ສູນວັດທະນະທຳເດັກ ແລະ ສະໂມສອນດ່ານຊ້າງ ເຂົ້າຮ່ວມການສະແດງໃນແຕ່ລະມື້. ທັງນີ້, ແນໃສ່ເພື່ອເປັນການສົ່ງເສີມວັດທະນະທຳ ຮີດຄອງປະເພນີອັນດີງາມຂອງຊາດ ໃຫ້ຄົງຢູ່ຄູ່ກັບຄົນລາວ ແລະ ຊາດລາວຕະຫຼອດໄປ, ທັງເປັນການຊຸກຍູ້ສົ່ງເສີມການທ່ອງທ່ຽວ ທາງດ້ານວັດທະນະທຳ ແລະ ປະຫວັດສາດຂອງຊາດ.
ທ່ານ ພູວົງ ວົງຄຳຊາວ ກ່າວຕື່ມວ່າ: ງານບຸນນະມັດສະການພະທາດຫຼວງ ເປັນປາງບຸນປະເພນີໃຫຍ່ສຳຄັນ, ເປັນສູນກາງເຕົ້າໂຮມຄວາມສາມັກຄີຂອງປວງຊົນລາວບັນດາເຜົ່າ ເຊີນຊວນປະຊາຊົນລາວບັນດາເຜົ່າ ແລະ ນັກທ່ອງທ່ຽວ ທັງພາຍໃນ ແລະ ຕ່າງປະເທດ ເຂົ້າຮ່ວມທ່ຽວຊົມງານບຸນ ແລະ ເຂົ້າຮ່ວມກິດຈະກຳຕ່າງໆ ດ້ວຍຄວາມເບີກບານມ່ວນຊື່ນ, ປະຕິບັດຕາມຮີດຄອງປະເພນີອັນດີງາມຂອງຊາດລາວເຮົາ ແລະ ປະຕິບັດຕາມກົດລະບຽບຂອງງານ ຢ່າງເຂັ້ມງວດ ເພື່ອເຮັດໃຫ້ງານບຸນໃນຄັ້ງນີ້, ດຳເນີນໄປດ້ວຍບັນຍາກາດອັນຄຶກຄື້ນ ຮັກສາໄດ້ຄວາມສະຫງົບ, ປອດໄພ.
(ຂາວ-ພາບ: ວິວັດ ພົມມະຈັນ)
ຄໍາເຫັນ