 |
ກອງປະຊຸມ, ໄດ້ຜ່ານຮ່າງໂຄງການດຳເນີນງານຂອງກຳມະການປົກຄອງແຂວງສາລະວັນ 5 ປີ ຄັ້ງທີ XI (2026-2030), ຮ່າງຂໍ້ຕົກລົງວ່າດ້ວຍການແບ່ງວຽກຊີ້ນໍາລະຫວ່າງປະທານ-ຮອງປະທານຄະນະກຳມະການປົກຄອງແຂວງ, ຮ່າງຂໍ້ຕົກລົງວ່າດ້ວຍການປະສານງານລະຫວ່າງຫ້ອງວ່າການແຂວງ ກັບ ຄະນະເລຂາທິການສະພາປະຊາຊົນແຂວງ, ບັນດາພະແນກການຂອງແຂວງ, ອົງການລັດທຽບເທົ່າຂັ້ນແຂວງ, ອົງການປົກຄອງເມືອງ ແລະ ອົງການຈັດຕັ້ງມະຫາຊົນ, ຮ່າງນິຕິກຳໃຕ້ກົດໝາຍ 5 ປີ. ພ້ອມນັ້ນ ບັນດາຜູ້ເຂົ້າຮ່ວມ ກໍໄດ້ຄົ້ນຄວ້າ, ປຶກສາຫາລື, ປະກອບຄໍາຄິດ ຄໍາເຫັນກ່ຽວກັບຮ່າງນິຕິກຳຕ່າງໆ ເພື່ອໃຫ້ມີເນື້ອໃນຄົບຖ້ວນ, ຖືກຕ້ອງ, ສອດຄ່ອງ. ທັງນີ້ ກໍເພື່ອຜັນຂະຫຍາຍມະຕິກອງປະຊຸມໃຫຍ່ຜູ້ແທນອົງຄະນະພັກແຂວງສາລະວັນ ຄັ້ງທີ X, ແຜນພັດທະນາ ເສດຖະກິດ-ສັງຄົມ 5 ປີ ແລະ ແຜນງົບປະມານແຫ່ງລັດ ແຕ່ປີ 2026-2030 ໃຫ້ບັນລຸຕາມຈຸດປະສົງລະດັບຄາດໝາຍ ທີ່ວາງໄວ້ ເຮັດໃຫ້ບົດບາດຂອງອົງການປົກຄອງແຂວງ ໄດ້ຮັບການຍົກລະດັບໃຫ້ສູງຂຶ້ນ, ເຮັດໃຫ້ການເຄື່ອນໄຫວຂອງອົງການປົກຄອງແຂວງ ມີຄວາມເຂັ້ມແຂງ ແລະ ມີແບບແຜນໃນການປະຕິບັດ ພາລະບົດບາດ, ໜ້າທີ່ຄວາມຮັບຜິດຊອບ ໃນແຕ່ລະໄລຍະໃຫ້ມີປະສິດທິຜົນສູງ. ຮັບປະກັນວຽກງານ ການຄຸ້ມຄອງລັດ - ຄຸ້ມຄອງສັງຄົມ ໃຫ້ຖືກຕ້ອງ ແລະ ສອດຄ່ອງກັບເນື້ອໃນແນວທາງນະໂຍບາຍຂອງພັກ-ລັດ ແລະ ຫັນເຂົ້າສູ່ລະບຽບກົດໝາຍຢ່າງເຂັ້ມງວດ, ເຮັດໃຫ້ການຕິດຕາມ - ກວດກາ, ການສະຫຼຸບ-ລາຍງານວຽກງານອົງການປົກຄອງແຂວງ ທີ່ວາງອອກແຕ່ລະຄັ້ງ, ສາມາດສະຫຼຸບໄດ້ດ້ານຕັ້ງໜ້າ, ຈຸດອ່ອນ-ຂໍ້ຄົງຄ້າງ ແລະ ບົດຮຽນທີ່ຖອດຖອນໄດ້ ເພື່ອນໍາໄປປັບປຸງແກ້ໄຂຢ່າງຖືກຕ້ອງຕາມພາວະຄວາມເປັນຈິງ. ເພື່ອເຮັດໃຫ້ການຈັດຕັ້ງປະຕິບັດພາລະບົດບາດ, ໜ້າທີ່ ແລະ ຂອບເຂດສິດຂອງແຕ່ລະອົງການຈັດຕັ້ງ, ໃຫ້ມີຄວາມເຂັ້ມແຂງ, ວ່ອງໄວ, ໂປ່ງໃສ, ຖືກຕ້ອງ, ສອດຄ່ອງ, ກົມກຽວ ແລະ ມີປະສິດທິຜົນສູງ.
(ພາບ-ຂ່າວ: ທິດລານີ ໂຄດໂຍທາ)
ຄໍາເຫັນ