ສາລະວັນ ສະຫຼອງຫໍໄຫວ້ຮູບເໝືອນຍາທ່ານ ຫຼັກຄຳ ຄຳບາງ ລ້ານທະລັງສີ 

ພິທີສະເຫຼີມສະຫຼອງຫໍໄຫວ້ຮູບເໝືອນ ຂອງຍາທ່ານ ຫຼັກຄຳ ຄຳບາງ ລ້ານທະລັງສີ ອະດີດປະທານ ອພສ ແຂວງສາລະວັນ ໄດ້ຈັດຂຶ້ນໃນທ້າຍອາທິດຜ່ານມາ, ໄດ້ຮັບຄວາມເມດຕາເຂົ້າຮ່ວມຂອງພະອາຈານໃຫຍ່ ມະຫາສຸວັນ ຈັນທະລາດ ຄະນະບໍລິຫານງານປະຈຳການສູນກາງ ອພສ ອົງຊ່ວຍປະທານ ສູນກາງ ອພສ ຮັບຜິດຊອບບັນດາເເຂວງພາກໃຕ້ ປະທານ ອພສ ແຂວງຈຳປາສັກ, ພະອາຈານ ສອນໄຊ ແກ້ວເມືອງໄຕ້ ກຳມະການ ອພສ ສູນກາງ ປະທານ ອພສ ແຂວງສາລະວັນ, ມີບັນດາພະອາຈານໃນຄະນະປະຈຳ ອພສ ແຂວງສາລະວັນ, ແຂວງຈຳປາສັກ, ອອກຕົນຍາດໂຍມ ເຈົ້າສັດທາສານຸສິດເຂົ້າຮວ່ມ.
 ການສະເຫຼີມສະຫຼອງຫໍໄຫວ້ຮູບເໝືອນຄັ້ງນີ້, ໄດ້ເລີ່ມຈາກກິດຈະຂະບວນແຫ່ ຂອງກຸ່ມມະໂຫລີພື້ນເມືອງ ບ້ານນາຂ້ວາງ, ບ້ານພັດທະນາຫົວແຊ ທີ່ມາຈາກແຂວງຈຳປາສັກ, ກຸ່ມສິລະປະຈາກໂຮງຮງນບ້ານໜອງໃສເມືອງ ແລະ ແຂວງສາລະວັນ ແຫ່ຟ້ອນເປັນຂະບວນ ທີ່ຍີ່ງໃຫຍ່ຄຶກຄື້ນ ຕາມສາຍທາງເລກທີ 15 ແລະ ເຂົ້າສູ່ວັດສີດາຈັນ ບ້ານໜອງໃສ.
        ພະອາຈານ ແຂກ ບົວບານ ເຈົ້າອະທິການວັດສົມສະອາດ ບ້ານພັດທະນາຫົວແຊ ເມືອງບາຈຽງຈະເລີນສຸກ ແຂວງຈຳປາສັກ, ໃນນາມສານຸສິດ, ສັດທາ ທັງແມ່ນຜູ້ນຳພາສ້າງຫໍໄຫວ້ຮູບເໝືອນ ຂອງຍາທ່ານ ຫຼັກຄຳ ຄຳບາງ ລ້ານທະລັງສີ ໄດ້ກ່າວຈຸດປະສົງ ແລະ ໄລຍະຂອງການກໍ່ສ້າງ, ກໍເພື່ອເປັນການສະແດງຄວາມກະຕັນຍູ້ຮູ້ບຸນຄຸນ, ເຖິງຄູບານອາຈານທີ່ໄດ້ສິດສອນຊີ້ທິດເຍື່ອງທາງໃນໄລຍະຜ່ານມາໃນຂົງເຂດວຽກງານ ພຸດທະສາສະຫນາກໍຄືໄດ້ຮັບຄາມເມດຕາຈາກຄະນະ ອພສ ແຂວງສາລະວັນ. 
ການກໍ່ສ້າງໄດ້ເລີມໃນເດືອນນ ເມສາ ປີ 2019 ແລະ ສຳເລັດໃນເດືອນ ມີນາ 2024 ໂດຍມີມູນຄ່າການກໍ່ສ້າງແມ່ນ 320.324.000 ກີບ, ປະກອບມີສ້າງຮູບເໝືອນຍາທ່ານ 1 ອົງ, ຫຼໍ່ພະພຸດທະຮູບສ້າງດວ້ຍທອງສຳລິດ, ສ້າງພະພຸດທະຮູບດວ້ຍປູນ 3 ອົງ ແລະ ອື່ນໆ. 
ພະອາຈານໃຫຍ່ ມະຫາສຸວັນ ຈັນທະລາດ ຄະນະບໍລິຫານງານປະຈຳການສູນກາງ ອພສ ອົງຊ່ວຍປະທານ ສູນກາງ ອພສ ພ້ອມຄະນະໄດ້ຮ່ວມຕັດແຖບຜ້າ ແລະ ກ່າວມອບຫໍໄຫວ້ດັ່ງກ່າວໃຫ້ອຳນາດການປົກຄອງ ແລະ ປະຊາຊົນບ້ານໜອງໃສ ເປັນຜູ້ປົກປັກຮັກສາ ແລະ ເຄົາລົບບູຊາ ຂອງບ້ານ ແລະ ມອບໃບຍ້ອງຍ້ອງໃຫ້ຜູ້ທີ່ປະກອບສວ່ນທຶນຮອນ ແລະ ປັດໃຈຕ່າງໆເຂົ້າໃນການກໍ່ສ້າງ, ພ້ອມດຽວກັນນັ້ນກໍໄດ້ມີຂະບວນບວນ ແຫ່ກອງເຖລະພິເສກຫົດສົງ ພະອາຈານ ສອນໄຊ ແກ້ວເມືອງໄຕ້ ກຳມະການ ອພສ ສູນກາງ ປະທານ ອພສ ແຂວງສາລະວັນ, ຕາມດວ້ຍການຮັບຟັງທຳມະເທດສະໜາ ແລະ ສົມໂພດພະ.
(ຂ່າວ: ສິດທິໄຊ ແກ້ວທ່ອນຈັນ)