ສາລະວັນ ສຸມໃສ່ເຮັດໜ້າປ້ອງກັນຄວາມສະຫງົບໃນໄລຍະຈັດງານກິລານັກຮຽນ

ທີ່ແຂວງສາລະວັນເປັນເຈົ້າພາບ ໃຫ້ສໍາພາດຕໍ່ສື່ມວນຊົນແຂວງ ໃນວັນທີ 16 ທັນວານີ້ວ່າ: ການຈັດງານມະຫາກຳກິລານັກຮຽນມັດທະຍົມສຶກສາຄັ້ງນີ້ ແມ່ນມີຄວາມສຳຄັນທີ່ສຸດ ຕ້ອງໄດ້ເພີ່ມທະວີໃນການຮັກສາຄວາມສະຫງົບ, ຄວາມປອດໄພ ໂດຍສະເພາະມີນັກກິລາຈາກບັນດາແຂວງໃນທົ່ວປະເທດ ເຂົ້າຮ່ວມເປັນຈໍານວນຫຼວງຫຼາຍ ເພື່ອຮັບປະກັນດ້ານຄວາມສະຫງົບ, ຄວາມປອດໄພ ໃນໄລຍະການຈັດງານແມ່ນໄດ້ສຸມໃສ່ຈັດຕັ້ງປະຕິບັດຢ່າງເຂັ້ມງວດ ຕາມແຜນຍຸດທະສາດ, ຈັດຕັ້ງກຳລັງປ້ອງກັນເວນຍາມໃນແຕ່ລະຈຸດຕ່າງໆທີ່ສຳຄັນ ໄດ້ເລີ່ມປະຕິບັດມາແຕ່ວັນທີ 2 ທັນວາ 2024 ເປັນຕົ້ນມາ, ມີການປະສານສົມທົບກັບບັນດາກຳມະການຕ່າງໆທີ່ກ່ຽວຂ້ອງ, ບັນດາແຂວງໃກ້ຄຽງ, ກະຊວງ ປກຊ-ປກສ ແລະ ໄດ້ນຳເອົາກໍາລັງທັງໝົດ 1,114 ສະຫາຍ ທັງສູນກາງ ແລະ ທ້ອງຖິ່ນ ກະກຽມຄວາມພ້ອມຢ່າງເປັນລະບົບ, ຄົບຊຸດ ເປັນຕົ້ນ: ໄດ້ປະກອບພາຫະນະ, ອຸປະກອນຮັບໃຊ້ໃນດ້ານວິຊາສະເພາະ, ຖືກກັບຫຼັກວິຊາການ ແນໃສ່ຈັດຕັ້ງປະຕິບັດໃຫ້ວ່ອງໄວ, ຮັດກຸມ ແລະ ຮອບດ້ານ. ກໍານົດເອົາ 22 ຈຸດ ໂດຍສະເພາະຈຸດສະຖານທີ່ພັກເຊົາຂອງນັກກິລາ, ສະໜາມກິລາ, ບັນດາເຮືອນພັກ, ໂຮງແຮມ, ສຳນັກງານຫ້ອງການ ແລະ ບັນດາພື້ນຖານໂຄງລ່າງຂອງປະຊາຊົນ, ພິເສດ ໄດ້ສຸມໃສ່ການປ້ອງກັນຄວາມສະຫງົບ ຢູ່ທີ່ສະໜາມເປີດ-ປິດ (ໃນວົງໃນ), ທັງກຳລັງປ້ອງກັນຊາດ-ປ້ອງກັນຄວາມສະຫງົບ ແລະ ນຳໃຊ້ອຸປະກອນວິຊາສະເພາະ ເປັນຕົ້ນ: ເຄື່ອງສະແກນທາດເຫຼັກ, ທາດລະເບີດ, ສະແກນພາຫະນະທຸກຊະນິດ ແລະ ຄົນເຂົ້າ-ອອກ ຢ່າງເປັນລະບົບ, ທັງໄດ້ນຳໃຊ້ກຳລັງວິຊາສະເພາະ, ນຳໃຊ້ໝາ ວິຊາສະເພາະ ເພື່ອນຳສືບຄົ້ນຫາ ແລະ ບັນຫາອາດຊະຍາກຳຕ່າງໆ, ໃນສະຖານທີ່ດັ່ງກ່າວໄດ້ນຳໃຊ້ກຳລັງທັງໝົດ 350 ສະຫາຍ, ມາຮອດປັດຈຸບັນເຫັນວ່າ ມີຄວາມສະຫງົບ ຮັບປະກັນ 100%.
ໃນໂອກາດນີ້, ທ່ານຫົວໜ້າກອງບັນຊາການ ປກສ ແຂວງ ໄດ້ສະແດງຄວາມຊົມເຊີຍຕໍ່ກັບທຸກພາກສ່ວນໃນສັງຄົມ ທີ່ໄດ້ເອົາໃຈໃສ່ໃນການຮັກສາຄວາມສະຫງົບ, ຄວາມເປັນລະບົບຮຽບຮ້ອຍ ແລະ ເປັນເຈົ້າພາບທີ່ດີຮ່ວມກັນ ແລະ ຮຽກຮ້ອງທຸກຊັ້ນຄົນທີ່ໄດ້ມາຮ່ວມງານ, ມາທ່ຽວ ຫຼື ມາຊົມການແຂ່ງຂັນ ຂໍໃຫ້ເອົາໃຈໃສ່ມີສະຕິລະວັງຕົວ ເພື່ອປົກປ້ອງຕົນເອງໃຫ້ມີຄວາມປອດໄພໃນການເດີນທາງໄປ-ມາ ໃຫ້ມີຄວາມປອດໄພ ແລະ ເປັນລະບຽບຮຽບຮ້ອຍ.
(ຂ່າວ-ພາບ: ວິໄລວອນ ສິດທິໄຊ)