 |
ທ່ານ ຈັນເພັງ ສາຍທຳມະວົງ ຫົວໜ້າຫ້ອງວ່າການແຂວງໄດ້ຕີລາຄາຄືນຜົນສຳເລັດໃນການຈັດຕັ້ງປະຕິບັດວຽກງານໃນໄລຍະ 1 ເດືອນຜ່ານມາ ທີ່ໄດ້ເອກະພາບຄົ້ນຄວ້າວາງແຜນປະຕິບັດ 9 ວຽກຫຼັກ. ໃນນີ້, ສາມາດປະຕິບັດແລ້ວ 3 ວຽກເປັນຕົ້ນ: ໄດ້ສຳເລັດແຕ່ງຕັ້ງຄະນະຮັບຜິດຊອບຈັດຕັ້ງປະຕິບັດ ການສ້າງເສດຖະກິດເອກະລາດ ເປັນເຈົ້າຕົນເອງຂັ້ນແຂວງ, ປັບປຸງກົນໄກ, ລະບົບການເຮັດວຽກ ໃຫ້ມີຄວາມເຂັ້ມແຂງ ເຮັດວຽກຕາມພາລະບົດບາດ ເພື່ອເປັນທີ່ປຶກສາ ໃຫ້ນັກທຸກລະກິດ ແລະ ເປັນຜູ້ປົກປ້ອງນັກທຸລະກິດພາຍໃນແຂວງ, ເອົາໃຈໃສ່ ຄຸ້ມຄອງວຽກງານການທ່ອງທ່ຽວ ຕອບຮັບຄວາມຕ້ອງການຂອງສັງຄົມ, ໂດຍໄດ້ຈັດລຽງບູລິມະສິດໃນການພັດທະນາແຕ່ລະຈຸດ ເພື່ອດຶງດູດນັກທ່ອງທ່ຽວເຂົ້າມາແຂວງ ໃຫ້ຫຼາຍຂຶ້ນ. ປັດຈຸບັນ, ເອົາໃຈໃສ່ຕິດຕາມສະຖານທີ່ແຫຼ່ງທ່ອງທ່ຽວຕ່າງໆໃນທົ່ວແຂວງ ເພື່ອຮອງຮັບໃຫ້ແກ່ການສະເຫຼີມສະຫຼອງງານບຸນປີໃໝ່ລາວ ປີ 2026 ແລະ ວຽກຈະສືບຕໍ່ປະຕິບັດ 6 ວຽກຄື: ສືບຕໍ່ສົມທົບກັບເມືອງສາລະວັນ ໃນການຄົ້ນຄວ້າ, ທົບທວນຫັນເປັນໂຄງການ, ໜ້າວຽກອັນລະອຽດ ໃນການກຳນົດແຜນຜັງພັດທະນາຕົວເມືອງສາລະວັນ ເປັນເມືອງໃຈກາງທາງດ້ານເສດຖະກິດ, ວັດທະນະທໍາ ແລະ ການທ່ອງທ່ຽວຂອງແຂວງ, ປະສານສົມທົບກັບພະແນກອຸດສາຫະກຳ ແລະ ການຄ້າແຂວງ ໃນການກະກຽມຈັດກອງປະຊຸມພົບປະນັກທຸລະກິດທີ່ລົງທຶນຢູ່ແຂວງສາລະວັນ ໃນເດືອນມີນາ 2026 ເພື່ອຖອດຖອນບົດຮຽນ ກ່ຽວກັບສະພາບການລົງທຶນ, ຂໍ້ສະດວກ, ຫຍຸ້ງຍາກ ແລະ ວາງທິດທາງ, ສົມທົບກັບບັນດາເມືອງ ວາງແຜນການພັດທະນາແຫຼ່ງທ່ອງທ່ຽວຂອງເມືອງ ຢ່າງໜ້ອຍ ເມືອງໜຶ່ງ ຕ້ອງ ມີ 1-2 ສະຖານທີ່ທ່ອງທ່ຽວ ເພື່ອເກັບກຳຂໍ້ມູນ ແລ້ວສົ່ງໃຫ້ຫ້ອງການຄະນະກຳມະການສົ່ງເສີມ ແລະ ຄຸ້ມຄອງການ ລົງທຶນແຂວງ ເພື່ອໂຄສະນາດຶງດູດນັກລົງທຶນມາພັດທະນາ, ເກັບກຳຂໍ້ມູນຄາດຄະເນຕົວເລກແຮງງານທີ່ໄປ ເຮັດວຽກຢູ່ຕ່າງປະເທດ, ຕົວເລກຕຳຫຼວດ, ທະຫານ ທີ່ປະຈຳຄ້າຍຕ່າງໆ ເຂົ້າຕື່ມໃນຕົວເລກສໍາຫຼວດພົນລະເມືອງ ຄັ້ງທີ V ຂອງແຂວງ. ນອກນັ້ນ, ແຜນວຽກຈຸດສຸດເດືອນ ມີນາ 2026 ມີທັງໝົດ 6 ວຽກ, ປະຕິບັດສໍາເລັດ 3 ວຽກ ເປັນຕົ້ນ: ຄົ້ນຄ້ວາ ແລະ ນໍາສະເໜີຫົວຂໍ້ ທີ່ຈຳເປັນ ເຂົ້າພິຈາລະນາໃນກອງປະຊຸມປະຈຳເດືອນ ເຊັ່ນ: ວຽກຄຸ້ມຄອງການສົ່ງອອກມັນຕົ້ນດິບ, ການຂົນສົ່ງສິນຄ້າເຂົ້າ-ອອກຜ່ານ ທ່າແກ້ງຄອງຫຼວງ, ວຽກງານສັກຢາ-ຢອດຢາ, ຊຸກຍູ້ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນງົບປະມານ ງວດທີ 1 ປະຈຳປີ 2026. ທັງໄດ້ສົມທົບກັບເມືອງລະຄອນເພັງ ລົງສໍາຫຼວດຜົນກະທົບ ສິ່ງແວດລ້ອມເບື້ອງຕົ້ນຂອງໂຄງການກໍ່ສ້າງຂົວຂ້າມແມ່ນໍ້າຂອງແຫ່ງທີ 6 ເພື່ອລາຍງານກະຊວງກະສິກຳ ແລະ ສິ່ງແວດລ້ອມ, ຕິດຕາມການຈັດຕັ້ງປະຕິບັດໂຄງການກໍ່ສ້າງຂົວຂ້າມນໍ້າເຊໂດນ ບ້ານບົວລະພາ ເມືອງຄົງເຊໂດນ ຕາມໜ້າວຽກຕ່າງໆໃຫ້ສຳເລັດຕາມແຜນການທີ່ວາງໄວ້. ຈາກນັ້ນ, ຜູ້ເຂົ້າຮ່ວມ ກໍໄດ້ພ້ອມກັນຄົ້ນຄວ້າ, ແລກປ່ຽນວຽກງານທີ່ເຄັ່ງຮ້ອນໃນປັດຈຸບັນ ແລະ ຊອກວິທີທາງແກ້ໄຂພາຍໃນແຂວງສາລະວັນ ເປັນຕົ້ນ: ລາຍງານສະພາບຜົນກະທົບ ແລະ ມາດຕະການ ໃນ ການຄຸ້ມຄອງລາຄາ ແລະ ການສະໜອງນໍ້າມັນເຊື້ອໄຟ ແລະ ສິນຄ້າອື່ນໆ ພາຍໃນແຂວງ ທີ່ຖືກຜົນກະທົບ ຈາກສະພາບລາຄານໍ້າມັນຕະຫຼາດໂລກ. ລາຍງານຜົນການກວດກາການເງິນ ຢູ່ຫ້ອງການການເງິນເມືອງຄົງເຊໂດນ, ເມືອງເລົ່າງາມ, ລະຄອນເພັງ ແລະ ເມືອງວາປີ, ການຈັດຕັ້ງປະຕິບັດແຜນພັດທະນາເສດຖະ ກິດ-ສັງຄົມ ແລະ ແຜນງົບປະມານ ງວດ 1, ທິດທາງຈຸດສຸມງວດ 2 ແລະ ແຜນການ 9 ເດືອນ 2026, ການຈັດຕັ້ງປະຕິບັດວຽກງານຄຸ້ມຄອງຄົນຕ່າງປະເທດ ທີ່ເຂົ້າມາດໍາລົງຊີວິດ ແລະ ເຮັດວຽກຢູ່ ແຂວງສາລະວັນ, ການຈັດຕັ້ງປະຕິບັດວຽກງານສັກຢາ-ຢອດຢາ ກັນພະຍາດ, ກອງທຶນຢາໝູນວຽນ, ວຽກແກ້ໄຂພະນັກງານແພດ-ໝໍ ອາສາສະໝັກ ແລະ ປັບປຸງພື້ນຖານໂຄງລ່າງໂຮງໝໍຂອງແຂວງ, ສະພາບການຂົນສົ່ງສິນຄ້າເຂົ້າ-ອອກ ຜ່ານທ່າຄອງຫຼວງ ແລະ ທິດທາງແກ້ໄຂໃນການຫັນ ການຂົນສົ່ງສິນຄ້າ ມາເຂົ້າ-ອອກຜ່ານທ່າດ່ານສາກົນ ປາກຕາພານ ເພື່ອເຮັດໃຫ້ການຈັດຕັ້ງປະຕິບັດແຕ່ລະວຽກງານມີຜົນສຳເລັດເປັນກ້າວໆ.
(ຂ່າວ-ພາບ: ວິໄລວອນ ສິດທິໄຊ)
ຄໍາເຫັນ