ກໍາມະການສູນກາງພັກ ເລຂາຄະນະບໍລິຫານງານພັກແຂວງ ເຈົ້າແຂວງສາລະວັນ, ມີຮອງເລຂາພັກແຂວງ, ຄະນະປະຈໍາພັກແຂວງ, ກໍາມະການພັກແຂວງ, ເລຂາພັກເມືອງ-ເຈົ້າເມືອງ, ກອງກໍ່ສ້າງຮາກຖານການເມືອງຂັ້ນແຂວງ ປະຈຳ 8 ເມືອງ ແລະ ຄະນະພັກຮາກຖານອ້ອມຂ້າງເຂົ້າຮ່ວມ.
ໂອກາດນີ້, ສະຫາຍ ດາວວົງ ພອນແກ້ວ ໄດ້ຍົກໃຫ້ເຫັນວ່າ: ໂດຍປະຕິບັດຕາມລະບຽບຂອງພັກປະຊາຊົນປະຕິວັດລາວ ສະໄໝທີ XI ແລະ ໂຄງການດໍາເນີນງານຂອງຄະນະບໍລິຫານງານພັກແຂວງ ສະໄໝທີ IX, ທີ່ໄດ້ພ້ອມກັນຕີລາຄາໃນການໍາພາ-ຊີ້ນຳວຽກງານໃນແຕ່ລະຂົງເຂດ, ສະແດງໃຫ້ເຫັນດ້ານຕັ້ງໜ້າ, ຂໍ້ຄົງຄ້າງໃນໄລຍະຜ່ານມາ ເພື່ອໃຫ້ມີເນື້ອໃນເລີກເຊີ່ງ ສາມາດຕອບສະໜອງໃຫ້ແກ່ການຈັດຕັ້ງປະຕິບັດຢ່າງເປັນຮູບປະທຳຫຼາຍຂຶ້ນກວ່າເກົ່າ ແລະ ຄັດຈ້ອນເອົາແຕ່ບັນຫາທີ່ສໍາຄັນ, ອັນຮີບດ່ວນ ເຂົ້າມາຄົ້ນຄວ້າປຶກສາຫາລື ຢ່າງລະອຽດຖີ່ຖ້ວນ ແລະ ຮອງຮັບໃຫ້ແກ່ການຄົ້ນຄວ້າໃນກອງປະຊຸມອົງການປົກຄອງແຂວງ ຕື່ມອີກ. ພ້ອມນັ້ນ, ສະຫາຍໄດ້ຮຽກຮ້ອງໃຫ້ບັນດາຄະນະບໍລິຫານງານພັກແຂວງ, ຄະນະພັກຮາກຖານ ທີ່ກ່ຽວຂ້ອງ ຈົ່ງເຊີດຊູຄວາມຮັບຜິດຊອບຂອງຕົນ ເຂົ້າໃນການຄົ້ນຄວ້າໃຫ້ທັດສະນະທີ່ເປັນທາງອອກ ແລະ ວິທີແກ້ໄຂບັນຫາສິ່ງທີ່ຍັງອຸດຕັນກົນໄກການຈັດຕັ້ງປະຕິບັດໜ້າທີ່ວຽກງານໃນຕໍ່ໜ້າ ຢ່າງມີປະສິດທິພາບ.
ສະຫາຍ ນາງ ບຸນທະວີ ດວງລາສີ ຮອງເລຂາພັກແຂວງ ຜູ້ຊີ້ນຳວຽກງານການເມືອງ-ແນວຄິດ, ວຽກພັກ-ພະນັກງານ ໄດ້ຜ່ານຮ່າງບົດສະຫຼຸບຕີລາຄາການນໍາພາ-ຊີ້ນໍາວຽກງານຮອບດ້ານຂອງຄະນະບໍລິຫານງານພັກແຂວງ ໄລຍະ 9 ເດືອນ ແລະ ທິດທາງແຜນການ 3 ເດືອນທ້າຍປີ 2024, ໂດຍຍົກໃຫ້ເຫັນວ່າ: ການປະຕິບັດແນວທາງປ້ອງກັນຊາດ-ປ້ອງກັນຄວາມສະຫງົບ, ຖືເອົາວຽກງານກໍ່ສ້າງຮາກຖານການເມືອງ ເປັນບູລິມະສິດ, ຫັນກໍາລັງລົງຊ່ວຍເມືອງ, ບ້ານ ແລະ ການສ້າງບ້ານປ້ອງກັນຊາດເຂັ້ມແຂງ-ປ້ອງກັນຄວາມສະຫງົບດີ ເຮັດໃຫ້ທົ່ວສັງຄົມ ມີຄວາມສະຫງົບໂດຍພື້ນຖານ. ດ້ານວຽກງານເສດຖະກິດ ລວມມູນຄ່າຍອດຜະລິດຕະພັນພາຍໃນ (GDP) ປະຕິບັດໄດ້ 5,119 ຕື້ກີບ ເທົ່າກັບ 59.95%, ເສດຖະກິດຂະຫຍາຍຕົວໃນລະດັບ 4.3%, ສາມາດດຶງດູດການລົງທຶນ ໃນໄລຍະ 9 ເດືອນ ປະຕິບັດໄດ້ 1,128 ຕື້ກວ່າກີບ, ເທົ່າກັບ 61.6%, ການຈັດເກັບລາຍຮັບເຂົ້າງົບປະມານ ປະຕິບັດໄດ້ 187 ຕື້ກີບ ເທົ່າກັບ 90.91%. ດ້ານວຽກງານວັດທະນະທໍາສັງຄົມ ໄດ້ຂຸ້ນຂ້ຽວເອົາໃຈໃສ່ແກ້ໄຂບັນຫາການປະລະການຮຽນ ຊັ້ນປະຖົມ ແລະ ມັດທະຍົມ, ຍົກສູງຄຸນນະພາບການສຶກສາ ໃຫ້ບັນລຸໃນ 12 ຕົວຊີ້ບອກ, ສຸມໃສ່ກໍ່ສ້າງ, ປັບປຸງສະຖານທີ່ຕ່າງໆ ກຽມຄວາມພ້ອມເປັນເຈົ້າພາບງານກິລານັກຮຽນມັດທະຍົມທົ່ວປະເທດ ຄັ້ງທີ VII, ຍົກສູງດ້ານການບໍລິການສາທາລະນະສຸກ, ສະຖານທີ່ທ່ອງທ່ຽວ, ທີ່ພັກແຮມ, ບໍລິການໃຫ້ກັບນັກທ່ອງທ່ຽວທັງພາຍໃນ ແລະ ຕ່າງປະເທດ ຊຶ່ງມີ 1 ແສນກວ່າເທື່ອຄົນ ເທົ່າກັບ 97.20%, ສ້າງລາຍຮັບໄດ້ 16 ລ້ານກວ່າໂດລາສະຫະລັດ ພ້ອມທັງໄດ້ລາຍງານການຈັດຕັ້ງປະຕິບັດວຽກງານໃນຂົງເຂດດ້ານອື່ນໆ ເຊັ່ນ: ວຽກງານການເມືອງ-ແນວຄິດ, ວຽກພັກ-ພະນັກງານ, ວຽກງານແນວລາວສ້າງຊາດ-ອົງການຈັດຕັ້ງມະຫາຊົນ, ວຽກງານການຕ່າງປະເທດ, ວຽກງານກໍ່ສ້າງຮາກຖານການເມືອງ, ພັດທະນາຊົນນະບົດ, ແກ້ໄຂຄວາມທຸກຍາກ ແລະ ວຽກງານ 3 ສ້າງ, ການຈັດຕັ້ງປະຕິບັດ 2 ວາລະແຫ່ງຊາດ ຕື່ມອີກ.
ກອງປະຊຸມຄັ້ງນີ້, ຍັງໄດ້ຮັບຟັງການລາຍງານກະກຽມຄວາມພ້ອມໃນການດໍາເນີນກອງປະຊຸມໃຫຍ່ ຄັ້ງທີ XIII ຂອງອົງຄະນະພັກເມືອງຕະໂອ້ຍ, ຊຶ່ງເປັນເມືອງທຳອິດຂອງແຂວງສາລະວັນ ຈະໄດ້ໄຂຂຶ້ນໃນລະຫວ່າງຕົ້ນເດືອນມັງກອນ 2025 ນີ້ ແລະ ວຽກງານກວດກາພັກ-ກວດກາລັດແຂວງ ປະຈຳ 9 ເດືອນ ແລະ ທິດທາງແຜນການ 3 ເດືອນທ້າຍປີ 2024, ພ້ອມທັງມີການປະກອບຄໍາຄິດເຫັນ, ເຈາະຈີ້ມບາງເນື້ອໃນຈາກສະຫາຍປະທານຕື່ມອີກ.
(ຂ່າວ-ພາບ: ວິໄລວອນ ສິດທິໄຊ)
ຄໍາເຫັນ