ພິທີສະເຫຼີມສະຫຼອງວັນສ້າງຕັ້ງໂຮງຮຽນທິດສະດີການເມືອງກອງທັບຄົບຮອບ 5 ປີ (22 ພຶດສະພາ 2019-22 ພຶດສະພາ 2024), ໄດ້ຈັດຂຶ້ນໃນວັນທີ 24 ພຶດສະພາ ນີ້ , ໂດຍການເຂົ້າຮ່ວມເປັນປະທານຂອງ ສະຫາຍ ພົນໂທ ທອງລອຍ ສິລິວົງ ຮອງລັດຖະມົນຕີກະຊວງປ້ອງກັນປະເທດ ຫົວໜ້າກົມໃຫຍ່ການເມືອງກອງທັບ, ມີ ຄະນະພັກ-ຄະນະອຳນວຍການ, ບັນດາແຂກຖືກເຊີນ ແລະ ພະນັກງານຫຼັກແຫຼ່ງທົ່ວໂຮງຮຽນທິດສະດີການເມືອງກອງທັບເຂົ້າຮ່ວມ.
ສະຫາຍ ພົນຈັດຕະວາ ຄຳຜາຍ ສະພັງເໜຶອ ເລຂາຄະນະພັກ ຫົວໜ້າການເມືອງ ໂຮງຮຽນທີດສະດີການເມືອງກອງທັບ, ໄດ້ຫວນຄືນມູນເຊຶ້ອປະຫວັດຄວາມເປັນມາ ຂອງໂຮງຮຽນທິດສະດີການເມືອງກອງທັບ ໂດຍຫຍໍ້ຕະຫຼອດໄລຍະ 5 ປີຜ່ານມາວ່າ: ໂຮງຮຽນ ໂດຍໄດ້ຮັບການສ້າງຕັ້ງຂື້ນ ໃນວັນທີ 22 ພຶດສະພາ 2019 ແມ່ນມີຄວາມໝາຍສໍາຄັນ ສໍາລັບກອງທັບປະຊາຊົນລາວ, ມັນກາຍເປັນເບົ້າຫຼໍ່ ດ້ານແນວຄິດການເມືອງທີ່ປອດໃສ, ເຂັ້ມແຂງ ແລະ ໜັກແໜ້ນ, ກາຍເປັນບ່ອນຝຶກຝົນດ້ານຄຸນທາດການເມືອງ, ຄຸນສົມບັດສິນທຳປະຕິວັດ ແລະ ຫຼັກໝັ້ນຊົນຊັ້ນທີ່ໜັກແໜ້ນ, ໃນນີ້ ໄດ້ເອົາໃຈໃສ່ສຸມໃສ່ທາງດ້ານການເມືອງໃຫ້ໜັກແໜ້ນ, ເຮັດໃຫ້ສະມາຊິກພັກ ມີຫຼັກໝັ້ນ ທາດແທ້ປະຕິວັດ, ມີອຸດົມການສັງຄົມນິຍົມ, ກຳແໜ້ນ 5 ຫຼັກການ ແລະ 3 ທິດນໍາ ໃນການກໍ່ສ້າງພັກ, ດ້ານການຈັດຕັ້ງແມ່ນເລັ່ງໃສ່ສ້າງໃຫ້ຄະນະພັກ, ໜ່ວຍພັກ, ສະມາຊິກພັກ ມີຄວາມປອດໃສ, ເຂັ້ມແຂງ ແລະ ໜັກແໜ້ນ, ມີຄວາມເຊື່ອໝັ້ນຕໍ່ການນໍາພາຂອງພັກ, ເດັດດ່ຽວຜ່ານຜ່າຂໍ້ຫຍຸ້ງຍາກ, ເຮັດສຳເລັດໜ້າທີ່ ທີ່ຂັ້ນເທິງມອບໝາຍ, ພ້ອມທັງເອົາໃຈໃສ່ກໍ່ສ້າງແຜນກໍານົດບໍາລຸງກໍ່ສ້າງພະນັກງານ, ຄູ-ອາຈານ ໃຫ້ມີຄວາມໜັກແໜ້ນດ້ານຄຸນທາດການເມືອງ ຮັບປະກັນລັກສະນະສືບທອດປ່ຽນແທນຢ່າງຕໍ່ເນື່ອງ, ສ້າງພະນັກງານນໍາພາໃຫ້ມີຄວາມຮັບຮູ້ດ້ານວຽກງານພັກ-ວຽກງານການເມືອງ, ມີຄວາມສາມາດດ້ານວິຊາສະເພາະຢ່າງສໍານິຊຳນານ, ຊຶ່ງນັບແຕ່ມື້ສ້າງຕັ້ງໂຮງຮຽນທິດສະດີການເມືອງກອງທັບທໍາອິດເເຕ່ປີ 2019 ມາ ມີພະນັກງານ ຄູ-ອາຈານພຽງແຕ່ 147 ສະຫາຍ, ມາຮອດປັດຈຸບັນ ມີປະມານ 600 ສະຫາຍ, ມີນັກຮຽນ-ນັກສຶກສາປະມານ 1000 ກວ່າສະຫາຍ, ສ້າງພະນັກງານຈົບຢູ່ພາຍໃນປະເທດ 63 ສະຫາຍ ຍິງ 1 ສະຫາຍ, ສ້າງພະນັກງານບຳລຸງຢູ່ຕ່າງປະເທດ 20 ສະຫາຍ, ໄດ້ເປີດເປົ້າໝາຍການຮຽນ-ການສອນ ໄດ້ 14 ເປົ້າໝາຍ, 4 ຊຸດຮຽນ, ບຳລຸງ-ກໍ່ສ້າງສຳເລັດປະມານ 1200 ກວ່າສະຫາຍ, ຈາກນັ້ນໃນພິທີ ສະຫາຍ ຮອງລັດຖະມົນຕີກະຊວງປ້ອງກັນປະເທດໄດ້ຕາງໜ້າໃຫ້ຄະນະນໍາກະຊວງປ້ອງກັນປະເທດປະດັບຫຼຽນໄຊ ພິລາອາດຫານຊັ້ນ II ໃຫ້ແກ່ໂຮງຮຽນທິດສະດີການເມືອງກອງທັບຢ່າງສົມກຽດ.
ໂອກາດນີ້, ສະຫາຍ ພົນໂທ ທອງລອຍ ສີລິວົງ ໄດ້ຍ້ອງຍໍຊົມເຊີຍຜົນງານຂອງວັນທີມີຄວາມໝາຍຄວາມສຳຄັນຄັ້ງນີ້ ພ້ອມທັງເນັ້ນໜັກຫຼາຍບັນຫາໃຫ້ຄະນະພັກ-ຄະນະອຳນວຍການ, ພະນັກງານຄູ-ອາຈານ ຕະຫຼອດຮອດນັກຮຽນ-ນັກສຶກສາທຸກສະຫາຍ ຕ້ອງເຊື່ອມຊຶມຢ່າງເລິກເຊິ່ງ ຕໍ່ແນວທາງແຜນ ນະໂຍບາຍຂອງພັກ, ລະບຽບ-ກົດໝາຍຂອງລັດ, ທາດແທ້ມູນເຊື້ອຂອງຊາດ, ຂອງກອງທັບ ແລະ ໜ້າທີ່ຄວາມຮັບຜິດຊອບຂອງຕົນ ແນໃສ່ເຮັດໃຫ້ພາຍໃນມີຄວາມສະຫງົບໜັກແໜ້ນ, ມີຫຼັກໝັ້ນການເມືອງຈະແຈ້ງ, ຊີ້ນໍາ-ນໍາພາໂຮງຮຽນ, ພະນັກງານ ຄູ-ອາຈານ ປະຕິບັດໜ້າທີ່ໃຈກາງຂອງຕົນ ເປັນຕົ້ນແມ່ນການອົບຮົມສິດສອນ, ບຳລຸງ-ກໍ່ສ້າງນາຍທະຫານໃຫ້ຮັບປະກັນໄດ້ຄຸນນະພາບຕາມມາດຖານທີ່ກະຊວງໄດ້ວາງອອກ ແນໃສ່ເພື່ອຮັບປະກັນໃຫ້ກົມກອງມີຄວາມສະຫງົບ ແລະ ປອດຄະດີໃນທຸກດ້ານ.
ຂ່າວ: ສຸກສາຄອນ ຜົງໄຊຜົນ
ຄໍາເຫັນ