ເລຂາຄະນະບໍລິຫານງານສູນກາງຊາວໜຸ່ມ ປະຊາຊົນ ປະຕິວັດລາວ (ສຊປລ), ທ່ານນາງ ສາລີ້ຜູ້ຕາງໜ້າອົງການສະຫະປະຊາຊາດກອງທຶນສຳລັບປະຊາກອນປະຈຳສປປລາວ,ມີພາກສ່ວນກ່ຽວຂ້ອງເຂົ້າຮ່ວມ.
ທ່ານມອນໄຊລາວມົວຊົ່ງໄດ້ກ່າວວ່າ: ການຈັດງານສະເຫຼີມສະຫຼອງຄັ້ງນີ້ ໂດຍການຮ່ວມມືລະຫວ່າງສຊປລກັບອົງການສະຫະປະຊາຊາດກອງທຶນສຳລັບປະຊາກອນແລະກະຊວງ-ອົງການທີ່ກ່ຽວຂ້ອງ ເພື່ອສ້າງເວທີໃຫ້ໄວໜຸ່ມໄດ້ສະແດງຄວາມຮູ້, ຄວາມສາມາດຂອງຕົນເອງ, ເປັນເວທີໃນການພົບປະແລກປ່ຽນຂໍ້ມູນຂ່າວສານຊຶ່ງກັນ, ການຊ່ວຍເຫຼືອສັງຄົມໂດຍການບໍລິຈາກເລືອດ, ກິດຈະກຳແຂ່ງຂັນຖາມ-ຕອບອອນລາຍເປັນການຮັດແໜ້ນຄວາມສາມັກຄີກັບທຸກກຸ່ມຄົນ, ທຸກເພດ, ທຸກໄວດັ່ງຫົວຂໍ້ທີ່ວ່າ: “ ເລີ່ມຈາກຄົ້ນຫາ, ສູ່ຄວາມກ້າວໜ້າ, ເສັ້ນທາງດີຈີຕອນຂອງໄວໜຸ່ມເພື່ອການພັດທະນາທີ່ຍືນຍົງ ”ເພາະຊາວໜຸ່ມແມ່ນກຳລັງປະຈັນບານ, ເປັນກໍາລັງຕົ້ນຕໍໃນການສ້າງສາພັດທະນາເສດຖະກິດ-ສັງຄົມເປັນຜູ້ສືບທອດໝາກຜົນ ແລະ ພັດທະນາປະເທດຊາດ. ຊາວໜຸ່ມເປັນໄວທີ່ກຳລັງຈະເລີນເຕີບໂຕທາງດ້ານຮ່າງກາຍ, ຈິດໃຈ, ມັນສະໝອງ ທັງເປັນໄວທີ່ຢາກຮູ້, ຢາກຮຽນ, ຢາກລອງສິ່ງໃໝ່ໆຢູ່ສະເໝີ. ຈຸດປະສົງເພື່ອເຫັນໄດ້ບົດບາດຄວາມສຳຄັນຂອງເຕັກໂນໂລຊີ, ບົດບາດຂອງໄວໜຸ່ມ, ທຸກຄົນໃນສັງຄົມໃນການຫັນປ່ຽນເປັນດີຈີຕອນທັນສະໄໝແລະຊາວໜຸ່ມຍັງເປັນກຳລັງຕົ້ນຕໍໃນການສ້າງສາພັດທະນາປະເທດຊາດ. ພວກເຮົາໃນນາມທີ່ເປັນຜູ້ປົກຄອງ ຕ້ອງສ້າງເງື່ອນໄຂອຳນວຍຄວາມສະດວກຮອບດ້ານເພື່ອໃຫ້ໄວໜຸ່ມລາວເປັນຄົນທີ່ມີສຸຂະພາບແຂງແຮງ ໄດ້ຮັບການສຶກສາຢ່າງທົ່ວເຖິງ, ມີວຽກເຮັດງານທຳ, ໄດ້ຮັບການປົກປ້ອງ ແລະ ຊຸກຍູ້ໃຫ້ໄວໜຸ່ມມີສ່ວນຮ່ວມໃນການວາງແຜນແຕ່ຫົວທີ ເພື່ອພັດທະນາປະເທດຊາດ,ພັກ-ລັດ ກໍຄື ສຊປລທີ່ເຫັນໄດ້ຄວາມສຳຄັນຂອງໄວໜຸ່ມ ຈຶ່ງໄດ້ຮ່ວມກັບອົງການສະຫະປະຊາຊາດກອງທຶນສຳລັບປະຊາກອນ ໃນການສ້າງຍຸດທະສາດການພັດທະນາຊາວໜຸ່ມເຍົາວະຊົນລາວປີ 2021-2030 ເພື່ອເປັນບ່ອນອີງໃນການເຄື່ອນໄຫວສ້າງໃຫ້ໄວໜຸ່ມເປັນຄົນທີ່ມີສະຕິປັນຍາ, ມີຄວາມເຂັ້ມແຂງທາງດ້ານຮ່າງກາຍ, ຈິດໃຈ, ມັນສະໝອງ. ຄຽງຄູ່ກັນນັ້ນ. ສຊປລໄດ້ສ້າງກົດໝາຍຊາວໜຸ່ມ ແລະ ກະກຽມສ້າງກົດໝາຍເຍົາວະຊົນເພື່ອປົກປ້ອງສິດຜົນປະໂຫຍດອັນຊອບທຳໃຫ້ແກ່ຊາວໜຸ່ມ-ເຍົາວະຊົນ ແລະ ກະກຽມເປີດກອງປະຊຸມໃຫຍ່ສະຫະພັນຊາວໜຸ່ມລາວ ເພື່ອເຕົ້າໂຮມເອົາບັນດາສະມາຄົມຕ່າງໆທີ່ເຄື່ອນໄຫວກ່ຽວກັບວຽກງານຊາວໜຸ່ມ-ເຍົາວະຊົນ ເຮັດໃຫ້ການເຄື່ອນໄຫວວຽກງາຊາວໜຸ່ມ-ເຍົາວະຊົນມີຫຼາຍຮູບແບບ ສາມາດເຂົ້າເຖິງໄດ້ທຸກກຸ່ມຄົນ ບໍ່ປະໃຫ້ຜູ້ໃດໄວ້ທາງຫຼັງ.
ຂ່າວ-ພາບ: ບຸນອູ້ມ
ຄໍາເຫັນ