ສະຫຼອງບຸນເກີຣ ຂອງເຜົ່າກຶມມຸ ຢູ່ເມືອງເງິນ ຮັກສາໄດ້ວັດທະນະທໍາທີ່ເປັນເອກະລັກຂອງເຜົ່າ

ທ່ານ ຄຳເຜີຍ ເທບທາລາ ນາຍບ້ານໆປຸ່ງຝາດ ໄດ້ກ່າວເປີດງານວ່າ: ບຸນເກີຣ ມີຊື່ເອີ້ນທາງການວ່າບຸນປົດປີ ຊຶ່ງເປັນປະເພນີສົ່ງທ້າຍປີເກົ່າ ແລະ ຕ້ອນຮັບປີໃໝ່ຂອງເຜົ່າກຶມມຸ ຊຶ່ງໄດ້ຈັດຂຶ້ນໃນໄລຍະທ້າຍເດືອນທັນວາ-ຕົ້ນເດືອນມັງກອນ ພາຍຫຼັງເກັບກ່ຽວຜົນລະປູກລະດູຝົນສຳເລັດ ຊຶ່ງເປັນພິທີກຳບູຊາອັນໜຶ່ງທີ່ສືບທອດກັນມາແຕ່ດຶກດຳບັນພາຍຫຼັງໄດ້ເຂົ້າໃໝ່, ເຜືອກມັນ ກໍເອົາມາໂຮມກັນແລ້ວເຮັດພິທີບູຊາຕາມຄວາມເຊື່ອຖື, ທັງເປັນການຊົມເຊີຍຜົນສໍາເລັດຂອງການເກັບກູ້ພຶດລະດູຝົນໃນປີຜ່ານມາ.

ສຳລັບຢູ່ເມືອງເງິນ, ຄະນະນຳອົງການປົກຄອງເມືອງ ໄດ້ຊີ້ນໍາໃຫ້ແຕ່ລະບ້ານໝູນວຽນກັນເປັນເຈົ້າພາບຊຶ່ງເລີ່ມຈັດຕັ້ງປະຕິບັດມາແຕ່ປີ 2005. ມາຮອດປີນີ້, ບ້ານປຸ່ງຝາດ ໄດ້ຮັບກຽດເປັນເຈົ້າພາບຈັດພິທີສະເຫຼີມສະຫຼອງບຸນເກີຣ ຂອງເຜົ່າກຶມມຸ. ພາຍໃນງານ, ມີກິດຈະກຳຫຼາຍຢ່າງ ເປັນຕົ້ນ: ພິທີທາງສາສະໜາ, ບາສີສູ່ຂວັນ, ການສະແດງສິລະປະຂອງຊາວໜຸ່ມບ້ານ, ຂອງໂຮງຮຽນ ແລະ ອື່ນໆ ຊຶ່ງມີບັນຍາກາດຄຶກຄື້ນມ່ວນຊື່ນ ແລະ ຍິ່ງໃຫຍ່ ກວ່າປີຜ່ານມາ.

ຈຸດປະສົງກໍເພື່ອເປັນການເຕົ້າໂຮມຄວາມສາມັກຄີລະຫວ່າງບ້ານຕໍ່ບ້ານໃຫ້ແໜ້ນແຟ້ນຍິ່ງໆຂຶ້ນ, ເປັນການກໍາຈັດປັດເປົ່າສິ່ງບໍ່ດີໃຫ້ຕົກໄປນໍາປີເກົ່າ. ປີໃໜ່ໃຫ້ມີແຕ່ສຸຂະພາບແຂງແຮງ, ມີໂຊກ ມີລາບຕະຫຼອດປີ. ທັງເປັນການອະນຸລັກປົກປັກຮັກສາປະເພນີວັດທະນະທໍາຂອງເຜົ່າໄວ້ໃຫ້ໜັ້ນຄົງຕະຫຼອດໄປ. ຈາກນັ້ນ, ກໍໄດ້ມອບ-ຮັບ ໃຫ້ອົງການປົກຄອງບ້ານກາງໃນການເປັນເຈົ້າພາບໃນປີຕໍ່ໄປ ແລະ ມອບໃບຍ້ອງຍໍໃຫ້ບໍລິສັດ, ຜູ້ປະກອບການ ທີ່ໄດ້ປະກອບສ່ວນພັດທະນາບ້ານປຸ່ງຝາດອີກດ້ວຍ.

(ຂ່າວ: ອິນແປງ ແຫວນຄຳ)