ພິທີສະເຫຼີມສະຫຼອງການເປີດນໍາໃຊ້ລົດໄຟຂ້າມແດນ ຄົບຮອບ 1 ປີ (13 ເມສາ 2023–13 ເມສາ 2024) ໄດ້ຈັດຂຶ້ນໃນວັນທີ 13 ເມສານີ້ ທີ່ສະຖານີລົດໄຟລາວ-ຈີນ ນະຄອນຫຼວງວຽງຈັນ ເປັນກຽດເຂົ້າຮ່ວມຂອງທ່ານ ນາງ ສວນສະຫວັນ ວິຍະເກດ ລັດຖະມົນຕີກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ, ທ່ານ ຫວາງ ຊາງ (Wang chang) ອຸປະທູດ ສະຖານເອກອັກຄະລັດຖະທູດ ສປ ຈີນ ປະຈໍາ ລາວ, ທ່ານ ຫຼິວ ຫົງ ຜູ້ອຳນວຍການໃຫຍ່ ບໍລິສັດລົດໄຟລາວ-ຈີນ ພ້ອມດ້ວຍແຂກຖືກເຊີນ, ພະນັກງານກ່ຽວຂ້ອງເຂົ້າຮ່ວມ.
ໃນພິທີທ່ານຫວາງ ຊາງ ກ່າວວ່າ: ໃນເດືອນທັນວາ 2021 ພາຍໃຕ້ເປັນການສັກຂີພິຍານຂອງການນຳຂັ້ນສູງລະຫວ່າງສອງປະເທດຈີນ ແລະ ລາວໂຄງການທາງລົດໄຟໄດ້ເປີດການນຳໃຊ້ຢ່າງເປັນທາງການ. ຜ່ານຄວາມພະຍາຍາມ ແລະ ການປະສານງານຢ່າງສະໜິດແໜ້ນໂຄງການດັ່ງກ່າວໄດ້ຍາດເອົາທ່ວງທ່າທີ່ຂົນສົ່ງສິນຄ້າ ແລະ ຜູ້ໂດຍສານມີຄວາມຮຸ່ງເຮືອງ, ສົ່ງເສີມບົດບາດ ຊຶ່ງເປັນສ່ອງທາງເງິນຄຳອັນໃຫຍ່ຫຼວງ. ໃນເດືອນຜ່ານມາຈຳນວນຂົນສົ່ງຜູ້ໂດຍສານໄດ້ບຸກທະລຸ 30 ລ້ານເທື່ອຄົນ ແລະ ສິນຄ້າ 34 ລ້ານໂຕນສະເລ່ຍທຸກໆມື້ມີຈຳນວນຂົນສົ່ງຜູ້ໂດຍສານ 13 ພັນເທື່ອຄົນ ແລະ ສິນຄ້າຕ່າງໆໄດ້ບັນລຸ 15 ພັນໂຕນ. ນັບແຕ່ການເປີດບໍລິການລົດໄຟຂ້າມແດນ ໃນວັນທີ 13 ເມສາ 2023 ມາເຖິງປັດຈຸບັນ ໄດ້ຂົນສົ່ງໂດຍສານປະມານ 150 ພັນຄົນ ຜູ້ໂດຍສານຈາກ 87 ປະເທດພາກພື້ນ ແລະ ສິນຄ້າສາກົນຫຼາຍກວ່າ 8 ລ້ານໂຕນ ຊຶ່ງໄດ້ຊຸກຍູ້ການພັດທະນາການທ່ອງທ່ຽວ ແລະ ເສດຖະກິດ-ສັງຄົມ ຕາມທາງລົດໄຟ. ປັດຈຸບັນ ລົດໄຟລາວ-ຈີນ ໄດ້ກາຍເປັນວິທີໜຶ່ງໃນການອອກເດີນທາງທີ່ທັນສະໄໝ ສະດວກສະບາຍ ແລະ ມີຄວາມປອດໄພ ຂອງປະຊາຊົນລາວ ກັບບັນດານັກທ່ອງທ່ຽວຕ່າງປະເທດ ຊຶ່ງໄດ້ປັບປຸງວິຖີຊີວິດການເປັນຢູ່ ແລະ ການພັດທະນາການທ່ອງທ່ຽວ ຂອງປະຊາຊົນລາວຢ່າງເລິກເຊິ່ງ. ປີ 2024 ເປັນປີທ່ອງທ່ຽວລາວ ກໍຄື ສປປ ລາວ ດຳເນີນໜ້າທີ່ເປັນປະທານອາຊຽນ ຊຶ່ງເປັນກາລະໂອກາດອັນສຳຄັນຂອງ ສປປ ລາວ ໃນການສະແດງທິວທັດທຳມະຊາດອັນສວຍສົດງົດງາມວັດທະນະທຳອັນເປັນມູນເຊື້ອຍາວນານ ແລະ ຍົກສູງອິດທິພົນສາກົນ. ເຊື່ອໝັ້ນວ່າ ໂຄງການທາງລົດໄຟລາວ-ຈີນ ຈະເປັນການເຊື່ອມຕໍ່ອັນສຳຄັນລະຫວ່າງບັນດາປະເທດພາກພື້ນ ພ້ອມທັງຈະສົ່ງເສີມບົດບາດອັນສຳຄັນທີ່ສຸດ ໃນການສະແດງຮີດຄອງປະເພນີ ແລະ ຜົນສຳເລັດການພັດທະນາຂອງປະເທດລາວ ກໍຄືຊຸກຍູ້ການໄປ-ມາຫາສູ່ກັນໃນພາກພື້ນ.
ໂອກາດນີ້, ທ່ານນາງ ສວນສະຫວັນ ວິຍະເກດ ກ່າວວ່າ: ຕະຫຼອດໄລຍະ 1 ປີ ພາຍຫຼັງທີ່ໄດ້ເປີດການບໍລິການຖ້ຽວລົດໄຟນະຄອນຫຼວງວຽງຈັນ-ນະຄອນຄຸນໝິງ ເຫັນວ່ານັກທ່ອງທ່ຽວຈາກ ສປ ຈີນ ໄດ້ເພີ່ມຂຶ້ນເປັນຈຳນວນຫຼວງຫຼາຍຖ້າທຽບໃສ່ກ່ອນການເປີດການເຊື່ອມໂຍງຂະບວນລົດໄຟດັ່ງກ່າວຈາກໃນປີ 2022 ມີ 45 ພັນກວ່າເທື່ອຄົນ ປີ 2023 ມາເປັນ 641.314 ເທື່ອຄົນ ແລະ ໃນ 3 ເດືອນຕົ້ນປີ 2024 ມີນັກທ່ອງທ່ຽວຈີນເຂົ້າມາທ່ອງທ່ຽວປະມານ 242.193 ເທື່ອຄົນ. ການເປີດນໍາໃຊ້ເສັ້ນທາງດັ່ງກ່າວເປັນເຫດການໜຶ່ງທີ່ມີຄວາມໝາຍ-ຄວາມສໍາຄັນ ປະກອບສ່ວນເຂົ້າໃນການພົວພັນຮ່ວມມືລະຫ່ວາງສອງລັດຖະບານ ລາວ ແລະ ຈີນ ທີີ່ຍາມໃດກໍໃຫ້ການຊຸກຍູ້ຊ່ວຍເຫຼືອຊຶ່ງກັນ ແລະ ກັນ ເພື່ອພັດທະນາປະເທດຊາດໃຫ້ມີຄວາມຮັ່ງມີເຂັ້ມແຂງ. ດັ່ງທີ່ທ່ານ ສີຈິ້ນຜິງໄດ້ກ່າວໄວ້ວ່າ: ການຮັບໃຊ້ປະຊາຊົນ ແມ່ນຈຸດປະສົງຮ່ວມຂອງສອງພັກລາວ-ຈີນ, ການພົວພັນລະຫວ່າງລາວ-ຈີນ ກໍໄດ້ເນັ້ນໃສ່ການໃຫ້ຄວາມສຳຄັນກັບປະຊາຊົນ ແລະ ສ້າງຜົນປະໂຫຍດໃຫ້ປະຊາຊົນນັບມື້ນັບດີຂຶ້ນເລື້ອຍໆ. ຫຼັງຈາກສຳເລັດພິທີ ທ່ານ ນາງ ສວນສະຫວັນ ວິຍະເກດ ພ້ອມຄະນະ ໄດ້ຂຶ້ນລົດໄຟໄປທ່ຽວທີ່ແຂວງຫຼວງພະບາງຕື່ມອີກ.
(ຂ່າວ-ພາບ: ວັນເພັງ+ ແສງຈັນ ດວງແກ້ວ)
ຄໍາເຫັນ