ແລະ ເດັກທັງເປັນການສະຫຼອງຄົບຮອບ 9 ປີ ໃນການສ້າງໜ້າເຟສ ມີເດຍລາວ ໃນລະຫວ່າງວັນທີ 10-12 ທັນວານີ້ ທີ່ແຂວງບໍ່ແກ້ວ ໂດຍການເປັນປະທານຮ່ວມຂອງ ທ່ານ ສົມສະຫວາດພົງສາຫົວໜ້າກົມສື່ມວນຊົນ ກະຊວງ ຖວທ, ທ່ານ ສົມສັກມະຫາພົນຮອງຫົວໜ້າພະແນກ ຖວທ ແຂວງບໍ່ແກ້ວ ແລະ ທ່ານ ໄຊມອນ ນາເຊີຫົວໜ້າພະແນກໂຄສະນາແລະສື່ສານມວນຊົນຂອງອົງການອຸຍນີເຊັບປະຈໍາສປປລາວ; ມີບັນດາສະມາຊິກ 17 ແຂວງ ແລະ ນະຄອນຫຼວງວຽງຈັນ ພ້ອມດ້ວຍທຸກພາກສ່ວນກ່ຽວຂ້ອງເຂົ້າຮ່ວມ.
ທ່ານ ສົມສະຫວາດ ພົງສາ ໄດ້ກ່າວເປີດກອງປະຊຸມວ່າ:ລັດຖະບານແຫ່ງ ສປປ ລາວ ໄດ້ໃຫ້ຄໍາໝັ້ນສັນຍາ ທີ່ຈະລຶບລ້າງການແຕ່ງດອງຂອງເດັກກ່ອນໄວອັນຄວນ ແລະ ການບັງຄັບແຕ່ງດອງ ພ້ອມທັງຮັບປະກັນການເຂົ້າເຖິງການບໍລິການ ແລະ ການສຶກສາດ້ານສຸຂະພາບທາງເພດ ແລະ ສຸຂະພາບຈະເລີນພັນທຸກຖ້ວນໜ້າ. ເຖິງຢ່າງໃດກໍຕາມ, ອີງຕາມບົດລາຍງານຜົນການສຶກສາຂອງຄະນະກຳມາທິການແຫ່ງຊາດ ເພື່ອຄວາມກ້າວໜ້າຂອງແມ່ຍິງ ແລະ ແມ່-ເດັກ (ຄຊກມດ) ສະແດງໃຫ້ເຫັນວ່າ ໄວໜຸ່ມທີ່ອາໄສຢູ່ຊົນນະບົດ ທີ່ມີອາຍຸ 13-14 ປີ ແລະ ໄວໜຸ່ມອາໄສຢູ່ເຂດຕົວເມືອງ ທີ່ມີອາຍຸ 16-17 ປີ ໄດ້ມີການແຕ່ງດອງ ຊຶ່ງເປັນເລື່ອງທີ່ໜ້າເປັນຫວ່ງທີ່ສຸດ ເພາະຈະພາໄປສູ່ການຖືພາກ່ອນໄວອັນຄວນ ອັນຈະມີຄວາມສ່ຽງຕໍ່ສຸຂະພາບຂອງແມ່ ແລະ ເດັກ. ສື່ມວນຊົນ, ມີບົດບາດສຳຄັນໃນການເຜີຍແຜ່ຂໍ້ມູນຂ່າວສານ ຢ່າງຕໍ່ເນື່ອງໃຫ້ແກ່ຊຸມຊົນ ໃຫ້ມີຄວາມຮັບຮູ້ເລິກເຊິ່ງ ແລະ ມີການປ່ຽນແປງທັດສະນະຄະຕິ ແລະ ພຶດຕິກຳຂອງຕົນໃນການວາງແຜນຊີວິດ; ດັ່ງນັ້ນ, ສື່ມວນຊົນ ຈົ່ງເອົາໃຈໃສ່ປະກອບສ່ວນ ໃຫ້ຄວາມຮູ້ແກ່ຊຸມຊົນຢ່າງເປັນປົກກະຕິ ແລະ ຕໍ່ເນື່ອງ.
ພາຍຫຼັງ, ທ່ານ ສົມສັກມະຫາພົນ ໄດ້ມີຄໍາເຫັນໃນການເປີດກອງປະຊຸມ ໂດຍໄດ້ແຈ້ງໃຫ້ຮູ້ເຖິງສະພາບວຽກງານໃນໄລຍະຜ່ານມາ;ຈາກນັ້ນ, ທ່ານ ໄຊມອນນາເຊີ ກໍໄດ້ນໍາສະເໜີບັນຫາບຸລິມະສິດສົ່ງເສີມວຽກງານສະຫວັດດີການຂອງແມ່ຍິງ ແລະ ເດັກວ່າ: ຄຽງຂ້າງລັດຖະບານແລະຄູ່ຮ່ວມງານສື່ມວນຊົນຂອງພວກເຮົາ, ໃນຂະນະທີ່ພວກເຮົາປຶກສາຫາລືຮ່ວມກັນວ່າພວກເຮົາສາມາດສ້າງອະນາຄົດທີ່ສົດໃສຂອງສປປລາວຜ່ານການສື່ສານທີ່ມີມູນຄວາມຈິງ, ມີຄວາມຮັບຜິດຊອບແລະໜ້າສົນໃຈ.ພວກເຮົາຮັບຮູ້ວ່າການລົງທຶນໃນເດັກນ້ອຍ, ການຮັບປະກັນສຸຂະພາບ, ໂພຊະນາການ, ການສຶກສາແລະຄວາມປອດໄພຂອງພວກເຂົານັ້ນຊ່ວຍເສີມສ້າງຊັບພະຍາກອນມະນຸດຂອງປະເທດຊາດຂອງພວກເຮົາ. ເມື່ອໄວໜຸ່ມໄດ້ສະແດງສັກກະຍະພາບຂອງພວກເຂົາໄດ້ຢ່າງເຕັມເມັດເຕັມໜ່ວຍ, ພວກເຮົາທຸກຄົນຍ່ອມໄດ້ຮັບຜົນປະໂຫຍດ.ສປປລາວຖືຄອງອັດຕາການແຕ່ງງານໃນໄວເດັກສູງທີ່ສຸດໃນອາຊີຕາເວັນອອກສ່ຽງໃຕ້ໂດຍມີ 30.5 ເປີເຊັນຂອງໄວໜຸ່ມທີ່ແຕ່ງງານກ່ອນອາຍຸ 18 ປີ.ຄວາມເປັນຈິງນີ້ແມ່ນເຫັນໄດ້ຢ່າງຊັດເຈນໃນບັນດາຊຸມຊົນທີ່ດ້ອຍໂອກາດຜູ້ທີ່ເຂົ້າເຖິງການສຶກສາທີ່ຈຳກັດ, ໃນບັນດາກຸ່ມຊົນເຜົ່າບາງກຸ່ມແລະໃນກຸ່ມປະຊາກອນທີ່ທຸກຍາກທີ່ສຸດ.
ສື່ມວນຊົນມີຄວາມຮັບຜິດຊອບທີ່ເປັນເອກະລັກສະເພາະແລະອຳນາດພິເສດໃນການດຳເນີນການດັ່ງກ່າວ. ຜ່ານການລາຍງານທີ່ຖືກຕ້ອງ, ລະອຽດອ່ອນແລະຄຳນຶງເຖິງດ້ານວັດທະນະທຳ, ສື່ມວນຊົນຍັງສາມາດຍົກໃຫ້ເຫັນເຖິງຄວາມສຳຄັນຂອງການລົງທຶນໃນເດັກນ້ອຍ, ໂດຍສະເພາະແມ່ນເດັກຍິງແລະຊຸກຍູ້ຄວາມເຂົ້າໃຈຂອງປະຊາຊົນແລະສະໜັບສະໜູນວິທີແກ້ໄຂ.ບໍ່ພຽງພໍທີ່ຈະອີງໃສ່ພຽງແຕ່ຊ່ອງທາງສື່ມວນຊົນທ້ອງຖິ່ນ,ພວກເຮົາຕ້ອງສ້າງຮູບແບບການສື່ຂໍ້ຄວາມໃນວິທີທີ່ຄ້າຍຄືກັບຜູ້ຊົມທີ່ຊອກຫາຂໍ້ມູນໃນຫຼາກຫຼາຍຊ່ອງທາງບໍ່ວ່າຈະເປັນການອອກອາກາດ, ສື່ອອນລາຍ, ສື່ສິ່ງພິມຫຼືຊຸມຊົນດີຈີຕອນ. ດັ່ງນັ້ນ, ພວກເຮົາບໍ່ພຽງແຕ່ຈະສຶກສາແລະແຈ້ງໃຫ້ຊາບ, ແຕ່ຍັງມີສ່ວນຮ່ວມແລະເປັນແຮງບັນດານໃຈໃຫ້ປະຊາຊົນເພື່ອເປັນສ່ວນໜຶ່ງຂອງການແກ້ໄຂ.
ທ່ານ ໄຊມອນນາເຊີ ກ່າວຢືນຢັນວ່າ: ອົງການອຸຍນີເຊັບ ຍັງຄົງຢືນຢັນຄືນຄວາມເຄົາລົບນັບຖືແລະຄໍາໝັ້ນສັນຍາໃນການເປັນຄູ່ຮ່ວມງານກັບກະຊວງ ຖວທ, ກົມສື່ມວນຊົນແລະເຄືອຂ່າຍສື່ມວນຊົນຂັ້ນແຂວງແລະຂັ້ນເມືອງເພື່ອສາມາດປູກຈິດສໍານຶກ, ປ່ຽນແປງທັດສະນະຄະຕິແລະສົ່ງເສີມນະໂຍບາຍທີ່ລົງທຶນໃນເດັກນ້ອຍຂອງພວກເຮົາ. ໂດຍການວາງເດັກຍິງເປັນຈຸດໃຈກາງຂອງການສື່ສານແລະການຕັດສິນໃຈທາງດ້ານນະໂຍບາຍຂອງພວກເຮົາ, ພວກເຮົາສາມາດຊຸກຍູ້ຄວາມກ້າວໜ້າບໍ່ພຽງແຕ່ສຳລັບພວກເຂົາເທົ່ານັ້ນ, ແຕ່ສຳລັບສປປລາວ.
ກອງປະຊຸມຄັ້ງນີ້, ຊຶ່ງນອກຈາກຈະສະຫຼອງ 9 ປີ ການສ້າງໜ້າເຟສ ມີເດຍລາວ ແມ່ນຍັງມີການປຶກສາຫາລື ແລະ ທົບທວນວຽກງານກັບບັນດາສະມາຊິກ ມີເດຍລາວ, ແລກປ່ຽນຄວາມຮູ້ລະຫວ່າງ ສະມາຊິກ ມີເດຍລາວ, ສົ່ງເສີມບຸລິມະສິດວຽກງານສະຫວັດດີການຂອງແມ່ຍິງ ແລະ ເດັກ ໂດຍສະເພາະການແຕ່ງດອງແຕ່ໄວເດັກ ແລະ ປຶກສາຫາລືການໂຄສະນາສົ່ງເສີມວຽກງານດັ່ງກ່າວໃນປັດຈຸບັນ ຊຶ່ງໃນວາລະກອງປະຊຸມບັນດາຜູ້ເຂົ້າຮ່ວມກໍໄດ້ຈັດກຸ່ມ ເພື່ອປຶກສາຫາລືຫົວຂໍ້ຂ່າວ, ຄໍາຖາມສຳພາດເປົ້າໝາຍການແຕ່ງດອງແຕ່ໄວເດັກ ເພື່ອລົງເຄື່ອນໄຫວເກັບກຳຂໍ້ມູນຂ່າວ ແລະ ຂຽນບົດຂ່າວຕົວຈິງ.
(ຂ່າວ-ພາບ: ສຸກສະຫວັນ)
ຄໍາເຫັນ