 |
ທ່ານ ນາງ ລີວົງ ລາວລີ ກໍາມະການສູນກາງພັກ ຫົວໜ້າອົງການໄອຍະການປະຊາຊົນສູງສຸດ ຮອງປະທານຄະນະກໍາມະການອະໄພຍະໂທດລະດັບຊາດ ຜູ້ປະຈໍາການ ໄດ້ລາຍງານຕໍ່ກອງປະຊຸມວ່າ: ນັບແຕ່ປີ 2021-2025 ຕະຫຼອດໄລຍະ 5 ປີທີ່ຜ່ານມາ ຄະນະກໍາມະການອະໄພຍະໂທດ ລະດັບຊາດ, ກະຊວງ, ນະຄອນຫຼວງ ແລະ ແຂວງ ໄດ້ພ້ອມກັນຈັດຕັ້ງປະຕິບັດນະໂຍບາຍມະນຸດສະທຳຂອງພັກ ແລະ ລັດຖະບານ, ບັນດາຂະແໜງການທີ່ຮັບຜິດຊອບວຽກງານອະໄພຍະໂທດທຸກຂັ້ນໄດ້ສຸມໃສ່ຈັດຕັ້ງປະຕິບັດເຂົ້າສູ່ວຽກງານຕົວຈິງ ນັບແຕ່ສູນກາງລົງຮອດທ້ອງຖິ່ນຢ່າງກວ້າງຂວາງ ແລະ ເລິກເຊິ່ງ ເປັນຕົ້ນໄດ້ສ້າງ, ມີການປັບປຸງລັດຖະບັນຍັດ, ນິຕິກຳ ແລະ ຄໍາແນະນໍາ ແລະ ການຈັດຝຶກອົບຮົມ, ໂຄສະນາ, ເພື່ອສ້າງຄວາມເຂັ້ມແຂງໃຫ້ພະນັກງານທາງພາກລັດທີ່ກ່ຽວຂ້ອງນັບແຕ່ສູນກາງຮອດທ້ອງຖິ່ນ ດ້ວຍຫຼາຍຮູບແບບແບບເຊັ່ນ: ຂ່າວການເຄື່ອນໄຫວວຽກງານອະໄພຍະ ໂທດ, ລາຍການຄວາມຮູ້ທາງດ້ານກົດໝາຍ, ໂທລະພາບແຫ່ງຊາດ ແລະ ບັນດາສື່ສິ່ງພິມຕ່າງໆ ການໃຫ້ອະໄພຍະໂທດແກ່ນັກໂທດມີສອງປະເພດຄື: ການໃຫ້ອະໄພຍະໂທດຫຼຸດຜ່ອນໂທດ ແລະ ການໃຫ້ອະໄພຍະໂທດປ່ອຍຕົວ ຊຶ່ງໄດ້ຄົ້ນຄວ້າໃນໂອກາດວັນສຳຄັນຂອງຊາດ ໂດຍສະເພາະແມ່ນວັນຊາດທີ 2 ທັນວາ ຂອງແຕ່ລະປີ ແລະ ໄລຍະການລະບາດຂອງພະຍາດໂຄວິດ-19 ປີ 2019 ຊຶ່ງຮັບປະກັນໄດ້ຄວາມຖືກຕ້ອງ, ຄວາມໂປ່ງໃສ, ຄວາມຍຸຕິທໍາ ຕາມລັດຖະບັນຍັດ ຂອງປະທານປະເທດ ວ່າດ້ວຍການໃຫ້ອະໄພຍະໂທດ ຊຶ່ງສະແດງອອກຄື:
ນັກໂທດທີ່ໄດ້ຮັບການໃຫ້ອະໄພຍະໂທດແຕ່ປີ 2021-2025 ມີທັງໝົດ 11,402 ຄົນ ຍິງ 1,523 ຄົນ, ຕ່າງປະເທດ 151 ຄົນ ຍິງ 22 ຄົນ, ນັກໂທດປະຫານຊີວິດໄດ້ຮັບການຫຼຸດຜ່ອນໂທດມາເປັນໂທດຕະຫຼອດຊີວິດ ຈໍານວນ 106 ຄົນ ຍິງ 18 ຄົນ, ນັກໂທດຕະຫຼອດຊີວິດໄດ້ຮັບການຫຼຸດຜ່ອນໂທດລົງມາເປັນໂທດມີກໍານົດ 20 ປີຈໍານວນ 147 ຄົນ ຍິງ 26 ຄົນ, ໃນນີ້ນັກໂທດໄດ້ຮັບການຫຼຸດຜ່ອນໂທດມີ 10,130 ຄົນ ຍິງ 1,330 ຄົນ, ຕ່າງປະເທດ 137 ຄົນ ຍິງ 20 ຄົນ ແລະ ນັກໂທດໄດ້ຮັບການປ່ອຍຕົວມີ 1,166 ຄົນ ຍິງ 175 ຄົນ, ຕ່າງປະເທດ 14 ຄົນ ຍິງ 2 ຄົນ, ເປັນນັກໂທດຄະດີຢາເສບຕິດ 11,014 ຄົນ ຍິງ 1,454 ຄົນ, ຕ່າງປະເທດ 81 ຄົນ ຍິງ 6 ຄົນ ແລະ ນັກໂທດຄະດີທົ່ວໄປ 388 ຄົນ ຍິງ 69 ຄົນ, ຕ່າງປະເທດ 70 ຄົນ ຍິງ 16 ຄົນ ແລະ ຍັງໄດ້ຊຸກຍູ້ອົງການປະຕິບັດຄໍາຕັດສິນຂອງສານໃນການເກັບເງິນຄ່າປັບໃໝໄດ້ 24,346,152,051 ກີບ ແລະ ຄ່າເສຍຫາຍທາງແພ່ງໄດ້ 5,861,566,681 ກີບ, 1,260,200 ບາດ.
ໃນກອງປະຊຸມດັ່ງກ່າວ, ທ່ານ ຄໍາພັນ ພົມມະທັດ ໄດ້ໂອ້ລົມເນັ້ນໃຫ້ຄະນະກໍາມະການອະໄພຍະໂທດລະດັບຊາດ ຂະແໜງການຕ່າງໆແຕ່ສູນກາງລົງຮອດທ້ອງຖິ່ນ ຕ້ອງເອົາໃຈໃສ່ບາງບັນຫາດັ່ງນີ້: ສືບຕໍ່ເພີ່ມທະວີຄວາມຮັບຜິດຊອບ ໃນການປະຕິບັດໜ້າທີ່ວຽກງານຂອງຕົນໃຫ້ທັນຕາມກໍານົດເວລາ, ເຫັນໄດ້ເຖິງຄວາມສໍາຄັນຂອງການປະຕິບັດນະໂຍ
ບາຍອະໄພຍະໂທດໃຫ້ແກ່ນັກໂທດເອົາໃຈໃສ່ປະສານສົມທົບກັບພາກສ່ວນທີ່ກ່ຽວຂ້ອງ ເພື່ອໃຫ້ມີຂໍ້ມູນທີ່ຊັດເຈນຮັບໃຊ້ເຂົ້າໃນການຄົ້ນຄວ້າ ແລະ ນໍາສະເໜີຂັ້ນເທິງພິຈາລະນາທັນຕາມກຳນົດເວລາຍົກສູງການຄົ້ນຄວ້າພິຈາລະນານັກໂທດຜູ້ທີ່ສະເໜີຂໍອະໄພຍະໂທດຕ້ອງຮັບປະກັນຄວາມໂປ່ງໃສ, ຍຸຕິທໍາ, ຄັດເລືອກເອົານັກໂທດຜູ້ທີ່ປະພຶດໂຕດີ ແລະ ຮູ້ສຶກກິນແໜງຕໍ່ການກະທໍາຜິດຂອງຕົນແທ້ຈິງ ເອົາໃຈໃສ່ປະສານສົມທົບ ແລະ ເກັບກຳບັນດາຂໍ້ມູນຂອງນັກໂທດທີ່ສະເໜີອະໄພຍະໂທດໃຫ້ລະອຽດຄົບຖ້ວນ ຕາມຄວາມຮັບຜິດຊອບຂອງແຕ່ລະພາກສ່ວນ; ເອົາໃຈໃສ່ຄົ້ນຄວ້າກໍາແໜ້ນເນື້ອໃນຂອງກົດໝາຍ, ລັດຖະບັນຍັດ ວ່າດ້ວຍການໃຫ້ອະໄພຍະໂທດ ແລະ ນິຕິກໍາຕ່າງໆ ທີ່ກ່ຽວຂ້ອງກັບວຽກງານອະໄພຍະໂທດໃຫ້ເລິກເຊິ່ງ, ຈັດຕັ້ງປະຕິບັດໃຫ້ຖືກຕ້ອງ ແລະ ຄົບຖ້ວນ; ໂດຍສະເພາະບັນດາເງື່ອນໄຂ, ຂັ້ນຕອນ ແລະ ລະບຽບການພິຈາລະນາ ທີ່ນອນຢູ່ໃນລັດຖະບັນຍັດ ວ່າດ້ວຍການໃຫ້ອະໄພຍະໂທດ, ຄໍາແນະນໍາ, ແຈ້ງການຂອງ ຄະນະກໍາມະການອະໄພຍະໂທດ ລະດັບຊາດ; ມອບໃຫ້ຄະນະກຳມະການອະໄພຍະໂທດຂັ້ນກະຊວງ, ນະຄອນຫຼວງ ແລະ ບັນດາແຂວງ ເພື່ອໃຫ້ເອົາໃຈໃສ່ນຳສະເໜີຕໍ່ຄະນະນຳອົງການປົກຄອງທ້ອງຖິ່ນຂອງຕົນ ໃຫ້ຄວາມສຳຄັນສືບຕໍ່ປັບປຸງການໂຄສະນາດ້ວຍຫຼາຍຮູບແບບ, ທັນສະໄໝ ແລະ ເຂົ້າເຖິງກຸ່ມເປົ້າໝາຍຢ່າງກວ້າງຂວາງກວ່າເກົ່າ ເພື່ອເຮັດໃຫ້ທົ່ວສັງຄົມມີຄວາມຮັບຮູ້ເຂົ້າໃຈຢ່າງທົ່ວເຖິງ, ອົງການປົກຄອງທ້ອງຖິ່ນຕ້ອງໄດ້ເອົາໃຈໃສ່ຈັດສັນງົບປະມານພາຍໃນຂອງຕົນ ບວກໃສ່ກັບການຍາດແຍ່ງເອົາການສະໜັບສະໜູນຈາກອົງການຈັດຕັ້ງສາກົນ ແລະ ພາກສ່ວນທຸລະກິດ ເພື່ອປະກອບສ່ວນເຂົ້າໃນວຽກງານດັ່ງກ່າວ ແລະ ເພີ່ມທະວີໃນການສ້າງຄວາມສະດວກໃຫ້ແກ່ນັກໂທດ, ຍາດຕິພີ່ນ້ອງເຂົາເຈົ້າໃນການຊຳລະຄ່າປັບໃໝ, ຄ່າເສຍຫາຍທາງແພ່ງ, ຮັບປະກັນການມອບເງິນຄ່າເສຍຫາຍທາງແພ່ງ ໃຫ້ໂຈດທາງແພ່ງ ແລະ ການຖອກເງິນຄ່າປັບໃໝເຂົ້າຄັງເງິນແຫ່ງຊາດໃຫ້ຖືກຕ້ອງ ແລະ ຄົບຖ້ວນ.
ຂ່າວ-ພາບ:ບຸນຕອມ.
ຄໍາເຫັນ