ໃນໄລຍະ 6 ເດືອນຕົ້ນປີ ແລະວາງທິດທາງ 6 ເດືອນທ້າຍປີ 2024 ໄດ້ຈັດຂຶ້ນຫວ່າງບໍ່ດົນມານີ້ ທີ່ສະຖາບັນເລືອດແຫ່ງຊາດ ອົງການກາແດງແຫ່ງຊາດລາວ ໂດຍການເປັນປະທານຮ່ວມຂອງ ທ່ານຈັນທະລາ ສຸກສາຄອນ ຫົວໜ້າສະຖາບັນເລືອດແຫ່ງຊາດ, ທ່ານນາງ ບີນິຕ້າ ປູເດວຜູ້ຕາງໜ້າອົງການກາແດງສະວິດປະຈໍາລາວ, ມີບັນດາທ່ານທີ່ເຂົ້າຮ່ວມທີ່ກ່ຽວຂ້ອງຈາກ ກະຊວງສາທາລະນະສຸກ, ກະຊວງການຕ່າງປະເທດ ແລະ ໜ່ວຍງານທີ່ກ່ຽວຂ້ອງອື່ນໆ.
ທ່ານຈັນທະລາ ສຸກສາຄອນ ກ່າວວ່າ: ໃນໄລຍະ 6 ເດືອນຕົ້ນປີ 2024 ປີທີ3 ຂອງການຈັດຕັ້ງປະຕິບັດໂຄງການ ແມ່ນໄດ້ບັນລຸໃນການຈັດຕັ້ງປະຕິບັດກິດຈະກຳ ຢ່າງຫຼວງຫຼາຍຕາມແຜນທີ່ວາງໄວ້ໂດຍພາຍໃຕ້ການຊີ້ນໍາ-ນຳພາຢ່າງເຂັ້ມແຂງຈາກຫົວໜ້າສະຖາບັນເລືອດແຫ່ງຊາດ ແລະ ການສະໜັບສະໜູນຂອງຜູ້ຊ່ວຍໂຄງການ. ກິດຈະກຳທີ່ສໍາຄັນທີ່ປະຕິບັດໄດ້ ລວມມີຈັດກອງປະຊຸມວາງແຜນປະຈຳປີ ກ່ຽວກັບການຈັດຫາເລືອດຢູ່ຂັ້ນສູນກາງ ແລະ ຂັ້ນແຂວງຮ່ວມກັບກຸ່ມເປົ້າໝາຍຫຼາຍພາກສ່ວນ, ການໂຄສະນາປຸກລະດົມການບໍລິຈາກເລືອດໃນຊຸມຊົນ ແລະ ການຝຶກອົບຮົມການປ່ຽນແປງພຶດຕິກຳ ທີ່ສຸມໃສ່ການບໍລິຈາກເລືອດແບບສະໝັກໃຈໂດຍບໍ່ຮຽກຮ້ອງສິ່ງຕອບແທນ. ຂະບວນການດັ່ງກ່າວໄດ້ເຮັດໃຫ້ສາມາດຮັບການບໍລິຈາກເລືອດໄດ້ 35.540 ຖົງ, ບັນລຸໄດ້ 91% ທຽບໃສ່ໂຕເລກຄາດໝາຍສູ້ຊົນໃນ 6 ເດືອນ ຕົ້ນປີ 2024ແມ່39.000 ຖົງ.
ສໍາລັບແຜນາການ 6 ເດືອນທ້າຍປີ 2024 (ປີທີ3) ຊຶ່ງເປັນປີສຸດທ້າຍຂອງການປະຕິບັດໂຄງການ, ຈະໄດ້ມີການສືບຕໍ່ປັບປຸງການຄຸ້ມຄອງຄຸນນະພາບການບໍລິການເລືອດ, ລວມທັງການສະຫຼຸບຄູ່ມືການປະຕິບັດຂັ້ນຕອນການດໍາເນີນງານມາດຕະຖານ SOPs. ປະຕິບັດການກວດກາພາຍໃນຢ່າງເປັນປົກກະຕິ, ການຝຶກອົບຮົມຄືນທາງດ້ານວິຊາການໃນການບໍລິການເລືອດປອດໄພຮອບດ້ານ ໃຫ້ແກ່ພະນັກງານວິຊາການຂັ້ນແຂວງ ແລະ ຜົນສໍາເລັດການຮັບໜັງສືຢັ້ງຢືນຄຸນນະພາບການບໍລິການເລືອດຈາກໜ່ວຍງານສະມາຄົມວິຊາການທະນາຄານເລືອດອາເມຣິກາ (AABB Certificate in Quality). ດ້ານພື້ນຖານໂຄງລ່າງ ແລະ ການບຳລຸງຮັກສາອຸປະກອນການແພດ ກໍໄດ້ຮັບການປັບປຸງ ໂດຍການລົງນາມໃນຂໍ້ຕົກລົງຮ່ວມກັບສູນສະໜອງຢາ ແລະ ອຸປະກອນການແພດ ຂອງກະຊວງສາທາລະນະສຸກ MOH. ໄດ້ເລີ່ມດໍາເນີນການກໍ່ສ້າງສູນເລືອດແຂວງສາລະວັນ ແລະ ການຈັດຊື້ອຸປະກອນທີ່ຈຳເປັນເຊັ່ນ: ອຸປະກອນໄອທີ ແລະ ອື່ນໆ. ນອກຈາກນັ້ນ, ກໍໄດ້ສ້າງຕັ້ງການຮ່ວມມືທີ່ເຂັ້ມແຂງ ກັບຜູ້ໃຫ້ທຶນໃນໂຄງການໃໝ່, ລວມທັງໂຄງການ ທີ່ໄດ້ຮັບທຶນຈາກຄູ່ຮ່ວມພັດທະນາອື່ນໆ. ການຮ່ວມມືເຫຼົ່ານີ້ຈະເພີ່ມທະວີການ ພັດທະນາການບໍລິການເລືອດແຫ່ງຊາດໃນ ສປປລາວ ຢ່າງຫຼວງຫຼາຍ.
(ຂ່າວ: ແສງຈັນ)
ຄໍາເຫັນ