 |
ທ່ານ ນາງ ສວນສະຫວັນ ວິຍະເກດ ກ່າວວ່າ: ກອງປະຊຸມຄັ້ງນີ້, ມີຄວາມໝາຍ ຄວາມສຳຄັນຫຼາຍເພາະວຽກງານການກວດກາ ແມ່ນພາລະບົດບາດຕົ້ນຕໍ ໃນການນໍາພາ-ຊີ້ນໍາຂອງພັກ ແລະ ການຄຸ້ມຄອງຂອງລັດ ມະຕິກອງປະຊຸມໃຫຍ່ຄັ້ງທີ XI ຂອງພັກໄດ້ກຳນົດວ່າ: ພັກເຮົາຍາມໃດກໍຖືວ່າວຽກງານກວດກາ ຕິດພັນກັບວຽກງານກໍ່ສ້າງໜ່ວຍພັກ ປອດໃສ ເຂັ້ມແຂງ ໜັກແໜ້ນ ເປັນໜຶ່ງໃນພາລະບົດບາດ ແລະ ແບບແຜນການນຳພາຂອງພັກ ”ບໍ່ມີການກວດກາ ກໍໝາຍຄວາມວ່າບໍ່ມີການນຳພາ”; ຄືໄດ້ຮັບຮູ້ນໍາກັນແລ້ວວ່າ ປີ 2026 ເປັນປີເລີ່ມຕົ້ນໃນການຜັນຂະຫຍາຍມະຕິກອງປະຊຸມໃຫຍ່ຄັ້ງທີ XII ຂອງພັກ ກໍຄືແຜນພັດທະນາເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ X ຈຶ່ງມີຄວາມຈໍາເປັນ ຕ້ອງໄດ້ຮັບການປະຕິບັດຢ່າງແຂງແຮງໃນຂົງເຂດວຽກງານກວດກາ ແລະ ໃນ 1 ປີຜ່ານມາ, ຄະນະປະຈຳພັກ, ຄະນະພັກຮາກຖານ, ຄະນະໜ່ວຍພັກ, ລັດວິສາຫະກິດ ພ້ອມດ້ວຍສະມາຊິກພັກ, ພະນັກງານ-ລັດຖະກອນທົ່ວກະຊວງ ວທ ໄດ້ດໍາເນີນການເຄື່ອນໄຫວວຽກງານຕາມພາລະບົດບາດຂອງຕົນຢ່າງຫ້າວຫັນ, ສຸມໃສ່ວຽກງານຕາມມະຕິຂອງສະພາແຫ່ງຊາດ, ປະຕິບັດການກວດກາຕາມປະກົດການ ການລະເມີດຕາມຄໍາຮ້ອງ-ຄໍາສະເໜີ ແລະ ຕາມການຕົກລົງມອບໝາຍ. ກອງປະຊຸມຄັ້ງນີ້, ຈະໄດ້ພ້ອມກັນລົງເລິກຄົ້ນຄວ້າປຶກສາຫາລື ແລະ ປະກອບຄຳຄິດ-ຄຳເຫັນຕໍ່ຮ່າງບົດສະຫຼຸບຕີລາຄາການເຄື່ອນໄຫວວຽກງານຕິດຕາມ, ກວດກາພັກ, ກວດກາລັດ, ເພື່ອສະກັດກັ້ນ ແລະ ຕ້ານການສໍ້ລາດບັງຫຼວງ, ວຽກຄົ້ນຄວ້າພິຈາລະນາຄຳຮ້ອງ-ຄຳສະເໜີ, ການຕິດຕາມ-ກວດກາ ການແກ້ໄຂຜົນຂອງການກວດກາ ແລະ ຍັງຈະໄດ້ຮັບຟັງການສະເໜີ ແລະ ແນະນຳບາງເນື້ອໃນເອກະສານທີ່ສຳຄັນຈຳນວນໜຶ່ງ ເພື່ອເປັນບ່ອນອີງໃຫ້ຄະນະກວດກາໃນການຈັດຕັ້ງປະຕິບັດວຽກງານຂອງຕົນ.
ໃນກອງປະຊຸມ, ບັນດາຜູ້ແທນຈະໄດ້ສຸມສະຕິປັນຍາເຂົ້າໃສ່ໃນການຄົ້ນຄວ້າ ແລະ ເປັນເຈົ້າການປະກອບຄໍາຄິດ-ຄໍາເຫັນໃຫ້ເລິກເຊິ່ງ, ກົງໄປກົງມາ ເຮັດໃຫ້ເນື້ອໃນຂອງກອງປະຊຸມມີຄວາມຈະແຈ້ງ, ຮັດກຸມ, ຄົບຖ້ວນ. ພ້ອມກັນນັ້ນ, ໃນເມື່ອເຫັນຈຸດອ່ອນ-ຂໍ້ຄົງຄ້າງ ແລະ ສາເຫດຂອງບັນຫາຕ່າງໆແລ້ວ ຕ້ອງໄດ້ຄົ້ນຄວ້າຊອກຫາທິດທາງ ແລະ ວິທີການແກ້ໄຂບັນຫາໃຫ້ຖືກຈຸດ ແທດເໝາະກັບສະພາບຕົວຈິງຂອງຂະແໜງການຕົນດ້ວຍຄວາມຮັບຜິດຊອບສູງ.
ຂ່າວ-ພາບ: ບຸນອູ້ມ
ຄໍາເຫັນ