ທ່ານ ອ່ອນມະນີວັນ ຈັນດາວົງ ຮອງປະທານຄະນະກວດກາພັກແຂວງ ລາຍງານວ່າ: ການຈັດຕັ້ງປະຕິບັດວຽກງານກວດກາທົ່ວແຂວງເຊກອງ ປະຈໍາປີ 2024 ຜ່ານມາ ໄດ້ຮັບຜົນສໍາເລັດ ເປັນຢ່າງດີ ໂດຍສະເພາະ ເອົາໃຈໃສ່ຕິດຕາມ, ກວດກາ ແລະ ຊຸກຍູ້ການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ XI ຂອງພັກ, ມະຕິກອງປະຊຸມ ໃຫຍ່ຂັ້ນຂອງຕົນ, ຕິດຕາມການຜັນຂະຫຍາຍ ແລະ ຈັດຕັ້ງປະຕິບັດ 2 ວາລະແຫ່ງຊາດ, ກອງປະຊຸມວຽກງານກວດກາ ທົ່ວປະເທດ ຄັ້ງທີ IV ແລະ ຄໍາສັ່ງແນະນໍາ ຂອງຄະນະເລຂາທິການສູນກາງພັກ ເລກທີ 169/ຄລສພ, ຄຽງຄູ່ກັນນີ້ໄດ້ເອົາໃຈໃສ່ວຽກງານລັດຢ່າງຕັ້ງໜ້າ. ໃນນີ້, ຕິດຕາມ, ກວດກາໂຄງການລົງທຶນຂອງລັດ ຊຶ່ງໄດ້ກວດກາໂຄງການລົງທຶນຂອງລັດ ທີ່ມີມູນຄ່າ 10 ຕື້ກີບລົງມາຢູ່ແຂວງເຊກອງທັງໝົດ 31 ໂຄງການ ມູນຄ່າຕາມສະພາຮັບຮອງ 149,329,450,000 ກີບ, ຊໍາລະແລ້ວ 94,169,800,000 ກີບ, ຍັງຄ້າງ 54,556,683,567 ກີບ. ສືບຕໍ່ຕິດຕາມ, ກວດກາໂຄງການລົງທຶນຂອງລັດເລີ່ມແຕ່ຫົວທີ ທີ່ນອນໃນເປົ້າໝາຍກວດກາຂອງອົງການ ກວດກາລັດແຂວງ ຈຳນວນ 6 ໂຄງການ, ສະເພາະປີ 2024 ສາມາດກວດກາໄດ້ 3 ໂຄງການ, ເຫັນວ່າ 2 ໂຄງການ ແມ່ນຈັດຕັ້ງປະຕິບັດສໍາເລັດ 100%. ສ່ວນ 1 ໂຄງການ ແມ່ນກໍາລັງສືບຕໍ່ຈັດຕັ້ງປະຕິບັດ, ສື່ບຕໍ່ຮ່ວມກັບຄະນະກຳມະການສະເພາະກິດຂັ້ນແຂວງ ຈັດຕັ້ງເຜີຍແຜ່, ເຊື່ອມຊຶມແຈ້ງການຂອງຫ້ອງວ່າການ ສໍານັກງານນາຍົກລັດຖະມົນຕີ ເລກທີ 978/ຫສນຍ ແລະ ຄໍາສັ່ງ 04/ຊກ ຢູ່ 3 ເມືອງ ກ່ຽວກັບການຄຸ້ມຄອງ ການຂຸດຄົ້ນແຮ່ທາດ. ພ້ອມທັງດໍາເນີນການກວດກາ ແລະ ສາມາດແກ້ໄຂບັນຫາດັ່ງກ່າວໄດ້ສໍາເລັດ, ເອົາໃຈໃສ່ຕິດຕາມກວດກາສະມາຊິກພັກ-ພະນັກງານທີ່ກະທຳຜິດຕໍ່ລະບຽບກົດໝາຍ ແລະ ແກ້ໄຂບັນຫາເຫຼົ່ານີ້ສຳເລັດໂດຍພື້ນຖານ.
ກອງປະຊຸມຄັ້ງນີ້, ຍັງໄດ້ຜ່ານຮ່າງແຜນພັດທະນາວຽກງານກວດກາ 2026-2030, ສະເໜີລະບຽບວ່າດ້ວຍການຮັກສາເອກະສານ ກ່ຽວກັບການກວດກາ ສະບັບເລກທີ 138/ອກຫລ, ລົງວັນທີ 9 ເມສາ 2025, ສະເໜີຮ່າງຍຸດທະສາດ ແລະ ແຜນງານການຈັດຕັ້ງປະຕິບັດຍຸດທະສາດຕ້ານການສໍ້ລາດບັງຫຼວງແຕ່ປີ 2025-2030 ແລະ ປະກອບຄໍາຄິດຄໍາເຫັນຢ່າງກົງໄປກົງມາຕໍ່ບັນຫາຂໍ້ຄົງຄ້າງໃຫ້ໄດ້ຮັບການແກ້ໄຂສຳເລັດດ້ວຍດີ ແລະ ໄດ້ມອບໃບຍ້ອງຍໍ ຂອງທ່ານເຈົ້າແຂວງ ໃຫ້ຜູ້ທີ່ທີ່ຜົນງານໃນການຈັດຕັ້ງປະຕິບັດວຽກງານກວດກາ 40 ປີ.
(ຂາວ-ພາບ: ອັດສະວິນ)
ຄໍາເຫັນ