 |
ສະຫາຍ ພົນເອກ ຄຳລຽງ ອຸທະໄກສອນ ກ່າວວ່າ: ກອງປະຊຸມຄັ້ງນີ້, ຈະໄດ້ພ້ອມກັນສັງເກດ-ຕີລາຄາການຈັດຕັ້ງປະຕິບັດວຽກງານໃນປີຜ່ານມາ ໂດຍສະເພາະ 4 ໜ້າທີ່ໃຫຍ່ 26 ແຜນງານ ທີ່ຄະນະພັກກະຊວງວາງອອກ ຕິດພັນກັບແຜນການນໍາພາຂອງບັນດາຄະນະພັກແຕ່ລະຂັ້ນໃນປີຜ່ານມາ ເພື່ອຄວາມເປັນເອກະພາບໃນການປັບປຸງກໍ່ສ້າງພັກ, ກໍ່ສ້າງກອງທັບໃຫ້ມີການຫັນປ່ຽນໃໝ່ຢ່າງຕັ້ງໜ້າ ແລະ ພ້ອມກັນຄົ້ນຄວ້າເປັນເອກະພາບທິດທາງແຜນການນໍາພາ ທີ່ຈະສຸມໃສ່ຈັດຕັ້ງປະຕິບັດໃນປີ 2026. ໃນການຄົ້ນຄວ້າຕ້ອງຍົກສູງຈິດໃຈຄວາມເປັນເຈົ້າການ, ເສີມຂະຫຍາຍປະຊາທິປະໄຕ ແລະ ມີຄວາມຮັບຜິດຊອບໃນການເບິ່ງບັນຫາ, ຕີລາຄາສະພາບການຢ່າງພາວະວິໄສ, ຕ້ອງເບິ່ງຄືນບັນດາໜ້າວຽກທີ່ເຮັດໄດ້ ແລະ ບັນຫາທີ່ຫຍໍ້ທໍ້-ຄົງຄ້າງ ເພື່ອກຳນົດທິດທາງນໍາພາໃນຕໍ່ໜ້າໃຫ້ແທດເໝາະກັບສະພາບຕົວຈິງຂອງພັກ, ຂອງກອງທັບເຮົາໃຫ້ມີການຫັນປ່ຽນທີ່ຕັ້ງໜ້າຫຼາຍຂຶ້ນ ແລະ ເກີດໝາກຜົນຕົວຈິງ. ຮຽກຮ້ອງໃຫ້ບັນດາສະຫາຍ ຕ້ອງຍົກສູງຄວາມຮັບຜິດຊອບ ເປັນເຈົ້າການສຸມສະຕິປັນຍາເຂົ້າໃນການຄົ້ນຄວ້າ, ຍົກໃຫ້ເຫັນບັນຫາເພື່ອປັບປຸງແກ້ໄຂ ແລະ ປະກອບຄຳເຫັນໃສ່ເນື້ອໃນຕ່າງໆ ຂອງກອງປະຊຸມໃນຄັ້ງນີ້ໃຫ້ມີຜົນສຳເລັດເປັນຢ່າງດີ.
 |
ຈາກນັ້ນ, ສະຫາຍ ພົນໂທ ສາຍໃຈ ກົມມະສິດ ກຳມະການສູນກາງພັກ ຮອງເລຂາຄະນະພັກກະຊວງປ້ອງກັນປະເທດ ຮອງລັດຖະມົນຕີ ຫົວໜ້າກົມໃຫຍ່ເສນາທິການກອງທັບ ໄດ້ສະຫຼຸບຕີລາຄາຄືນການນຳພາຮອບດ້ານ ຂອງຄະນະບໍລິຫານງານພັກກະຊວງປ້ອງກັນປະເທດປະຈຳປີ 2025 ແລະ ທິດທາງແຜນການປີ 2026 ຍົກໃຫ້ເຫັນບັນດາຜົນງານ, ຜົນສຳເລັດ ແລະ ບັນດາຂໍ້ຄົງຄ້າງຕ່າງໆ ໃນການຈັດຕັ້ງປະຕິບັດວຽກງານນຳພາຮອບດ້ານໃນປີ 2025 ຜ່ານມາ. ພາຍໃຕ້ການຊີ້ນໍາຢ່າງໄກ້ສິດຕິດແທດຂອງກົມການເມືອງສູນກາງພັກ, ຄະນະພັກກະຊວງປ້ອງກັນປະເທດ ໄດ້ພ້ອມກັບບັນດາສະຫາຍຄະນະພັກແຕ່ລະຂັ້ນ ຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ, ມະຕິກອງປະຊຸມໃຫຍ່ ຄັ້ງທີ VI ຂອງອົງຄະນະພັກກະຊວງເປັນແນວທາງອັນລະອຽດສູ່ກົມກອງໃນທົ່ວກອງທັບ, ເຮັດໃຫ້ບັນດາວຽກງານຈຸດສຸມຂອງກະຊວງປ້ອງກັນປະເທດມີຜົນສໍາເລັດຫຼາຍດ້ານ ສາມາດແກ້ໄຂໜໍ່ແໜງກໍ່ຄວາມບໍ່ສະຫງົບໄດ້ຢ່າງທັນເວລາ, ຮັບປະກັນໃຫ້ປະເທດຊາດມີຄວາມສະຫງົບສັງຄົມມີຄວາມເປັນລະບຽບຮຽບຮ້ອຍ ເຮັດໃຫ້ບົດບາດຂອງກອງທັບພົ້ນເດັ່ນຂຶ້ນໃນເວທີສາກົນ, ເປັນກຳລັງຫຼັກ ແຫຼ່ງໃຫ້ພັກ-ລັດໃນການສ້າງສາພັດທະນປະເທດຊາດ, ຮັບປະກັນໃຫ້ປະເທດຊາດມີຄວາມສະຫງົບປອດໄພ, ຈັດຕັ້ງກໍາລັງກ້ອນສວນສະໜາມສະເຫຼີມສະຫຼອງວັນສໍາຄັນຂອງພັກ, ຂອງຊາດທັງພາຍໃນ ແລະ ຕ່າງປະເທດສ້າງໄດ້ຄວາມເຊື່ອໝັ້ນ, ຄວາມໄວ້ວາງໃຈຈາກການນໍາພັກ-ລັດ ກໍຄືປະຊາຊົນບັນດາເຜົ່າ.
ຂ່າວ: ກະຊວງປ້ອງກັນປະເທດ
ຄໍາເຫັນ