 |
ການຄັດເລືອກໄດ້ມີ ຄະນະກຳມະການຫຼາຍທ່ານ ເປັນຕົ້ນຄື: ທ່ານ ນາງ ປານີ ໄຊຍະວົງ ຜູ້ອໍານວຍການແຟຊັ້ນວີກ; ພ້ອມນີ້, ກໍມີບັນດາທ່ານທູຕານຸທູດ ແລະ ແຂກຖືກເຊີນຈາກພາຍໃນ ແລະ ຕ່າງປະເທດເຂົ້າຮ່ວມ. ຄະນະກຳມະການໄດ້ໃຫ້ນັກອອກແບບໜຸ່ມນ້ອຍລາວ ຈາກ 13 ຫ້ອງເສື້ອ ແລະ ນັກອອກແບບທີ່ຍັງເປັນນັກສຶກສາ ທີ່ຜ່ານການຄັດເລືອກມາຂຶ້ນລາຍງານກ່ຽວກັບການອອກແບບຂອງຕົນ ແລະ ເລືອກເອົາ 5 ນັກອອກແບບທີ່ດີເດັ່ນທີ່ສຸດ ຊຶ່ງຕ້ອງແມ່ນການອອກແບບທີ່ນຳໃຊ້ແຜ່ນແພລາວ ຈາກຜູ້ຜະລິດແຜ່ນແພທ້ອງຖິ່ນ ແລະ ສະມາຊິກຂອງສະມາຄົມຫັດຖະກຳລາວເພື່ອເພີ່ມຄຸນຄ່າໃຫ້ແກ່ແຜ່ນແພລາວ, ສົ່ງເສີມວັດທະນະທຳ ການຕ່ຳແຜ່ນ ແລະ ຜະລິດແຜ່ນແພທ້ອງຖິ່ນ, ເສີມສ້າງເຄືອຂ່າຍທຸລະກິດ ແລະ ສ້າງລາຍຮັບໃຫ້ຊຸມຊົນ, ນໍາເອົາແຜ່ນແພລາວ ກ້າວສູ່ຕະຫຼາດແຟຊັ້ນຂອງໂລກ.
ຜ່ານການຄັດເລືອກ, ເລືອກໄດ້ 5 ນັກອອກແບບໜຸ້ມນ້ອຍຄື: ນາງ ລໍາໄພ ພົມສຸວັນ, ທ້າວ ຂັນໄຊ ເທມພູຄໍາ, ທ້າວ ອານຸສັກ ໄຊຍະສອນ, ທ້າວ ສຸກນິລັນ ສິງຫາລາດ ແລະ ທ້າມ ສິລິໄຊ ສຸກຫາຜົນ ຊຶ່ງ 5 ນັກອອກແບບໜຸ່ມນ້ອຍນີ້ ຈະມີໂອກາດໄປສຶກສາ ແລະ ຝຶກອົບຮົມໃນບັນດາສະຖາບັນແຟຊັ້ນທີ່ມີຊື່ສຽງຂອງໂລກ ເຊັ່ນ: ເອັດໂມດ (ESMOD Paris) ທີ່ປະເທດຝຣັ່ງ, ນາຝາ (NAFA) ທີ່ສິງກະໂປ, ວິທະຍາໄລລອນດອນ ອອກແບບ ແລະ ແຟຊັ້ນ (London College of Designs & Fashion) ທີ່ຮ່າໂນຍ, ສະຖາບັນແຟຊັ້ນຂອງຟິລິປິນ (Fashion Institute of Philippines) ທີ່ມະນີລາ ແລະ ຫ້ອງເສື້ອຊັ້ນນຳ ທີ່ບາງກອກ ປະເທດໄທ.
ໂຄງການສົ່ງເສີມນັກອອກແບບໜຸ່ມນ້ອຍຂອງລາວ ເປັນໂຄງການທີ່ບໍ່ມີຜົນກຳໄລ ຂອງລາວແຟຊັ້ນວີກ, ສ້າງຕັ້ງຂຶ້ນໄດ້ 12 ປີແລ້ວ ແລະ ໄດ້ສ້າງນັກອອກແບບຈໍານວນ 40 ກວ່າຄົນ ເພື່ອພັດທະນາ ຊັບພະຍາກອນບຸກຄົນ ທີ່ມີປະສິດທິພາບໃຫ້ແກ່ວົງການແຟຊັ້ນຂອງລາວ ໂດຍການໃຫ້ໂອກາດແກ່ໄວໜຸ່ມລາວທີ່ມີພອນສະຫວັນ ໄດ້ໄປຮ່ຳຮຽນ ແລະ ຝຶກອົບຮົມ ດ້ານແຟຊັ້ນ ໂດຍມີການຮ່ວມມືຢ່າງໃກ້ຊິດ ກັບບັນດາສະຖາບັນແຟຊັ້ນທີ່ມີຊື່ສຽງຕ່າງໆຂອງໂລກ ແລະ ອົງການຈັດຕັ້ງຂອງລັດຖະບານຂອງສາກົນ ເປັນຕົ້ນແມ່ນສະຖານທູດຝຣັ່ງປະຈຳລາວ, ສະຖາບັນ Campus France ປະຈຳລາວ ຊຶ່ງເປັນໜ່ວຍງານທີ່ຊ່ວຍເຫຼືອນັກສຶກສາ ໃນການວາງແຜນການສຶກສາຕໍ່ໃນປະເທດຝຣັ່ງ, ສະຖານທູດສິງກະໂປປະຈໍາລາວ, ສະຖານທູດຟິລິປີນປະຈໍາລາວ ແລະ ອີກຫຼາຍໆພາກສ່ວນ.
(ຂ່າວ: ແສງຈັນ)
ຄໍາເຫັນ