 |
ໃນໂອກາດນີ້, ກອງປະຊຸມໄດ້ຮັບຟັງການນຳສະເໜີຮ່າງລາຍງານການເມືອງ, ຮ່າງສະຫຼຸບການຈັດຕັ້ງປະຕິບັດແຜນພັດທະນາວຽກງານກໍາມະບານ 5 ປີ ຜ່ານມາ ແລະ ທິດທາງແຜນການ 5 ປີຕໍ່ໜ້າ ແລະ ບົດສໍາຫຼວດການນໍາພາລວມຂອງຄະນະບໍລິຫານງານສະຫະພັນກໍາມະບານ ຫສນຍ ສະໄໝທີ IV ໃນໄລຍະ 5 ປີຜ່ານມາ ຊຶ່ງໄດ້ຕີລາຄາຜົນສຳເລັດ-ດ້ານດີ, ດ້ານອ່ອນ-ຂໍ້ຄົງຄ້າງ, ສາເຫດທີ່ພາໃຫ້ມີດ້ານດີ-ດ້ານອ່ອນ-ຂໍ້ຄົງຄ້າງ, ບົດຮຽນທີ່ຖອດຖອນໄດ້ ແລະ ທິດທາງແຜນການໃນຕໍ່ໜ້າຂອງສະຫະພັນກຳມະບານ ຫສນຍ. ສຳລັບຜົນສຳເລັດອັນພົ້ນເດັ່ນ ເຫັນວ່າຄະນະບໍລິຫານງານສະຫະພັນກໍາມະບານ ຫສນຍ ໄດ້ຕັ້ງໜ້າເອົາໃຈໃສ່ຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ IV ຂອງຕົນ, ມະຕິກອງປະຊຸມໃຫຍ່ ຄັ້ງທີ V ຂອງອົງຄະນະພັກ ຫສນຍ, ມະຕິກອງປະຊຸມໃຫຍ່ຂອງສູນກາງສະຫະພັນກໍາມະບານລາວ ຄັ້ງທີ VIII, ລວມເຖິງການປະຕິບັດຂໍ້ແຂ່ງຂັນ 5 ເປັນເຈົ້າ ຂອງສະຫະພັນກໍາມະບານລາວ ເຂົ້າສູ່ການເຄື່ອນໄຫວວຽກງານວິຊາສະເພາະ ແລະ ການດຳລົງຊີວິດຕົວຈິງ ໃນຂົງເຂດວຽກງານທີ່ຕົນຮັບຜິດຊອບ ຊຶ່ງໄດ້ຮັບຜົນສໍາເລັດຢ່າງຈົບງາມຫຼາຍດ້ານ. ອັນສຳຄັນ, ພາຍໃຕ້ການນໍາພາຂອງອົງຄະນະພັກ ຫສນຍ, ສູນກາງສະຫະພັນກໍາມະບານລາວ ແລະ ຄະນະບໍລິຫານງານສະຫະພັນກໍາມະບານ ຫສນຍ ໄດ້ເຮັດໃຫ້ຖັນແຖວສະມາຊິກກໍາມະບານ, ພະນັກງານ-ລັດຖະກອນ ພາຍໃນການຈັດຕັ້ງ ຫສນຍ ມີແນວຄິດທຸ່ນທ່ຽງ, ຕັ້ງໜ້າເຮັດໜ້າທີ່ການເມືອງຂອງຕົນດ້ວຍຄວາມເປັນເຈົ້າການສູງ ສາມາດຕອບສະໜອງໄດ້ດ້ານວິຊາສະເພາະ ຕາມຄວາມຮຽກຮ້ອງຕ້ອງການຂອງການນຳພັກ - ລັດຖະບານ ດີສົມຄວນ.
ໃນໂອກາດດຽວກັນ, ສະຫາຍ ບົວຄົງ ນາມມະວົງ ໄດ້ມີຄໍາເຫັນຕໍ່ກອງປະຊຸມ ໂດຍໄດ້ສະແດງຄວາມຊົມເຊີຍຕໍ່ບັນດາຜົນສໍາເລັດ ທີ່ສະຫະພັນກໍາມະບານ ຫສນຍ ສ້າງມາໄດ້ຕະຫຼອດໄລຍະຜ່ານມາ, ພ້ອມທັງໄດ້ໃຫ້ທິດຊີ້ນໍາຕໍ່ຄະນະບໍລິຫານງານ ແລະ ສະມາຊິກສະຫະພັນກໍາມະບານ ຫສນຍ ເອົາໃຈໃສ່ເຄື່ອນໄຫວວຽກງານຕົນເອງ ໃຫ້ຖືກຕ້ອງຕາມກົດໝາຍ ແລະ ລະບຽບການ ຂອງສະຫະພັນກໍາມະບານລາວ, ສຶກສາອົບຮົມການເມືອງ-ແນວຄິດ, ເຊື່ອມຊຶມ, ກໍາແໜ້ນແນວທາງປ່ຽນແປງໃໝ່ຂອງພັກ, ຍົກສູງຄວາມສາມັກຄີ, ຄວາມຫ້າວຫັນ, ຄວາມກະຕືລືລົ້ນ ແລະ ຍົກລະດັບວິຊາສະເພາະຂອງຕົນ ເພື່ອສາມາດຕອບສະໜອງຄວາມຮຽກຮ້ອງຕ້ອງການຂອງວຽກງານໃນໄລຍະໃໝ່. ພ້ອມທັງເນັ້ນໃຫ້ຜູ້ແທນກອງປະຊຸມເອົາໃຈໃສ່ປະຕິບັດຄໍາແນະນໍາຂອງຄະນະຈັດຕັ້ງສູນກາງພັກ, ຍົກສູງຄວາມຮັບຜິດຊອບຂອງຕົນ ແລະ ຄົ້ນຄວ້າເລືອກເຟັ້ນເອົາຄະນະບໍລິຫານງານສະຫະພັນກໍາມະບານ ຫສນຍ ຊຸດໃໝ່ ຢ່າງຖືກຕ້ອງ, ພາວະວິໄສ, ກວ້າງຂວາງ ແລະ ມີຄວາມເຊື່ອໝັ້ນຕໍ່ການຈັດຕັ້ງ ໂດຍພິຈາລະນາໃຫ້ລະອຽດຖີ່ຖ້ວນ ເພື່ອຮັບປະກັນຄວາມຖືກຕ້ອງຕາມມາດຕະຖານ, ເງື່ອນໄຂທີ່ກຳນົດໄວ້, ຮັບປະກັນໂຄງປະກອບບຸກຄະລາກອນດ້ານເພດ, ເຜົ່າ ແລະ ຮັບປະກັນ 3 ຮຸ່ນ (ຮຸ່ນອາວຸດໂສ, ຮຸ່ນກາງ ແລະ ຮຸ່ນໜຸ່ມ) ທີ່ສາມາດຂັບເຄື່ອນວຽກງານໃນ 5 ປີຕໍ່ໜ້າ.
ຫຼັງຈາກນັ້ນ, ຜູ້ແທນກອງປະຊຸມ ໄດ້ໃຊ້ສິດປະຊາທິປະໄຕຂອງຕົນປ່ອນບັດຄັດເລືອກເອົາ ຄະນະບໍລິຫານງານສະຫະພັນກໍາມະບານ ຫສນຍ ຊຸດໃໝ່ ຊຶ່ງມີຜູ້ສະໝັກເລືອກຕັ້ງ ຈຳນວນ 22 ສະຫາຍ ຍິງ 5 ສະຫາຍ, ເລືອກໄດ້ 15ສະຫາຍ ຍິງ 2 ສະຫາຍ. ຜ່ານການດໍາເນີນກອງປະຊຸມຄັ້ງປະຖົມມະລືກຂອງຄະນະບໍລິຫານງານສະຫະພັນກໍາມະບານ ຫສນຍ ຊຸດໃໝ່ ໄດ້ເປັນເອກະສັນກັນເລືອກເອົາ ສະຫາຍ ວິຣະພົງ ພົມດວງສີ ເປັນປະທານຄະນະບໍລິຫານງານສະຫະພັນກໍາມະບານ ຫສນຍ, ສະຫາຍ ພອນໄຊ ວິໄລທອງ ແລະ ສະຫາຍ ນາງ ນິວະລັດ ສົມວົງ ເປັນຮອງປະທານ, ພ້ອມກັນນັ້ນ ກອງປະຊຸມ ຍັງໄດ້ເລືອກເອົາສະຫາຍ ພອນໄຊ ວິໄລທອງ ເປັນປະທານກວດກາ ແລະ ສະຫາຍ ວິໄລທອງ ເທບວົງສາ ເປັນຮອງປະທານກວດກາ.
 |
ໃນຕອນທ້າຍ, ກອງປະຊຸມໃຫຍ່ຍັງໄດ້ຮັບຟັງການໂອ້ລົມຂອງ ສະຫາຍ ພອນສານ ວິໄລເມັ້ງ ຮອງປະທານຄະນະບໍລິຫານງານສູນກາງສະຫະພັນກຳມະບານລາວ ຊຶ່ງສະຫາຍໄດ້ຍ້ອງຍໍຊົມເຊີຍ ແລະ ຕີລາຄາສູງຕໍ່ຜົນສໍາເລັດຂອງສະຫະພັນກໍາມະບານ ຫສນຍ ທີ່ບຸກບືນສູ້ຊົນຍາດໄດ້ຜົນສໍາເລັດຢ່າງຕັ້ງໜ້າ ຕະຫຼອດໄລຍະ 5 ປີຜ່ານມາ, ພ້ອມທັງໄດ້ເນັ້ນໃຫ້ຄະນະບໍລິຫານງານສະຫະພັນກໍາມະບານ ຫສນຍ ຊຸດໃໝ່ ເອົາໃຈໃສ່ຕື່ມບາງດ້ານ ເປັນຕົ້ນສືບຕໍ່ເພີ່ມທະວີວຽກງານສຶກສາອົບຮົມການເມືອງ-ແນວຄິດ ໃຫ້ແກ່ສະມາຊິກກຳມະບານ ກໍຄືພະນັກງານ-ລັດຖະກອນ ຢ່າງເປັນປົກກະຕິ, ໃຫ້ສາມາດກຳແໜ້ນ ບັນດາມະຕິ, ຄຳສັ່ງ ແລະ ນິຕິກຳຕ່າງໆ ທີ່ພັກ-ລັດຖະບານ ແລະ ພາກສ່ວນກ່ຽວຂ້ອງວາງອອກ ໃນແຕ່ລະໄລຍະ, ພ້ອມທັງຢຶດໝັ້ນອຸດົມການສັງຄົມນິຍົມ, ມີທັດສະນະຊົົນຊັ້ນກຳມະກອນຢ່າງຖືກຕ້ອງ; ເອົາໃຈໃສ່ຝຶກຝົນຫຼໍ່ຫຼອມ, ເພີ່ມຄວາມຮູ້ຄວາມສາມາດຂອງຕົນເອງຢ່າງຮອບດ້ານ ໂດຍສະເພາະຄວາມຮູ້ທາງດ້ານທິດສະດີ, ພາສາຕ່າງປະເທດ ແລະ ອື່ນໆ ເພື່ອສ້າງສະມາຊິກກຳມະບານ ໃຫ້ມີຄວາມຮູ້ຄວາມສາມາດ, ກ້າເຮັດ-ກ້າຮັບຜິດຊອບ ແລະ ມີນໍ້າໃຈເສຍສະຫຼະ ເພື່ອຜົນປະໂຫຍດສ່ວນລວມ; ເອົາໃຈໃສ່ປັບປຸງແບບແຜນວິທີເຮັດວຽກຂອງຕົນ ບົນຫຼັກການລວມສູນປະຊາທິປະໄຕ ແລະ ເປັນເອກະພາບ ພາຍໃນໝູ່ຄະນະ; ພ້ອມກັນຈັດຕັ້ງຜັນຂະຫຍາຍ ມະຕິກອງປະຊຸມໃຫຍ່ຄັ້ງນີ້ ແລະ ຂໍ້ແຂ່ງຂັນ 5 ເປັນເຈົ້າ ຂອງສະຫະພັນກໍາມະບານ ເຂົ້າສູ່ຂົງເຂດວຽກງານຕ່າງໆ ໃຫ້ເກີດດອກອອກຜົນຕົວຈິງ; ປະເມີນຜົນງານການຈັດຕັ້ງປະຕິບັດ ຂໍ້ແຂ່ງຂັນ 5 ເປັນເຈົ້າ ໃນແຕ່ລະປີ ໃຫ້ພ້ອມກັນເຮັດຢ່າງເລິກເຊິ່ງ, ຈິງຈັງ, ຫຼີກລ່ຽງການປະເມີນແບບລວມໆ ຫຼື ສະເລ່ຍ; ສືບຕໍ່ຄົ້ນຄວ້າສ້າງ ແລະ ປັບປຸງນະໂຍບາຍຕ່າງໆ ເພື່ອປົກປ້ອງສິດ ແລະ ຜົນປະໂຫຍດ ຂອງສະມາຊິກກຳມະບານ ກໍຄືຊົນຊັ້ນກຳມະກອນ, ເຮັດໃຫ້ຊີວິດການເປັນຢູ່ຂອງສະມາຊິກກຳມະບານ ໄດ້ຮັບການປັບປຸງດີຂຶ້ນ, ທັງໃຫ້ຄົ້ນຄວ້າສ້າງກອງທຶນ ຊ່ວຍເຫຼືອຊຶ່ງກັນ ແລະ ກັນ ຕາມຄວາມ ເໝາະສົມ; ສືບຕໍ່ເຕົ້າໂຮມຄວາມສາມັກຄີ ໃຫ້ເປັນປຶກແຜ່ນແໜ້ນໜາ; ໃຫ້ຄະນະບໍລິຫານງານສະຫະພັນກຳມະບານ ຫສນຍ ຊຸດໃໝ່ ແບ່ງວຽກ, ແບ່ງຄວາມຮັບຜິດຊອບ ຢ່າງລະອຽດຈະແຈ້ງ, ພ້ອມກັນປະຕິບັດໜ້າທີ່ ທີ່ປະເທດຊາດ ແລະ ການຈັດຕັ້ງມອບໝາຍໃຫ້ ໃຫ້ມີຜົນສຳເລັດຕາມຄາດໝາຍທີ່ກຳນົດໄວ້ ເປັນຢ່າງດີ; ສືບຕໍ່ສ້າງຂະບວນການຂໍ່ານັບຮັບຕ້ອນກອງປະຊຸມໃຫຍ່ 3 ຂັ້ນຂອງພັກ ໃຫ້ເປັນຂະບວນການຟົດຟື້ນ ເພື່ອຍູ້ໜູນການຈັດຕັ້ງປະຕິບັດວຽກງານວິຊາສະເພາະ ໃຫ້ມີຜົນສຳເລັດ ຢ່າງສະຫງ່າງາມ.
ຂ່າວ: ກົມປະຊາສຳພັນ ຫສນຍ.
ຄໍາເຫັນ