ກອງປະຊຸມທົບທວນປະຈຳປີຍຸດທະສາດສຸຂະພາບຈະເລີນພັນ, ແມ່, ເດັກເກີດໃໝ່, ເດັກນ້ອຍ ແລະ ໄວໜຸ່ມປະຈຳປີ 2023 ພາຍໃຕ້ຫົວຂໍ້ “ທິດທາງປີສຸດທ້າຍຂອງແຜນຍຸດທະສາດ ແລະ ແຜນປະຕິບັດງານສຳ ລັບສຸຂະພາບຈະເລີນພັນ, ແມ່, ເດັກເກີດໃໝ່, ເດັກນ້ອຍ ແລະ ໄວໜຸ່ມ-ການເສີມສ້າງສັກກະຍະພາບໃນຄວາມເປັນຜູ້ນຳໃນຂັ້ນທ້ອງຖິ່ນ” ໄດ້ສຳເລັດລົງໃນວັນທີ 14 ທັນວາ ຜ່ານມາ ທີ່ໂຮງແຮມດອນຈັນພາເລດ ໂດຍການເປັນປະທານຂອງທ່ານ ສະໜອງ ທອງຊະນະ ຮອງລັດຖະມົນຕີກະຊວງສາທາລະນະສຸກ, ມີບັນດາອົງການຈັດ ຕັ້ງສາກົນ, ພະແນກສາທາລະນະສຸກ 17 ແຂວງ ແລະ ແຂກຖືກເຊີນເຂົ້າຮ່ວມ.
ທ່ານ ສະໜອງ ທອງຊະນະ ກ່າວວ່າ: ກອງປະຊຸມຄັ້ງນີ້ຈັດຂຶ້ນເພື່ອລາຍງານຄວາມຄືບໜ້າໃນປີ 2023 ກ່ຽວກັບການຈັດຕັ້ງປະຕິບັດຍຸດທະສາດແຫ່ງຊາດ ສຳລັບສຸຂະພາບຈະເລີນພັນ, ແມ່, ເດັກເກີດໃໝ່, ເດັກນ້ອຍ ແລະ ໄວໜຸ່ມປີ 2020-2025 ໂດຍຄະນະອະນຸກໍາມະການ ແລະ ແຜນການປີ 2024 ເພື່ອນຳສະເໜີແນວທາງການປະຕິບັດທີ່ດີຂອງການເປັນຜູ້ນຳຢູ່ຂັ້ນທ້ອງຖິ່ນ ໃນການປັບປຸງຂອດການບໍລິການສຸຂະພາບຈະເລີນພັນ, ແມ່ເດັກເກີດໃໝ່, ເດັກນ້ອຍ ແລະ ໄວໜຸ່ມ; ເພື່ອລາຍງານຂໍ້ມູນອັບເດດທີ່ສໍາຄັນກ່ຽວກັບບັນຫາຂອງລະບົບສາທາ ລະນະສຸກ ທີ່ຕິດພັນກັບຫຼາຍຂະແໜງການ ແລະ ຕິດຕາມຜົນການດຳເນີນການ; ເພື່ອຕົກລົງເຫັນດີກ່ຽວກັບ ແຜນການປະເມີນຜົນຂອງຍຸດທະສາດແຫ່ງຊາດ ສຳລັບສຸຂະພາບຈະເລີນພັນ, ແມ່, ເດັກເກີດໃໝ່, ເດັກນ້ອຍ ແລະ ໄວໜຸ່ມປີ 2016-2025; ເພື່ອຮຽນສ້າງແຜນກິດຈະກຳສໍາລັບປີ 2024 ໂດຍຜູ້ປະສານງານຂັ້ນທ້ອງຖິ່ນ ແລະ ຜູ້ປະສານງານຂອງຄູ່ຮ່ວມພັດທະນາຂັ້ນທ້ອງຖິ່ນ; ນໍາສະເໜີຂໍ້ມູນຂ່າວສານແກ່ພາກສວນກ່ຽວຂ້ອງເພື່ອເລັ່ງການຈັດຕັ້ງປະຕິບັດຍຸດທະສາດສຸຂະພາບຈະເລີນພັນ, ແມ່, ເດັກເກີດໃໝ່, ເດັກນ້ອຍ ແລະ ໄວໜຸ່ມ. ພ້ອມນີ້, ກອງປະຊຸມຍັງໄດ້ກຳນົດບັນດາກິດຈະກຳບູລິມະສິດທີ່ສໍາຄັນໃນໄລຍະ 2 ປີຕໍ່ໜ້າຂອງການປະເມີນຜົນ ແລະ ການພັດທະນາຍຸດທະສາດທີ່ໄດ້ປັບປຸງໃໝ່ຄື: ຈົ່ງສືບຕໍ່ປະຕິບັດວຽກງານທີ່ດີຫຼືສະຫຼຸບວຽກງານເກັບກໍາຂໍ້ມູນຕ່າງໆກ່ຽວກັບຕົວຊີ້ບອກຜົນກະທົບ, ການປົກຄຸມ, ຄຸນນະພາບ, ປະສິດທິພາບ ແລະ ຄວາມສະເໝີພາບເຊັ່ນ: ການສໍາຫຼວດຕົວຊີ້ວັດສັງຄົມລາວ 3 (LSIS3), ການປັບປຸງດ້ານການປະເມີນຄຸນນະພາບ ແລະ ການສະໜັບສະໜູນບັນດາໂຮງໝໍແຂວງ ແລະ ໂຮງໝໍຊຸມຊົນທີ່ໄດ້ກຳນົດ, ການລາຍງານ ແລະ ການສໍາຫຼວດຕ່າງໆໂດຍພະແນກການ ແລະ ຄູ່ຮ່ວມພັດທະນາທີ່ກ່ຽວຂ້ອງ, ສໍາລັບການເກັບກຳຂໍ້ມູນຂອງສະຖານທີ່ບໍລິການເປັນປົກກະຕິ, ຄວາມພະຍາຍາມໃນຂັ້ນທ້ອງຖິ່ນ ເພື່ອລວບລວມຂໍ້ມູນທີ່ມີຄຸນນະພາບເຂົ້າໃນລະບົບ DHIS2 ແມ່ນພາກສ່ວນໜຶ່ງທີ່ສໍາຄັນ ເພື່ອໃຫ້ວຽກງານການປະເມີນຄຸນນະພາບດໍາເນີນໄປດ້ວຍດີ. ວຽກງານນີ້ຈະໄດ້ຮັບການສະໜັບສະຫານຈາກຂັ້ນສູນກາງຢ່າງເຕັມທີ່ ເພື່ອຊ່ວຍໃຫ້ບຸກຄະລາການທ້ອງຖິ່ນໄດ້ມີການຈັດຕັ້ງປະຕິບັດຕາມແນວທາງການປັບປຸງຄຸນນະພາບຂອງຂໍ້ມູນສໍາລັບວຽກງານສຸຂະພາບຈະເລີນພັນ, ແມ່, ເດັກເກີດໃໝ່, ເດັກນ້ອຍ ແລະ ໄວໜຸ່ມ (RMNCAH) ຢ່າງຄ່ອງຕົວ. ບັນຫາສໍາຄັນຄືການແກ້ໄຂການເກັບກຳຂໍ້ມູນທີ່ໄດ້ລະບຸໄວ້ຊຶ່ງສາມາດແກ້ໄຂໃຫ້ຫຼຸດລົງໄດ້ກ່ອນທີ່ຈະເລີ່ມຂັ້ນຕອນການປະເມີນຜົນ, ບັນຫາທີ່ຄວນນຳມາພິຈະລະນາຢ່າງຍິ່ງແມ່ນການກວດຫາອັດຕາຄວາມຊຸ່ມຂອງພາວະເລືອດຈາງໃນແມ່ຍິງໄວຈະເລີນພັນ ຊຶ່ງເປັນສ່ວນໜຶ່ງຂອງຕົວຊີ້ບອກດ້ານຜົນກະທົບຂອງຍຸດທະສາດອີກດ້ວຍ.
ຂ່າວ: ບຸນຕອມ, ຮູບ: ບຸນອຸ້ມ
ຄໍາເຫັນ