ສຳຫຼວດຄວາມເປັນໄປໄດ້ໃນການພັດທະນາໂຄງການໄຟຟ້າພະລັງແຮງລົມ

ພິທີເຊັນບັນທຶກຄວາມເຂົ້າໃຈ (MOU) ເພື່ອສຶກສາສຳຫຼວດຄວາມເປັນໄປໄດ້ໃນການພັດທະນາໂຄງການໄຟຟ້າພະລັງແຮງລົມ  ແລະ ເຊັນບົດບັນທຶກຄວາມເຂົ້າໃຈ(MOU) ເພື່ອສຶກສາສຳຫຼວດຄວາມເປັນໄປໄດ້ ໃນການພັດທະນາການກໍ່ສ້າງລະບົບສາຍສົ່ງ ແລະ ສະຖານີໄຟຟ້າ 500 KV ເພື່ຶອເຊື່ອມຕໍ່ບັນດາໂຮງງານຜະລິດໄຟຟ້າພະລັງງານສະອາດ ຢູ່ເມືອງວິລະບູລີ, ເມືອງພີນ ແລະ ເມືອງອາດສະພອນ ແຂວງສະຫວັນນະເຂດ ສົ່ງອອກໄປ ບັນດາປະເທດໃກ້ຄຽງ ລະຫວ່າງ ລັດຖະບານ ແຫ່ງ ສປປລາວ ກັບ ບໍລິສັດ ນາແສງ ວາໂຍ ພັດທະນາລົງທຶນ ຊັບພະຍາກອນທົດແທນ ຈຳກັດ ແລະ ບໍລິສັດ UPC Vietnam(Singapore)PTE.LTd ໄດ້ຈັດຂຶ້ນໃນວັນທີ 13 ພະຈິກ ນີ້ ທີ່ໂຮງແຮມລາວພລາຊານະຄອນຫຼວງວຽງຈັນ
ຮ່ວມລົງນາມໃນຄັ້ງນີ້ ຕາງໜ້າລັດຖະບານລາວ ໂດຍ ທ່ານ ສະຖາບັນດິດ ອິນສີຊຽງໃໝ່ ຮອງລັດຖະມົນຕີກະຊວງແຜນການ ແລະ ການລົງທຶນ ແລະ ຕາງໜ້າບໍລິສັດໂດຍທ່ານ ຄຳສະຫວາດ ບຸນວິໄລ ຜູ້ອຳນວຍການໃຫຍ່ ບໍລິສັດນາແສງ-ວາໂຍ ພັດທະນາລົງທຶນ ຊັບພະຍາກອນທົດແທນ ຈຳກັດ ແລະ ທ່ານ Mr. Logan Knox ອໍານວຍການ ບໍລິສັດ UPC Vietnam (Singapore) Pte. Ltd, ແລະ ລົງນາມ ເປັນພະຍານ ໂດຍ ທ່ານ ສີນາວາ ສຸພານຸວົງຮອງລັດຖະມົນຕີກະຊວງພະລັງງານ ແລະ ບໍ່ແຮ່,  ທ່ານSteve Zwaan ປະທານຜູ້ບໍລິຫານ ຂອງກຸ່ມບໍລິສັດຍູພີຊີ ພະລັງງານທົດແທນ (UPC Renewables Group) ແລະ ມີພາກສ່ວນທີ່ກ່ຽວຂ້ອງເຂົ້າຮ່ວມ.
ບໍລິສັດ ນາແສງ-ວາໂຍ ພັດທະນາລົງທຶນ ຊັບພະຍາກອນທົດແທນ ຈຳກັດ ແລະ ຍູພີຊີ ພະລັງງານທົດແທນ  ໄດ້ຮັບອະນຸມັດຈາກລັດຖະບານລາວ ເພື່ອສຶກສາ ແລະ ຄົ້ນຄວ້າຄວາມເປັນໄປໄດ້ໃນການພັດທະນາໂຄງການພະລັງງານລົມ ຢູ່ເມືອງພີນ, ວິລະບູລີ ແລະ ເມືອງອາດສະພອນ ແຂວງສະຫວັນນະເຂດ ແລະ ສະຖານີຍ່ອຍ 500 ກິໂລໂວນ ແລະ ສາຍສົ່ງໄຟຟ້າເຊື່ອມຕໍ່ໄປຍັງປະເທດເພື່ອນບ້ານເພື່ອການຄ້າກະແສໄຟຟ້າຂ້າມຜ່ານຊາຍແດນ. ບໍລິສັດ ຍູພີຊີ ພະລັງງານທົດແທນ  ເປັນໜຶ່ງໃນບໍລິສັດພະລັງງານທົດແທນເອກະລາດທີ່ໃຫຍ່ທີ່ສຸດໃນຂົງເຂດອາຊີປາຊີຟິກ, ໄດ້ພັດທະນາ ແລະ ດໍາເນີນການສ້າງຊັບສິນທີ່ໃຊ້ພະລັງງານລົມ ແລະ ພະລັງງານແສງຕາເວັນຫຼາຍກວ່າ 5 GW ໃນ 5 ທະວີບແລະ ມີທຶນລວມຫຼາຍກວ່າ 8,9 ຕື້ໂດລາ. ປັດຈຸບັນ, ໂຄງການດັ່ງກ່າວໄດ້ມີການພັດທະນາ ໂຄງການພະລັງງານລົມ ຢູ່ປະເທດອິນໂດເນເຊຍ, ສສ ຫວຽດນາມ, ມົງໂກລີ, ອິນເດຍ, ໄຕ້ຫວັນ(ສປ ຈີນ)ແລະ ສເກົາຫຼີ ລວມພະລັງງານທັງໝົດ ມີຢູ່ 10 GW. ບໍລິສັດ ຍູພີຊີ ພະລັງງານທົດແທນເປັນຜູ້ພັດທະນາພະລັງງານທົດແທນຊັ້ນນໍາໃນພາກພື້ນອາຊີປາຊີຟິກທີ່ມີປະສົບການຫຼາຍກວ່າ 25 ປີໃນທົ່ວໂລກ ແລະສະແດງໃຫ້ເຫັນປະຫວັດສາດຂອງການເປັນຜູ້ທີ່ປະສົບຜົນສໍາເລັດໃນຕະຫຼາດໃໝ່ ແລະແກ້ໄຂໂຄງການທີ່ສະຫຼັບສັບຊ້ອນ, ບໍລິສັດ ຍູພີຊີ ພະລັງງານທົດແທນໄດ້ຖືກສ້າງຕັ້ງຂຶ້ນໃນປີ 1995 ແລະ ໄດ້ດໍາເນີນການໃນອາຊີຕັ້ງແຕ່ປີ 2006. ປັດຈຸບັນບໍລິສັດໄດ້ມີການດໍາເນີນງານຢູ່ 9 ຫ້ອງການໃນ 8 ປະເທດໃນທົ່ວພາກພື້ນອາຊີປາຊີຟິກ. ດ້ວຍປະສົບການໃນການພັດທະນາບັນດາໂຄງການພະລັງງານລົມ ແລະ ຄວາມສາມາດໃນການຈັດການສະໜັບສະໜູນທາງການເງິນໃຫ້ແກ່ໂຄງການຈາກສະຖາບັນການເງິນສາກົນ, ບໍລິສັດ ຍູພີຊີ ພະລັງງານທົດແທນ  ຄາດວ່າຈະປະຕິບັດໂຄງການ ຕາມຄວາມຕ້ອງການດ້ານສິ່ງແວດລ້ອມສູງສຸດຂອງ ສປປ ລາວ ພ້ອມກັບມາດຕະຖານການປະຕິບັດຂອງ ທະນາຄານພັດທະນາອາຊີ(ADB) ແລະ ອົງການການເງິນສາກົນ(IFC).  ຂໍ້ລິເລີ່ມດັ່ງກ່າວຈະນຳໃຊ້ຊັບພະຍາກອນ ແລະ ແຮງງານຂອງທ້ອງຖິ່ນ, ເພີ່ມໂອກາດການຈ້າງງານໃຫ້ແກ່ຄົນທ້ອງຖິ່ນ ແລະ ປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງແຂວງສະຫວັນນະເຂດ ແລະ ກໍຄື ສປປລາວຢ່າງໝັ້ນຄົງ. ໂຮງງານໄຟຟ້າພະລັງງານລົມ ແລະ ສະຖານີໄຟຟ້າຍ່ອຍ 500 KV ແລະ ລະບົບສາຍສົ່ງໄຟຟ້າຈະກາຍມາເປັນໜຶ່ງໃນໂຄງການລິເລີ່ມການຮ່ວມມືລະຫວ່າງ  ບໍລິສັດ ຍູພີຊີ ພະລັງງານທົດແທນ  ແລະ ທຸລະກິດທ້ອງຖິ່ນ. ບໍລິສັດ ຍູພີຊີ ພະລັງງານທົດແທນ  ແລະ ບໍລິສັດ ນາແສງ-ວາໂຍ ພັດທະນາລົງທຶນ ຊັບພະຍາກອນທົດແທນ ຈຳກັດ ໝັ້ນໃຈວ່າ ບັນດາໂຄງການດັ່ງກ່າວ ຈະປະກອບສ່ວນເຮັດໃຫ້ ແຂວງສະຫວັນນະເຂດ ກາຍເປັນໜຶ່ງໃນຟາມພະລັງງານລົມທີ່ໃຫຍ່, ເປັນສູນກາງໝໍ້ໄຟ ແລະ ສະຖານີຍ່ອຍ 500 KV ແລະ ລະບົບສາຍສົ່ງ ເພື່ອເຊື່ອມຕໍ່ເຂົ້າລະບົບຕາຂ່າຍໄຟຟ້າອາຊຽນ ໃນພາກພື້ນ. ພ້ອມກັບທ່າແຮງຂອງການນຳໜ້າດ້ານປ່າໄມ້ຂຽວ, ການກະສິກຳ, ການປ່ອຍສິນເຊື່ອກາກບອນແລະ ອຸດສາຫະກຳການທ່ອງທ່ຽວນິເວດໃນອະນາຄົດອັນໃກ້ນີ້.
(ຂ່າວ-ພາບ:ສຳນານ)