ໄດ້ຈັດກອງປະຊຸມສຳມະນາ ເພື່ອນໍາສະເໜີ ນະໂຍບາຍການອະນຸລັກ ແລະ ການຫຼຸດຜ່ອນຜົນກະທົບຕໍ່ຊີວະນາໆພັນ ຢູ່ ສປປ ລາວ ຕໍ່ສະມາຊິກສະພາແຫ່ງຊາດ. ກອງປະຊຸມດັ່ງກ່າວ ຈັດຂຶ້ນເມື່ອບໍ່ດົນມານີ້ ໂດຍມີ ທ່ານ ນາງ ປິ່ງຄຳ ລາຊະສິມມາ ຄະນະປະຈຳສະພາແຫ່ງຊາດ ປະທານກຳມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ (ກສຕສ), ທ່ານ ສັນຕິ ໄຊປັນຍາ ຫົວໜ້າອົງການອະນຸລັກສັດປ່າ ປະຈຳ ສປປ ລາວ, ມີພາກສ່ວນກ່ຽວຂ້ອງເຂົ້າຮ່ວມ.
ກອງປະຊຸມດັ່ງກ່າວ ແນໃສ່ຍົກສູງບົດບາດຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ ເພື່ອຮັບປະກັນໃນການພິຈາລະນາອະນຸມັດໂຄງການລົງທຶນ ທີ່ກ່ຽວພັນກັບທີ່ດິນ ແລະ ຊັບພະຍາກອນທຳມະຊາດ ໄດ້ຮັບການພິຈາລະນາຢ່າງມີປະສິດທິພາບ, ປະສິດທິຜົນ ແລະ ຮັບປະກັນ ພື້ນທີ່ ທີ່ມີຄວາມອຸດົມສົມບູນທາງດ້ານຊີວະນາໆພັນ ເຊັ່ນ: ເຂດປ່າສະຫງວນ, ເຂດຊີວະນາໆພັນທີ່ສຳຄັນ, ເຂດທີ່ດິນບໍລິເວນນໍ້າ ລວມທັງຊະນິດພັນພືດ ແລະ ສັດ ທີ່ໄດ້ຮັບການຄຸ້ມຄອງພາຍໃຕ້ກົດໝາຍ ສປປ ລາວ, ສົນທິສັນຍາ ແລະ ສັນຍາສາກົນ ຖືກນຳມາພິຈາລະນາໃນຂະບວນການວາງແຜນ ແລະ ຕັດສິນໃຈລົງທຶນ ເພື່ອສາມາດບັນລຸເປົ້າໝາຍການພັດທະນາແບບຍືນຍົງ, ການພັດທະນາເສດຖະກິດທີ່ສອດຄ່ອງກັບການອະນຸລັກຊີວະນາໆພັນ ແລະ ການບໍລິການລະບົບນິເວດຂອງ ສປປ ລາວ.
ທ່ານ ນາງ ປິ່ງຄໍາ ລາຊະສິມມາ ໄດ້ໃຫ້ຮູ້ວ່າ: ໃນໄລຍະຜ່ານມາ ສປປ ລາວ ໄດ້ມີການຂະຫຍາຍຕົວທາງດ້ານເສດຖະກິດຢ່າງໄວວາ, ປະກອບກັບການລົງທຶນທີ່ເພີ່ມຂຶ້ນໃນດ້ານການພັດທະນາພື້ນຖານໂຄງລ່າງຂະໜາດໃຫຍ່ ເຊັ່ນ: ທາງລົດໄຟ, ຖະໜົນຫົນທາງ ແລະ ບັນດາອຸດສາຫະກຳການຂຸດຄົ້ນ ແລະ ນຳໃຊ້ຊັບພະຍາກອນທຳມະຊາດ ເຊັ່ນ: ພະລັງງານໄຟຟ້ານໍ້າຕົກ, ບໍ່ແຮ່, ກະສິກຳ ແລະ ປ່າໄມ້ ຊຶ່ງໄດ້ມີການນໍາເນື້ອທີ່ດິນ, ບຸກລຸກເນື້ອທີ່ປ່າໄມ້ ແລະ ຫັນປ່ຽນທີ່ດິນປ່າໄມ້ຫຼາຍພໍສົມຄວນ. ໃນຂະນະດຽວກັນ, ສປປ ລາວ ກໍໄດ້ຢຶດໝັ້ນການຈັດຕັ້ງປະຕິບັດວາລະການເຕີບໂຕສີຂຽວ ແລະ ໄດ້ມີການສ້າງແຜນຍຸດທະສາດການເຕີບໂຕສີຂຽວແຫ່ງຊາດ, ກົດໝາຍວ່າດ້ວຍທີ່ດິນ, ກົດໝາຍວ່າດ້ວຍປ່າໄມ້, ກົດໝາຍວ່າດ້ວຍສັດປ່າ, ກົດໝາຍວ່າດ້ວຍສັດນໍ້າ ແລະ ການປະມົງ, ດໍາລັດວ່າດ້ວຍການປະເມີນຜົນກະທົບຕໍ່ສິ່ງແວດລ້ອມ, ຄູ່ມືແນະນຳວ່າດ້ວຍການປະເມີນສິ່ງແວດລ້ອມຍຸດທະສາດ ແລະ ອື່ນໆ ເພື່ອເປັນເຄື່ອງມືໃນການຊ່ວຍຄຸ້ມຄອງຊັບພະຍາກອນທໍາມະຊາດ ແລະ ສິ່ງແວດລ້ອມ ແລະ ເອື້ອອໍານວຍກັບການອະນຸລັກຊີວະນາໆພັນ ແລະ ການບໍລິການຂອງລະບົບນິເວດ.
ກອງປະຊຸມໄດ້ສຸມໃສ່ 3 ເປົ້າໝາຍຫຼັກ ຄື:
(1) ສ້າງຈິດສຳນຶກ ແລະ ຄວາມເຂົ້າໃຈຢ່າງເລິກເຊິ່ງກ່ຽວກັບລະບົບປ່າໄມ້, ສົນທິສັນຍາວ່າດ້ວຍການຄ້າສາກົນ ກ່ຽວກັບ ຊະນິດພັນທີ່ໃກ້ຈະສູນພັນ (CITES) ແລະ ການຈັດຕັ້ງປະຕິບັດໄຊເຕັດ ຢູ່ ສປປ ລາວ, ສົນທິສັນຍາວ່າດ້ວຍຊີວະນານາພັນ (CBD), ສົນທິສັນຍາ ຣາມຊາ ແລະ ບັນຊີສັດປ່າຂອງ ສປປ ລາວ;
(2) ເພີ່ມທະວີຄວາມຮັບຮູ້ ແລະ ຄວາມເຂົ້າໃຈກ່ຽວກັບການຄຸ້ມຄອງພູມສັນຖານແບບປະສົມປະສານ ຊຶ່ງເປັນວິທີການອະນຸລັກ ແລະ ການນຳໃຊ້ທີ່ດິນແບບຍືນຍົງ ໂດຍການພິຈາລະນາຄວາມເຊື່ອມໂຍງລະຫວ່າງ ລະບົບນິເວດ, ຊຸມຊົນ ແລະ ຄວາມຕ້ອງການ ທາງດ້ານເສດຖະກິດພາຍໃນພູມີທັດປ່າສະຫງວນ ແລະ ທີ່ດິນບໍລິເວນນໍ້າໃຫ້ຕອບສະໜອງຕໍ່ການພັດທະນາແບບຍືນຍົງ;
(3) ເພີ່ມທະວີການປະເມີນຜົນກະທົບຕໍ່ສິ່ງແວດລ້ອມ ແລະ ການຫຼຸດຜ່ອນຜົນກະທົບໃນໂຄງການລົງທຶນ ແລະ ພັດທະນາ, ສົ່ງເສີມການນໍາໃຊ້ “ລຳດັບມາດຕະການຫຼຸດຜ່ອນຜົນກະທົບ” ເພື່ອຫຼີກລ່ຽງ ແລະ ຫຼຸດຜ່ອນຜົນກະທົບ ທາງລົບຕໍ່ຊີວະນານາພັນ ແນໃສ່ໃຫ້ສະມາຊິກສະພາ ຮັບຮູ້ຄວາມຈຳເປັນພິຈາລະນາທາງດ້ານສິ່ງແວດລ້ອມ ໃນຂະບວນການວາງແຜນ ແລະ ການຈັດຕັ້ງປະຕິບັດໂຄງການ, ຮັບປະກັນການພັດທະນາແບບຍືນຍົງ ໂດຍສອດຄ່ອງກັບຄຳໝາຍໝັ້ນຕໍ່ເປົ້າໝາຍການອະນຸລັກ ລະດັບຊາດ ແລະ ສາກົນ, ຊຸກຍູ້ການລົງທຶນ ທີ່ມີຄວາມຮັບຜິດຊອບທີ່ປະກອບສ່ວນເຂົ້າໃນການປົກປັກຮັກສາມໍລະດົກທຳມະຊາດ ພ້ອມທັງຊຸກຍູ້ການເຕີບໂຕ ເສດຖະກິດແບບຍືນຍົງ.
ຂ່າວ: ອົງການອະນຸລັກສັດປ່າ
ຄໍາເຫັນ