ສຳມະນາ ຊາວໜຸ່ມລາວ ຮ່ວມແຮງຮ່ວມໃຈ ຫັນເປັນດີຈີຕອນ ດ້ວຍ 6 ຫົວຂໍ້ສຳຄັນ

ກະຊວງເຕັກໂນໂລຊີ ແລະ ການສື່ສານ (ຕສ) ຮ່ວມກັບ ສູນກາງຊາວໜຸ່ມປະຊາຊົນປະຕິວັດລາວ (ສຊປລ) ຈັດກອງປະຊຸມສຳມະນາ ພາຍໃຕ້ຫົວຂໍ້ “ຊາວໜຸ່ມລາວ ຮ່ວມແຮງຮ່ວມໃຈ ໃນການຫັນເປັນດີຈີຕອນ” ຂຶ້ນໃນວັນທີ 12 ມັງກອນ ນີ້ ທີ່ຫໍປະຊຸມແຫ່ງຊາດ ໂດຍການເປັນປະທານຮ່ວມຂອງ ທ່ານ ບໍ່ວຽງຄໍາ ວົງດາລາ ກໍາມະການສູນກາງພັກ ລັດຖະມົນຕີກະຊວງ ຕສ ແລະ ທ່ານ ມອນໄຊ ລາວມົວຊົ່ງ ກໍາມະການສໍາຮອງສູນກາງພັກ ເລຂາຄະນະບໍລິຫານງານ ສຊປລ, ມີບັນດາທ່ານການນໍາຈາກສອງພາກສ່ວນ ແລະ ພາກສ່ວນກ່ຽວຂ້ອງ ພ້ອມດ້ວຍບັນດາສະມາຊິກຊາວໜຸ່ມ, ແຂກຖືກເຊີນ ເຂົ້າຮ່ວມ.
    ທ່ານ ບໍ່ວຽງຄໍາ ວົງດາລາ ໄດ້ກ່າວເປີດກອງປະຊຸມວ່າ: ກອງປະຊຸມສຳມະນາໃນຄັ້ງນີ້, ມີຈຸດປະສົງ ເພື່ອເປັນເວທີເປີດໂອກາດໃຫ້ຊາວໜຸ່ມຈາກບັນດາ ຄຊປປລ ກະຊວງ, ອົງການ, ແຂວງ, ບໍລິສັດ ແລະ ຜູ້ປະກອບການ ທີ່ມີຄວາມຊຳນານ ແລະ ປະສົບການມາຖ່າຍທອດຄວາມຮູ້ດ້ານດີຈີຕອນທີ່ທັນສະໄໝ ເພືີ່ອໃຫ້ພວກເຮົາຈະໄດ້ຮ່ວມກັນຊອກຫາວິທີການຊຸກຍູ້ໃຫ້ຊາວໜຸ່ມລາວ ເຂົ້າມາມີສ່ວນຮ່ວມໃນການຫັນເປັນດີຈີຕອນ ຂອງປະເທດຕໍ່ໄປໂດຍມີຫົວຂໍ້ ດັ່ງນີ້: 1) ການຫັນເປັນດີຈີຕອນ ເພື່ອພັດທະນາເສດຖະກິດ ດີຈີຕອນ ຂອງ ສປປ ລາວ, 2) ບາງບົດຮຽນການຫັນເປັນດີຈີຕອນ ຂອງຄະນະບໍລິຫານງານຊາວໜຸ່ມ ກະຊວງ, ອົງການ ແລະ ແຂວງ, 3) ຄວາມປອດໄພທາງດ້ານໄຊເບີ, 4) ວິຖີຊີວິດຂອງຊາວໜຸ່ມລາວໃນຍຸກ ດີຈີຕອນ, 5) ການສ້າງຂະບວນການຊົມໃຊ້ຜະລິດຕະພັນພາຍໃນປະເທດ, ແລະ 6) ການສ້າງສື່ຍຸກໃໝ່ ພິຊິດໃຈສັງຄົມ. 
    ທ່ານລັດຖະມົນຕີ ກະຊວງ ຕສ ຍັງກ່າວວ່າ: ຍຸກແຫ່ງການນຳໃຊ້ເຕັກໂນໂລຊີດີຈີຕອນ ເຂົ້າໃນທຸກຂົງເຂດວຽກງານຂອງສັງຄົມເພື່ອຫັນປ່ຽນຈິນຕະນາການ, ຫັນປ່ຽນແບບແຜນວິທີເຮັດວຽກໃຫ້ມີປະສິດທິຜົນດີກວ່າເກົ່າ, ມີຄຸນນະພາບດີຂຶ້ນກວ່າເກົ່າ. ສະນັ້ນ, ຊາວໜຸ່ມລາວຈະຕ້ອງໄດ້ພ້ອມກັນຕັດສິນໃຈຮ່ຳຮຽນຄົ້ນຄວ້າເພື່ອສ້າງທັກສະດີຈີຕອນໃຫ້ສາມາດເປັນເຈົ້າເຕັກໂນໂລຊີດີຈີຕອນໃນທຸກຂົງເຂດວຽກງານ, ຕ້ອງຮຽນຮູ້ວິຊາຊີບໃໝ່ ເຊັ່ນ: ການຄຸ້ມຄອງ ແລະ ນຳໃຊ້ຖາມຂໍ້ມູນມະຫາສານ (Big Data), ການພັດທະນາກຸ່ມຂໍ້ມູນຜູກພັນ (Blockchaine), ນໍາໃຊ້ປັນຍາປະດິດ (AI), ວິສະວະກໍາພັນທຸກໍາ, ນາໂນເຕັກໂນໂລຊີຊຶ່ງເປັນເຕັກໂນໂລຊີໃນຍຸກສະໄໝ 4.0 ເພື່ອຫັນເປັນດີຈີຕອນ ນີ້ແມ່ນວິຊາຄວາມຮູ້ຂອງ ສັງສິນໄຊ ໃນຍຸກສະໄໝໃໝ່.
    ທ່ານ ມອນໄຊ ລາວມົວຊົ່ງ ກໍໄດ້ກ່າວມີຄໍາເຫັນ ໂດຍໄດ້ຍົກໃຫ້ເຫັນເຖິງບົດບາດຄວາມສໍາຄັນຂອງການຫັນເປັນດີຈີຕອນ ແມ່ນມີຜົນດີຕໍ່ກັບຊາວໜຸ່ມ ຊຶ່ງໄດ້ອໍານວຍຄວາມສະດວກໃນການຕິດຕໍ່ສື່ສານແບບບໍ່ມີພົມແດນ, ບໍ່ວ່າຈະໄກກັນພຽງໃດກໍສາມາດຕິດຕໍ່ຫາກັນໄດ້ໄວທີ່ສຸດ. ນອນນັ້ນ, ຍັງນໍາໃຊ້ເຂົ້າໃນການພັດທະນາລະບົບບໍລິຫານ-ບໍລິ ການໃຫ້ເປັນທັນສະໄໝ ຊຶ່ງຊາວໜຸ່ມເຮົາຈະຕ້ອງໄດ້ຍູ້ແຮງກັນຫັນເປັນສັງຄົມດີຈີຕອນ ແລະ ສ້າງສະຕິລະວັງແກ່ຊາວໜຸ່ມໃນການນໍາໃຊ້ດີຈີຕອນ.
    ໃນພິທີເປີດກອງປະຊຸມ, ທ່ານ ບໍ່ວຽງຄໍາ ວົງດາລາ ແລະ ທ່ານ ມອນໄຊ ລາວມົວຊົ່ງ ຍັງໄດ້ຮ່ວມກັນ ເຊັນບົດບັນທຶກການຮ່ວມມືວຽກງານຊາວໜຸ່ມ-ເຍົາວະຊົນ ລະຫວ່າງ ຄະນະບໍລິຫານງານຊາວໜຸ່ມປະຊາຊົນປະຕິວັດລາວ ກະຊວງ ຕສ ແລະ ສຊປລ ເພື່ອກໍານົດຂອບເຂດການຮ່ວມມືດ້ານເຕັກໂນໂລຊີ ແລະ ການສື່ສານ ຂອງທັງສອງຝ່າຍ ໃນການພັດທະນາຊາວໜຸ່ມ-ເຍົາວະຊົນລາວ ໃຫ້ກາຍເປັນນັກຄົ້ນຄວ້າ ແລະ ນັກພັດທະນາ ທີ່ມີຄວາມເຂົ້າໃຈຢ່າງເລິກເຊິ່ງກ່ຽວກັບບົດບາດ ຄວາມສຳຄັນຂອງວຽກງານເຕັກໂນໂລຊີ ແລະ ການສື່ສານ ກັບການພັດທະນາເສດຖະກິດຂອງຊາດ.
(ຂ່າວ-ພາບ: ສຸກສະຫວັນ)