ສຳມະນາການຈັດຕັ້ງປະຕິບັດວຽກງານປະກັນສັງຄົມ

ອົງການປະກັນສັງຄົມແຫ່ງຊາດ (ອປຊ) ໄດ້ຈັດກອງປະຊຸມສຳມະນາກ່ຽວກັບການຈັດຕັ້ງປະຕິບັດວຽກງານປະກັນສັງຄົມ ແລະ ປະກັນສຸຂະພາບຂຶ້ນ ໃນວັນທີ 19 ຕຸລາ ນີ້ ທີ່ຫ້ອງປະຊຸມໃຫຍ່ ອປຊ, ໃຫ້ກຽດເປັນປະທານໂດຍ ທ່ານ ກິແກ້ວ ໄຂຄຳພິທູນ ຮອງນາຍົກລັດຖະມົນຕີ ທັງເປັນຜູ້ຊີ້ນຳຂົງເຂດວັດທະນາທໍາ-ສັງຄົມ, ມີລັດຖະມົນຕີ ແລະ ຮອງ ລັດຖະມົນຕີ ບັນດາກົມທີ່ກ່ຽວຂ້ອງ ເຂົ້າຮ່ວມ.
    ທ່ານ ນາງ ໃບຄໍາ ຂັດທິຍະ ລັດຖະມົນຕີ ກະຊວງແຮງງານ ແລະ ສະຫວັດດີການສັງຄົມ (ຮສສ) ໄດ້ກ່າວວ່າ: ວຽກງານປະກັນສັງຄົມ ແລະ ວຽກງານປະກັນສຸຂະພາບ ແມ່ນນະໂຍບາຍໜຶ່ງ ທີ່ໄດ້ປະກອບສ່ວນອັນສຳຄັນເຂົ້າໃນການປະຕິບັດນະໂຍບາຍສັງຄົມຂອງພັກ ແລະ ລັດຖະບານ ໂດຍຖືເອົາໝາກຜົນຂອງການພັດທະນາ ເພື່ອເປັນຫຼັກຄໍ້າປະກັນຄວາມສ່ຽງທີ່ເກີດຈາກດ້ານເສດຖະກິດ-ສັງຄົມ ສຳລັບສະມາຊິກຂອງລະບົບປະກັນສັງຄົມ ແລະ ປະກັນສຸຂະພາບ ແລະ ເພື່ອສືບຕໍ່ຈັດຕັ້ງຜັນຂະຫຍາຍທັດສະນະຂອງພັກທີ່ວ່າ ສ້າງສັງຄົມໃຫ້ມີຄວາມສາມັກຄີ ປອງດອງ, ຍຸຕິທໍາ ແລະ ສີວິໄລ  ໂດຍສະເພາະແມ່ນການຈັດຕັ້ງປະຕິບັດຍຸດທະສາດການປັກປ້ອງສັງຄົມແຫ່ງຊາດທີ່ປະກາດໃຊ້ໃນປີ 2020 ທີ່ໄດ້ກຳນົດ 3 ໜ້າວຽກຕົ້ນຕໍ ຄື: ວຽກງານປະກັນສັງຄົມ, ວຽກງານປະກັນສຸຂະພາບ ແລະ ວຽກງານສະຫວັດດີການສັງຄົມ ແນໃສ່ຮັບປະກັນສິດຜົນປະໂຫຍດການປົກປ້ອງສັງຄົມດ້ານພື້ນຖານໃຫ້ແກ່ປະຊາຊົນບັນດາເຜົ່າກໍຄືຜູ້ອອກແຮງງານ ແລະ ສາມາດເຂົ້າເຖິງການບໍລິ ການປິ່ນປົວສຸຂະພາບທີ່ຈຳເປັນພື້ນຖານ.
  ທ່ານ ນາງ ແກ້ວ ຈັນທະວີໄຊ ຫົວໜ້າອົງການປະກັນສັງຄົມແຫ່ງຊາດ ໄດ້ຂຶ້ນລາຍງານສະພາບການຈັດຕັ້ງປະຕິບັດວຽກງານປະກັນສັງຄົມໂດຍ ທ່ານຍັງລາຍງານໃຫ້ຮູ້ຕື່ມອີກວ່າ: ວຽກງານປະກັນສຸຂະພາບ ໃນໄລຍະກ່ອນປີ 2019, ການຈັດຕັ້ງປະຕິບັດອຸດໜູນປະກັນສຸຂະພາບ ແມ່ນອົງການປະກັນສັງຄົມ ໄດ້ເຮັດສັນຍາໂດຍກົງກັບບັນດາໂຮງໝໍທຸກໆປີຈະມີການທົບທວນ ແລະ ປັບປຸງສັນຍາຮ່ວມກັນ; ຈາກນັ້ນ ນັບແຕ່ເດືອນກໍລະກົດ 2019, ອົງການປະກັນສັງຄົມ ໄດ້ມອບໂອນເງິນຮ່ວງກອງທຶນອຸດໜູນປະກັນສຸຂະພາບ ຕາມຊັດສ່ວນ 1,25% ຂອງເງິນສົມທົບຂອງຜູ້ປະກັນຕົນ ໃຫ້ຫ້ອງການປະກັນສຸຂະພາບແຫ່ງຊາດ ກະຊວງສາທາລະນະສຸກ ເປັນຜູ້ຈັດຕັ້ງປະຕິບັດຕາມແນວທາງນະໂຍບາຍຂອງລັດຖະບານ ໃນການໂອນໃຫ້ບັນດາໂຮງໝໍຕາມລະບຽບການ ຊຶ່ງທາງ ອປຊ ໄດ້ໂອນງົບປະມານດັ່ງກ່າວເປັນລາຍເດືອນຢ່າງປົກກະຕິໃຫ້ຫ້ອງການປະກັນສຸຂະພາບ (ຫກປຊ) ເລີ່ມແຕ່ເດືອນ 7/2019-8/2023 ລວມເປັນເງິນທັງຫມົດ 556 ຕື້ກວ່າກີບ ຫຼື ສະເລ່ຍ 130 ຕື້ກີບ/ປີ.
ໃນໄລຍະຜ່ານມາການຈັດຕັ້ງປະຕິບັດວຽກງານປະກັນສຸຂະພາບ ຕົວຈິງກໍເຫັນໄດ້ວ່າ ມີຫຼາຍດ້ານກໍໄດ້ຮັບການຈັດຕັ້ງປະຕິບັດໄດ້ດີ ແລະ ກໍມີບາງດ້ານບໍ່ທັນໄດ້ຮັບການແກ້ໄຂໃຫ້ດີຂຶ້ນເທົ່າທີ່ຄວນ ກາຍເປັນບັນຫາທ້າທາຍໃນສັງຄົມ ເຮັດໃຫ້ມີການຮ້ອງຮຽນຈາກສັງຄົມ ໂດຍສະເພາະຈາກສະມາຊິກປະກັນສັງຄົມເປັນຈຳນວນຫຼາຍ ເປັນຕົ້ນ: ການນຳໃຊ້ບັດປະກັນສັງຄົມເວລາໄປປິ່ນປົວຢູ່ໂຮງຫມໍ ບໍ່ໄດ້ຮັບການບໍລິການທີ່ມີຄຸນນະພາບເທົ່າທີ່ຄວນ, ໄດ້ຈ່າຍເງິນຄ່າປິ່ນປົວ, ຄ່າຢາ, ຄ່າອຸປະກອນການແພດ, ຄ່າກວດວິເຄາະຕ່າງໆ, ຄ່າທຳນຽມ ແລະ ອື່ນໆ ຈຶ່ງມີຄວາມຈໍາເປັນເພື່ອຫາຄວາມເປັນເອກະພາບກັນໃນການຈັດຕັ້ງປະຕິບັດ ແລະ ຫຼຸດຜ່ອນບັນດາຫາງສຽງຂອງສັງຄົມ.
ໃນໂອກາດດັ່ງກ່າວ, ທ່ານ ກິແກ້ວ ໄຂຄໍາພິທູນ  ໄດ້ມີຄໍາເຫັນຊີ້ນຳຕໍ່ກອງປະຊຸມ ດັ່ງນີ້: ສືບຕໍ່ສ້າງເງື່ອນໄຂ ໃນການຂະຫຍາຍອັດຕາປົກຄຸມປະກັນສັງຄົມໃຫ້ກວມເອົາທຸກກຸ່ມເປົ້າໝາຍ ແນໃສ່ສ້າງຄວາມເຕີບໃຫຍ່ເຂັ້ມແຂງ ແລະ ຍືນຍົງຂອງກອງທຶນປະກັນສັງຄົມ, ພິຈາລະນາເບິ່ງກ່ຽວກັບທາງເລືອກໃນການມອບໂອນການປະກັນສຸຂະພາບ ສຳລັບຜູ້ທີ່ເປັນສະມາຊິກປະກັນສັງຄົມຄືນໃຫ້ ອົງການປະກັນສັງຄົມແຫ່ງຊາດ ຮັບຜິດຊອບຈັດຕັ້ງປະຕິບັດໄປຄຽງຄູ່ກັບ 8 ການອຸດໜູນຕາມກົດໝາຍວ່າດ້ວຍການປະກັນສັງຄົມ, ໃຫ້ທັງສອງຂະແໜງການຮີບຮ້ອນປຶກສາຫາລືແກ້ໄຂບັນດາຂອດທີ່ຍັງອຸດຕັນ, ບໍ່ສອດຄ່ອງ, ບໍ່ມີຄວາມເປັນເອກະພາບ, ປັບປຸງນິຕິກຳໃຫ້ສຳເລັດໂດຍໄວ ໂດຍກຳນົດນະໂຍບາຍລາຍການຄຸ້ມຄອງການບໍລິການດ້ານການແພດ ແຕ່ລະເປົ້າໝາຍໃຫ້ຊັດເຈນ, ມີຄວາມສອດຄ່ອງ ແລະ                   ເໝາະສົມກັບຄວາມສາມາດຕົວຈິງ ເພື່ອເປັນບ່ອນອີງໃນການຈັດຕັ້ງປະຕິບັດທີ່ເອກະພາບ ແຕ່ສູນກາງລົງຮອດທ້ອງຖິ່ນໃນຂອບເຂດທົ່ວປະເທດ. ປັບປຸງກົນໄກການເຮັດວຽກ, ການປະສານງານກັນລະຫວ່າງ ອົງການປະກັນສັງຄົມ, ບັນດາໂຮງໝໍ ແລະ ຫ້ອງການປະກັນສຸຂະພາບ ແຕ່ລະຂັ້ນຄຸ້ມຄອງ ເພື່ອຮັບປະກັນການບໍລິການທີ່ເໝາະສົມ ຫຼຸດຜ່ອນບັນດາຫາງສຽງການຮ້ອງຮຽນ ແລະ ວິພາກວິຈານ, ສົມທົບກັບຂະແໜງການທີ່ກ່ຽວຂ້ອງເພື່ອຄົ້ນຄວ້າງົບປະມານໃຫ້ພຽງພໍ ຮັບປະກັນໃຫ້ສາມາດສະໜອງຢາ, ອຸປກອນການແພດ ແລະ ສະໜອງການປິ່ນປົວຕາມນະໂຍບາຍ ແລະ ສອງຂະແໜງການຕ້ອງໄດ້ເພີ່ມທະວີຄວາມເອົາໃຈໃສ່ໃນການໂຄສະນາປະຊາສຳພັນ ໂດຍໃຫ້ປະຕິບັດຢ່າງຕໍ່ເນື່ອງ ດ້ວຍຫຼາກຫຼາຍຊ່ອງທາງ ແລະ ວິທີການ ເພື່ອຮັບປະກັນໃຫ້ທຸກກຸ່ມເປົ້າໝາຍເຂົ້າໃຈຕໍ່ແນວທາງນະໂຍບາຍຂອງພັກ-ລັດ, ເຂົ້າເຖິງຂໍ້ມູນຂ່າວສານທີ່ຖືກຕ້ອງ, ຮັບຮູ້ໄດ້ເຖິງຄວາມສຳຄັນຂອງວຽກງານປົກປ້ອງທາງສັງຄົມ ໂດຍສະເພາະວຽກງານປະກັນສັງຄົມ ແລະ ປະກັນສຸຂະພາບ ແລະ ໃຫ້ສະມາຊິກທຸກຄົນສາມາດເຂົ້າເຖິງການບໍລິການ ແລະ ການອຸດໜູນ ຕາມສິດທິ ແລະ ຜົນປະໂຫຍດທີ່ໄດ້ກຳນົດໃນກົດໝາຍ ແລະ ລະບຽບການ. 
ຂ່າວ-ພາບ: ຕຸໄລເພັດ