 |
ໂອກາດດັ່ງກ່າວ, ທ່ານ ນາງ ວິລະວອນ ພັນທະວົງ ໄດ້ກ່າວສະແດງຄວາມຕ້ອນຮັບ ແລະ ຊົມເຊີຍຕໍ່ທ່ານທູດ ກໍຄືລັດຖະບານ ສ ເກົາຫຼີ ທີ່ໄດ້ໃຫ້ການຮ່ວມມືສະໜັບສະໜູນຊ່ວຍເຫຼືອຫຼາຍດ້ານໃນໄລຍະຜ່ານມາ ໂດຍສະເພາະວຽກງານສື່ມວນຊົນຕໍ່ກົມສື່ມວນຊົນ, ໂທລະພາບແຫ່ງຊາດລາວ, ວິທະຍຸກະຈາຍສຽງແຫ່ງຊາດລາວ, ຂ່າວສານປະເທດ, ໜັງສືພິມວຽງຈັນທາມ ເປັນຕົ້ນດ້ານວຽກງານໄອທີ, ພະຫະນະຮັບໃຊ້, ການສ້າງຫ້ອງສະຕູດີໂອ ແລະ ວຽກງານອື່ນໆອີກ ຊຶ່ງການຊ່ວຍເຫຼືອຈາກ ສ ເກົາຫຼີ ໂດຍຜ່ານໂຄງການຣາປ່າ. ໃນນັ້ນ, ສື່ມວນຊົນລາວ ຍັງໄດ້ມີໂອກາດເຂົ້າຮ່ວມແລກປ່ຽນບົດຮຽນ, ງານສໍາຄັນຕ່າງໆ ທີ່ ສ ເກົາຫຼີ ຈັດຂຶ້ນໃນຜ່ານມາຕື່ມອີກ ຊຶ່ງການຊ່ວຍເຫຼືອດັ່ງກ່າວເປັນຂີດໝາຍສໍາຄັນ ເພື່ອເສີມຂະຫຍາຍສາຍພົວພັນຮ່ວມມືທີ່ດີລະຫວ່າງ ສປປ ລາວ ແລະ ສ ເກົາຫຼີ ໂດຍສະເພາະໃນວຽກງານສື່ມວນຊົນໃຫ້ນັບມື້ເຕີບໃຫຍ່ເຂັ້ມແຂງຂຶ້ນຢ່າງບໍ່ຢຸດຢັ້ງ. ພ້ອມນັ້ນ, ຍັງໄດ້ສະເໜີໃຫ້ທ່ານທູດສືບຕໍ່ໃຫ້ການຊ່ວຍເຫຼືອໃນວຽກງານສື່ມວນຊົນໃນຕໍ່ໜ້າຕື່ມອີກ.
ທ່ານທູດໄດ້ກ່າວສະແດງຄວາມຂອບໃຈຕໍ່ການຕ້ອນຮັບຢ່າງອົບອຸ່ນພ້ອມທັງຊົມເຊີຍຕໍ່ຄະນະໂຄສະນາອົບຮົມສູນກາງພັກ ທີ່ໄດ້ຮິບໂຮມເອົາວຽກງານຖະແຫຼງຂ່າວ ກໍຄືວຽກງານສື່ມວນຊົນມາຂຶ້ນກັບ ຄອສພ ພ້ອມທັງກ່າວຢືນຢັນຈະສືບຕໍ່ປະກອບສ່ວນເຂົ້າໃນການພົວພັນຮ່ວມມືທີ່ດີລະຫວ່າງ ສ ເກົາຫຼີ ແລະ ສປປ ລາວ ກໍຄືສືບຕໍ່ຊ່ວຍເຫຼືອໃນວຽກງານສື່ມວນຊົນ ເພື່ອໃຫ້ນັບມື້ແໜ້ນແຟ້ນຂະຫຍາຍຕົວຍິ່ງຂຶ້ນ.
(ຂ່າວ-ພາບ: ວັນເພັງ)
ຄໍາເຫັນ