ສໍາມະນາກ່ຽວກັບຄູ່ຮ່ວມຊາຕາກໍາ ລາວ-ຈີນແລະ ຄູ່ຮ່ວມຊາຕາກໍາຂອງມວນມະນຸດ

ສະຖາບັນການຕ່າງປະເທດ ຮ່ວມກັບສະຖານເອກອັກຄະລັດຖະທູດ ແຫ່ງ ສປ ຈີນ ປະຈໍາ ສປປ ລາວ ໄດ້ຈັດກອງປະຊຸມສໍາມະນາພາຍໃຕ້ຫົວຂໍ້ “ເພີ່ມທະວີການສ້າງຄູ່ຮ່ວມຊາຕາກໍາ ລາວ-ຈີນ ແລະ ຄູ່ຮ່ວມຊາຕາກໍາຂອງມວນມະນຸດ ເພື່ອເສີມຂະຫຍາຍ 5 ຫຼັກການແຫ່ງການຢູ່ຮ່ວມກັນໂດຍສັນຕິ”ເພື່ອເປັນການລະນຶກເຖິງ ແລະ ສະເຫຼີມສະຫຼອງຜົນສໍາເລັດຂອງການຈັດຕັ້ງປະຕິບັດ 5 ຫຼັກການດັ່ງກ່າວ ຄົບຮອບ 70 ປີ, ໂດຍສະເພາະ ໃນການສົ່ງເສີມການພົວພັນຮ່ວມມືລະຫວ່າງ ສປປ ລາວ ແລະ ສປ ຈີນ ຊຶ່ງຈັດຂຶ້ນໃນຕອນເຊົ້າຂອງວັນທີ 23 ພຶດສະພານີ້ທີ່ ສູນການຮ່ວມມືສາກົນ ແລະ ຝຶກອົບຮົມ (ICTC), ໃນກອງປະຊຸມສໍາມະນາຄັ້ງນີ້ ໄດ້ຮັບກຽດຈາກ ທ່ານ ສົມສະຫວາດ ເລັ່ງສະຫວັດອະດີດກໍາມະການກົມການເມືອງສູນກາງພັກ ອະດີດຮອງນາຍົກລັດຖະມົນຕີ ແລະ ອະດີດລັດຖະມົນຕີກະຊວງການຕ່າງປະເທດ ເຂົ້າຮ່ວມເປັນປະທານກິດຕິມະສັກ ແລະ ກ່າວເປີດກອງປະຊຸມໂດຍທທ່ານ ບຸນເຫຼືອ ພັນດານຸວົງ ຮອງລັດຖະມົນຕີ ກະຊວງການຕ່າງປະເທດ, ໂດຍມີຄະນະນໍາກະຊວງ,ທູດອາວຸໂສບໍານານ,ບັນດາຄະນະກົມ, ຄະນະພະແນກ, ພະນັກງານຈາກກະຊວງການຕ່າງປະເທດ ແລະ ສະຖານເອກອັກຄະລັດຖະທູດ ສປ ຈີນ, ແຂກຖືກເຊີນເຂົ້າຮ່ວມ. 
ກອງປະຊຸມ ໄດ້ຮັບຟັງການກ່າວຄໍາເຫັນຈາກ ທ່ານ ສົມສະຫວາດ ເລັ່ງສະຫວັດ ທີ່ໄດ້ເນັ້ນໃສ່ຜົນສໍາເລັດຂອງການຈັດຕັ້ງປະຕິບັດ 5 ຫຼັກການແຫ່ງການຢູ່ຮ່ວມກັນໂດຍສັນຕິ ທີ່ຖືກໝູນໃຊ້ຢ່າງກວ້າງຂວາງ ແລະ ຢຶດໝັ້ນເປັນຫຼັກການພື້ນຖານໃນການຮ່າງກົດໝາຍລະຫວ່າງປະເທດ ແລະ ກໍານົດທິດທາງການພົວພັນລະຫວ່າງລັດຖະບານຕໍ່ລັດຖະບານຊຶ່ງ ສປປ ລາວ ກໍໄດ້ນໍາໃຊ້ຫຼັກການດັ່ງກ່າວ ເປັນບ່ອນອີງອັນແໜ້ນແກ່ນໃນການເປີດກວ້າງການຮ່ວມມືສາກົນ, ການເຄື່ອນໄຫວວຽກງານການຕ່າງປະເທດ, ການປົກປ້ອງສິດ ແລະ ເອກະລາດຂອງລາວໃນເວທີສາກົນຕະຫຼອດໄລຍະຕໍ່ສູ້ກູ້ຊາດຈົນກ້າວໄປສູ່ການສະຖາປະນາ ສປປ ລາວ ໃນປີ 1975 ແລະ ຍັງເປັນແນວທາງພື້ນຖານໃຫ້ແກ່ຂະບວນວິວັດຂອງການພົວພັນຮ່ວມມືລະຫວ່າງສອງຊາດ ລາວ-ຈີນ ໃນອະດີດຜ່ານມາ ພ້ອມທັງເປັນເຂັມທິດເຍືອງທາງໃຫ້ແກ່ການສ້າງແຜນແມ່ບົດວ່າດ້ວຍ“ການສ້າງຄູ່ຮ່ວມຊາຕາກໍາລາວ-ຈີນ”ຊຶ່ງແມ່ນເອກະສານການເມືອງທີ່ມີຄວາມໝາຍຄວາມສໍາຄັນທາງດ້ານຍຸດທະສາດໃນການຊຸກຍູ້ການພົວພັນຮ່ວມມືລະຫວ່າງສອງພັກ, ສອງລັດແລະປະຊາຊົນສອງຊາດລາວ-ຈີນໃນປັດຈຸບັນແລະອະນາຄົດໃຫ້ມີການຂະຫຍາຍຕົວຢ່າງບໍ່ຢຸດຢັ້ງແລະນັບມື້ໄດ້ຮັບໝາກຜົນເປັນຮູບປະທໍາ. 
ກອງປະຊຸມສໍາມະນາ ຍັງໄດ້ຮັບຟັງການປະກອບຄໍາຄິດຄໍາເຫັນຈາກທ່ານ ຫວາງ ຊາງ ອຸປະທູດຊົ່ວຄາວສະຖານເອກອັກຄະລັດຖະທູດຈີນ ປະຈໍາ ສປປ ລາວ ແລະ ທ່ານ ນາງ ວິທະຍາ ໄຊຍະວົງຫົວໜ້າສະຖາບັນການຕ່າງປະເທດທີ່ໄດ້ສະເໜີຈຸດກໍາເນີດຂອງ 5 ຫຼັກການດັ່ງກ່າວ ທີ່ຖືກສະເໜີຂຶ້ນໃນປີ 1954ເພື່ອນໍາໃຊ້ເປັນຫຼັກການພື້ນຖານໃນການພົວພັນລະຫວ່າງສາມຊາດ ກໍຄື ຈີນ, ອິນເດຍ ແລະ ມຽນມາ. ຫຼັງຈາກນັ້ນ,5 ຫຼັກການແຫ່ງການຢູ່ຮ່ວມກັນໂດຍສັນຕິໄດ້ກາຍເປັນຫຼັກການພື້ນຖານສໍາຄັນ ທີ່ຖືກນໍາໃຊ້ຢ່າງກວ້າງຂວາງໃນການພົວພັນລະຫວ່າງບັນດາປະເທດຕ່າງໆໃນພາກພື້ນ ແລະ ສາກົນ. ຕະຫຼອດໄລຍະ70ປີຜ່ານມາ,5 ຫຼັກການດັ່ງກ່າວ ໄດ້ສືບຕໍ່ສ້າງຜົນປະໂຫຍດອັນມະຫາສານໃຫ້ແກ່ປະຊາຄົມໂລກ, ເປັນບ່ອນອີງສໍາຄັນຂອງການພົວພັນສາກົນ ແລະ ກົດໝາຍສາກົນ ທີ່ແທດເໝາະກັບສັງຄົມທຸກລະບອບ, ການພັດທະນາທຸກຮູບແບບ, ຮັກສາໄດ້ສິດຜົນປະໂຫຍດຂອງບັນດາປະເທດຕ່າງໆ ແລະ ລະດັບຂອງການພັດທະນາ ນໍາເອົາສິດສະເໝີພາບອັນແທ້ຈິງມາສູ່ປະຊາຊົນ ແລະ ຕ້ານກັບການຜູກຂາດຕໍ່ກິດຈະການສາກົນ ຫຼື ການເປັນເຈົ້າໂລກພຽງຜູ້ດຽວ, ເປັນເຄື່ອງມືອັນສັກສິດໃນການຮັກສາສິດອະທິປະໄຕ ແລະ ເອກະລາດຂອງປະເທດກໍາລັງພັດທະນາ, ເປັນຄັນທຸງແຫ່ງການຮ່ວມມືກັນ, ເສີມຂະຫຍາຍຄວາມເຂົ້າໃຈ ແລະ ຄວາມໄວ້ເນື້ອເຊື່ອໃຈຊຶ່ງກັນ ແລະ ກັນ ເພື່ອນໍາໄປສູ່ການຮ່ວມມືຮອບດ້ານ, ພ້ອມທັງປະກອບສ່ວນຊຸກຍູ້ກໍ່ສ້າງລະບຽບຂັ້ນຕອນຂອງການເມືອງ-ເສດຖະກິດສາກົນໃຫ້ມີຄວາມສະເໝີພາບ ແລະ ເປັນເຄື່ອງມືໃນການແກ້ໄຂບັນຫາຂໍ້ຂັດແຍ່ງທາງປະຫວັດສາດລະຫວ່າງປະເທດ. 
ສໍາລັບ ສປປ ລາວ, ຕະຫຼອດຫຼາຍສິບປີຜ່ານມາປະເທດເຮົາແມ່ນຍາມໃດກໍໄດ້ຢຶດໝັ້ນການເປີດກວ້າງການຮ່ວມມືສາກົນ ຕາມທິດ “ເພີ່ມມິດ-ຫຼຸດຜ່ອນສັດຕູ” ແລະ ໄດ້ຂະຫຍາຍສາຍພົວພັນຮ່ວມມື ທັງພາກລັດ, ສາຍພັກ ແລະຜ່ານອົງການຈັດຕັ້ງມະຫາຊົນ ກໍຄືກັບອົງການຈັດຕັ້ງສາກົນຢ່າງກວ້າງຂວາງ, ສ້າງສາຍພົວພັນມິດຕະພາບຮ່ວມມືອັນກວ້າງຂວາງກັບນາໆຊາດບົນຫຼັກການແຫ່ງຄວາມສະເໝີພາບ, ຕ່າງຝ່າຍຕ່າງໄດ້ຮັບຜົນປະໂຫຍດ, ເຄົາລົບເອກະລາດ, ອະທິປະໄຕແລະຜືນແຜ່ນດິນອັນຄົບຖ້ວນຂອງກັນແລະກັນ,ບໍ່ແຊກແຊງເຂົ້າໃນກິດຈະການຂອງກັນແລະກັນ, ບໍ່ຂົ່ມຂູ່ແລະບໍ່ໃຊ້ກໍາລັງຮຸນແຮງຕໍ່ກັນແລະແກ້ໄຂຂໍ້ຂັດແຍ່ງລະຫວ່າງປະເທດດ້ວຍສັນຕິວິທີ ຊຶ່ງທັງໝົດທີ່ກ່າວມານັ້ນ ກໍລ້ວນແຕ່ສະແດງເຖິງຫຼັກການອັນເປັນພື້ນຖານ ຂອງ 5 ຫຼັກການແຫ່ງການຢູ່ຮ່ວມກັນໂດຍສັນຕິ.
(ຂ່າວ: ສະຖາບັນການຕ່າງປະເທດ;ພາບ: ແສງຈັນ)