ສະມາຄົມ ເຊໂລເວສ ລາວ (ZWL) ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ (ກຊສ) ໄດ້ຈັດສຳມະນາໄວໜຸ່ມເພື່ອແກ້ໄຂບັນຫາການປ່ຽນແປງດິນຟ້າອາກາດ ໃນ ສປປ ລາວ 2023 (Youth Climate Action Conference in Laos 2023) ຂຶ້ນໃນວັນທີ 23 ກັນຍາ ນີ້ ທີ່ສູນຮ່ວມມືສາກົນ ແລະ ຝຶກອົນຮົມລາວ-ຍີ່ປຸ່ນ (ICTC) ນະຄອນຫຼວງວຽງຈັນ, ຊຶ່ງມີ ທ່ານ ນາງ ຂັນທະລີ ສິລິພົງພັນ ຮອງລັດຖະມົນຕີກະຊວງສຶກສາທິການ ແລະ ກິລາ, ທ່ານ ນາງ ສຸກສະເຫວີຍ ແກ້ວທຽມຈັນ ປະທານສະມາຄົມເຊໂລເວສ ລາວ, ມີກຸ່ມອາສາສະໝັກຊາວໜຸ່ມ, ອົງການຈັດຕັ້ງສາກົນ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ
ການສຳມະນາຄັ້ງນີ້ ເພື່ອເປັນການສະຫຼຸບຜົນງານການເຄື່ອນໄຫວ ການຈັດຕັ້ງກິດຈະກຳປູກຈິດສຳນຶກດ້ານການປ່ຽນແປງດິນຟ້າອາກາດທີ່ໄດ້ດຳເນີນໃນ 11 ແຂວງ, ເພື່ອເປັນການສ້າງຄວາມສາມາດໃຫ້ໄວໜຸ່ມໄດ້ປະກອບສ່ວນໃນການປົກປັກຮັກສາສິ່ງແວດລ້ອມ, ທັງເປັນການສ້າງເຄືອຂ່າຍໃຫ້ໄວໜຸ່ມທີ່ຮັກສິ່ງແວດລ້ອມໃຫ້ເຂັ້ມແຂງ, ແລກປ່ຽນຄວາມຄິດເຫັນ ແລະ ເພີ່ມການສົ່ງເສີມໃຫ້ໄວໜຸ່ມໄດ້ມີສ່ວນຮ່ວມໃນການຫຼຸດຜ່ອນການປ່ຽນແປງດິນຟ້າອາກາດ.
ທ່ານ ນາງ ຂັນທະລີ ສິລິພົງພັນ ກ່າວວ່າ: ງານສຳມະນາຄັ້ງນີ້ແມ່ນມີຄວາມໝາຍຄວາມສຳຄັນຫຼາຍ ໃນການປົກປັກຮັກສາສິ່ງແວດລ້ອມ ໂດຍສະເພາະແມ່ນການແກ້ໄຂບັນຫາຂອງການປ່ຽນແປງດິນຟ້າອາ ກາດ ໃນ ສປປ ລາວ ຊຶ່ງກິດຈະກຳໃນງານຄັ້ງນີ້ແມ່ນໄດ້ຮັບຟັງການສະຫຼຸບລາຍງານຜົນສຳເລັດໃນຈັດຕັ້ງປະຕິບັດວຽກງານດັ່ງກາວ ໃນ 11 ແຂວງຜ່ານມາຂອງຄະນະທີມງານເຊໂລເວສ ລາວ ຮ່ວມກັບຫຼາຍພາກສ່ວນ ຈາກພາກລັດ-ເອກກະຊົນ ແລະ ອົງການຈັດຕັ້ງສາກົນຕ່າງໆ, ກິດຈະກຳການປູກຈິດສຳນຶກ, ການນຳສະເໜີບົດຕ່າງໆກ່ຽວກັບສິ່ງແວດລ້ອມ ແລະ ການລະດົມແນວຄວາມຄິດກັບການແກ້ໄຂບັນຫາການປ່ຽນແປງດິນຟ້າອາກາດ ແລະ ບັນຫາເລື່ອງຂີ້ເຫຍື້ອ. ນອກຈາກນີ້ ຍັງມີກິດຈະກຳຫຼິ້ນເກມທີ່ຕິດພັນກັບການປູກຈິດສຳນຶກ ແລະ ຮັບຊົມຮ້ານວາງສະແດງ ຈາກອົງກອນຕ່າງໆພາຍໃນງານ ຊຶ່ງກິດຈະກຳເຫຼົ່ານີ້ລ້ວນແລ້ວແຕ່ມີຄວາມໝາຍຄວາມສຳຄັນຕໍ່ໄວໜຸ່ມ ແລະ ນັກຮຽນ ເພື່ອຈະໄດ້ຮຽນຮູ້ບັນຫາຕ່າງໆ ແລະ ວິທີແກ້ໄຂ ເພື່ອຈະນຳໄປຈັດຕັ້ງປະຕິບັດຢູ່ໃນໃນໂຮງຮຽນ ແລະ ຊີວິດປະຈຳວັນ ເພື່ອຫຼຸດຜ່ອນການຖິ້ມຂີ້ເຫຍື້ອຊະຊາຍ ແລະ ການຮັກສາສິ່ງແວດລ້ອມຮ່ວມກັນ.
ທ່ານກ່າວຕື່ມວ່າ: ຕໍ່ກັບທິດທາງໃນຕໍ່ໜ້າ ສະເໜີໃຫ້ຄູ-ອາຈານ ແລະ ນັກຮຽນ ຈົ່ງນຳເອົາຄວາມຮູ້ທີ່ໄດ້ຮັບຟັງການສະເໜີຂອງທີມງານເຊໂລເວສລາວ ກ່ຽວກັບບັນຫາ ແລະ ວີທີແກ້ໄຂການປ່ຽນແປງດິນຟ້າອາກາດ, ບັນຫາກ່ຽວກັບຂີ້ເຫຍື້ອ ແລະ ກິດຈະກຳອື່ນໆ ນຳໄປຄົ້ນຄວ້າ ແລະ ພ້ອມກັນເປັນເຈົ້າການ ໃນການບົວລະບັດຮັກສາ ຕົ້ນໄມ້ໃຫ້ເຕີບໃຫຍ່ໃນອະນາຄົດ.
(ຂ່າວ-ພາບ: ສຳນານ)
ຄໍາເຫັນ