ສຳມະນາວິທະຍາສາດ "ຈັນຍາບັນວິຊາຊີບຂອງຜູ້ປະກອບອາຊີບສຳເນົາເອກະສານ"

ການຈັດກອງປະຊຸມສຳມະນາຄັ້ງນີ້ ເພື່ອແນໃສ່ຍົກສູງຄວາມຮັບຮູ້ຄວາມເຂົ້າໃຈ, ເຫັນໄດ້ຄວາມ ໝາຍຄວາມສໍາຄັນຂອງອາຊີບສໍາເນົາເອກະສານ ໂດຍສະເພາະຍົກສູງຈັນຍາບັນວິຊາຊີບ ໃຫ້ແກ່ຖັນແຖວພະນັກງານ-ລັດຖະກອນ ທີ່ປະຕິບັດໜ້າທີ່ຄຸ້ມຄອງ ແລະ ສໍາເນົາເອກະສານ ຢູ່ບັນດາການຈັດຕັ້ງຂັ້ນສູນກາງ ແລະ ທ້ອງຖິ່ນ ໃຫ້ເຂົ້າສູ່ມາດຕະຖານ ແລະ ລະບຽບການຫຼາຍຂຶ້ນ, ທັງມີຄວາມເປັນເອກະພາບ ໃນຂອບເຂດທົ່ວປະເທດ. ອັນສຳຄັນ ແມ່ນເປັນການຈັດຕັ້ງຜັນຂະຫຍາຍກົດໝາຍ ວ່າດ້ວຍເອກະສານ ໃຫ້ເກີດໝາກຜົນເປັນຮູບປະທຳຕົວຈິງ. ນອກຈາກນີ້, ຍັງຖືເປັນຂີດໝາຍທີ່ສໍາຄັນ ຕໍ່ການພົວພັນຮ່ວມມື ໃນວຽກງານສໍາເນົາເອກະສານລະຫວ່າງ ສປປ ລາວ ແລະ ສສ ຫວຽດນາມ ໃຫ້ນັບມື້ນັບແໜ້ນແຟ້ນຍິ່ງໆຂຶ້ນ, ປະກອບສ່ວນເພີ່ມພູນຄູນສ້າງ ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ທີ່ເປັນມູນເຊື້ອອັນດີງາມ ລະຫວ່າງ ລາວ-ຫວຽດນາມ ໃຫ້ໝັ້ນຄົງຂະໜົງແກ່ນ ແລະ ຈະເລີນງອກງາມຕະຫຼອດກາລະນານ.

ທ່ານ ບຸນຍົງ ສີສຸພັນ ໄດ້ກ່າວວ່າ: ວຽກງານສຳເນົາເອກະສານ ເປັນວຽກງານໜຶ່ງທີ່ມີຄວາມໝາຍຄວາມສຳຄັນເປັນຢ່າງຍິ່ງ ຕໍ່ການປະຕິບັດພາລະບົດບາດ, ສິດ ແລະ ໜ້າທີ່ຂອງບັນດາການຈັດຕັ້ງຂັ້ນຕ່າງໆ ໃຫ້ມີຜົນສຳເລັດຕາມແຜນການທີ່ວາງໄວ້ ໂດຍສະເພາະແມ່ນຊ່ວຍຮັບປະກັນທາງດ້ານຂໍ້ມູນເອກະສານ ຢ່າງເປັນລະບົບ ເພື່ອໃຫ້ການນຳມີຄວາມເຫັນພິຈາລະນາ ແລະ ແກ້ໄຂວຽກງານຢ່າງທັນການ. ພ້ອມກັນນັ້ນ, ຍັງຊ່ວຍເກັບຮັກສາຂໍ້ມູນເອກະສານທີ່ສຳຄັນຂອງການຈັດຕັ້ງ ໄວ້ຢ່າງປອດໄພ, ທັງສາມາດຕອບສະໜອງຄວາມຮຽກຮ້ອງຕ້ອງການໃນການນຳໃຊ້ຂໍ້ມູນເອກະສານ ໄດ້ຢ່າງທັນການ, ເຊິ່ງຢາກເຮັດໄດ້ຄືແນວນັ້ນ, ຜູ້ທີ່ເຮັດວຽກງານຄຸ້ມຄອງ ແລະ ສຳເນົາເອກະສານ ຈະຕ້ອງຍົກສູງຄວາມຮູ້, ຄວາມສາມາດ ແລະ ມີຈັນຍາບັນໃນອາຊີບຂອງຕົນຢ່າງໜັກແໜ້ນ.

ກອງປະຊຸມສຳມະນາວິທະຍາສາດຄັ້ງນີ້ ຜູ້ເຂົ້າຮ່ວມ ໄດ້ຮັບຟັງບົດນຳສະເໜີ ຈຳນວນ 3 ບົດ ຈາກຜູ້ຊ່ຽວຊານຂອງ ສປປ ລາວ ແລະ ສສ ຫວຽດນາມ ຄື: “ຈັນຍາບັນວິຊາຊີບຂອງຜູ້ປະກອບອາຊີບສຳເນົາເອກະສານ” ນໍາສະເໜີໂດຍທ່ານ ເຈິ່ນ ຮວ່າງ ຮອງປະທານສະມາຄົມເອກະສານ-ສຳເນົາຫວຽດນາມ, ອະດີດຮອງຫົວໜ້າກົມເອກະສານ ແລະ ສຳເນົາແຫ່ງລັດ, ກະຊວງພາຍໃນ, ສສ ຫວຽດນາມ; “ຈັນຍາບັນວິຊາຊີບຂອງພະນັກງານ-ລັດຖະກອນ ທີ່ເຮັດວຽກສຳເນົາເອກະສານ” ນໍາສະເໜີໂດຍ ທ່ານ ນາງ ສາຍໄໝ ອິນທະວົງ ຫົວໜ້າພະແນກທ້ອນໂຮມເອກະສານ ກົມເອກະສານແຫ່ງຊາດ ຫສນຍ ແລະ “ບາງບົດຮຽນກ່ຽວກັບຈັນຍາບັນວິຊາຊີບ ຂອງບໍລິສັດ ວິທະຍາສາດເຕັກໂນໂລຊີ ສຳເນົາເອກະສານ ໄຊງ່ອນ ຈຳກັດ ສຳເນົາເອກະສານປະຊາຊົນ” ນໍາສະເໜີໂດຍ ທ່ານ ຟ້າມ ທິ ເຮ້ ອະດີດອໍານວຍການສູນສຳເນົາເອກະສານແຫ່ງຊາດເລກ IV, ອຳນວຍການບໍລິສັດວິທະຍາສາດເຕັກໂນໂລຊີ ສຳເນົາເອກະສານໄຊງ່ອນ ຈຳກັດ.

ຂ່າວ: ກົມສຳເນົາເອກະສານແຫ່ງຊາດ, ຫສນຍ