ສະມໍລບີ ສ້າງຂະບວນການອະນາໄມລວມ ແກ້ໄຂບັນຫາການຖິ້ມ-ຈູດຂີ້ເຫຍື້ອຊະຊາຍ

ເມື່ອບໍ່ດົນມານີ້, ບໍລິສັດສະມໍລບີ ຮ່ວມກັບອໍານາດການປົກຄອງເມືອງໄຊເສດຖາ ແລະ ຫ້ອງການຄຸ້ມຄອງ ແລະ ບໍລິການຕົວເມືອງວຽງຈັນ (ຄບຕ) ພ້ອມດ້ວຍອໍານາດການປົກຄອງບ້ານນາຄວາຍໃຕ້ ແລະ ນັກຮຽນອາສາສະໝັກໂຮງຮຽນມິດຕະພາບລາວ-ເກົາຫຼີ ໄດ້ສ້າງຂະບວນການອະນາໄມລວມ ເພື່ອຈັດການຂີ້ເຫຍື້ອດັ່ງກ່າວ ພາຍໃຕ້ກິດຈະກໍາທີ່ສະມໍລບີສ້າງຂຶ້ນ Big Cleaning Day With Sma.

ທ່ານ ນາງ ດີ່ນ້າ ສົມສະໝຸດ ຫົວໜ້າວຽກງານການຕະຫຼາດ ບໍລິສັດສະມໍລບີ ໃຫ້ຮູ້ວ່າ: ການສ້າງຂະບວນໃນຄັ້ງນີ້, ໂດຍເນັ້ນການມີສ່ວນຮ່ວມຂອງທຸກພາກສ່ວນ ທັງເປັນການປູກຈິດສໍານຶກການຮັກສາສິ່ງແວດລ້ອມໃຫ້ນັກຮຽນອາສາສະໝັກ ເປັນຕົ້ນແມ່ນການຈັດການສິ່ງເສດເຫຼືອ ຊຶ່ງນັກຮຽນອາສາສະໝັກທີ່ເຂົ້າຮ່ວມຂະບວນການໃນຄັ້ງນີ້ມີທັງໝົດ 597 ຄົນ ຍິງ 355 ຄົນ, ອາຈານ 27 ຄົນ ຍິງ 21 ຄົນ ແລະ ທີມງານອາສາສະໝັກຂອງສະມໍລບີ ຈໍານວນໜຶ່ງການອອກແຮງງານໃນຄັ້ງນີ້, ໄດ້ສຸມໃສ່ການເກັບມ້ຽນຂີ້ເຫຍື້ອທີ່ບໍ່ມີເຈົ້າຂອງ ທີ່ກຸ່ມຄົນສວຍໂອກາດບໍ່ເຂົ້າຮ່ວມສັນຍາເກັບມ້ຽນຂີ້ເຫຍື້ອມາຖິ້ມໃສ່ຕາມດິນເປົ່າວ່າງຢູ່ບໍລິເວນ 4 ແຍກບ້ານເມືອງນ້ອຍ-ຊຽງດາ ຫາ ເສັ້ນທາງ 450 ປີ ພາຍຫຼັງປັດກວາດ ແລະ ເກັບມ້ຽນສໍາເລັດແລ້ວ ກໍໄດ້ໃຊ້ລົດຂົນສົ່ງຂີ້ເຫຍື້ອຂະໜາດ 12 ແມັດກ້ອນ ຂົນໄປຖິ້ມຢູ່ສະໜາມຂີ້ເຫຍື້ອຢູ່ສະໜາມຫຼັກ 32 ຈໍານວນ 3 ຖ້ຽວ.

ທ່ານ ນາງ ດີ່ນ້າ ສົມສະໝຸດ ຍັງໄດ້ຮຽກຮ້ອງມາຍັງປະຊາຊົນ ຈົ່ງຊ່ວຍກັນເປັນຫູເປັນຕາ, ຊ່ວຍກັນປ້ອງກັນບຸກຄົນບໍ່ຫວັງດີ ສວຍໂອກາດ ບໍ່ຮັບຜິດຊອບຕໍ່ສັງຄົມ, ຖິ້ມຂີ້ເຫຍື້ອຊະຊາຍ ລວມທັງບໍ່ເປັນເຈົ້າການ ໃນການເຂົ້າຮ່ວມສັນຍາຢ່າງຖືກຕ້ອງ. ການສ້າງຂະບວນການຄັ້ງນີ້, ຖືເປັນບາດກ້າວສໍາຄັນຂອງການຈັດການບັນຫາຂີ້ິເຫຍື້ອໃນສັງຄົມ ເພື່ອຍົກລະດັບຄຸນນະພາບຊີວິດຂອງປະຊາຊົນ ແລະ ສ້າງບ້ານເມືອງທີ່ສະອາດ ແລະ ໜ້າຢູ່ສໍາລັບທຸກຄົນໃນສັງຄົມ.

ຂ່າວ: ວັນເພັງ, ພາບ+ຂໍ້ມູນ: ສະມໍລບີ