ເພື່ອສ້າງລາຍຮັບເຂົ້າສູ່ຄອບຄົວ, ປັບປຸງຊີວິດການເປັນຢູ່ສະມາຊິກໃຫ້ນັບມື້ດີຂຶ້ນ, ຍ້ອນແນວນັ້ນ ປວງຊົນ ຈຶ່ງນໍາເອົາເປືອກປໍສາອອກມາຜະລິດ ເພື່ອຈໍາໜ່າຍພາຍໃນປະເທດ.
ທ່ານນາງສີດາຈັນ ບຸນທະສິງ, ບ້ານສີວິໄລ, ເມືອງຫີນເຫີບ, ແຂວງວຽງຈັນໄດ້ໃຫ້ສໍາພາດຕໍ່ຜູ້ຂຽນ ທີ່ງານວາງສະແດງຜະລິດຕະພັນລາວ 2024 ທີ່ສູນການຄ້າ ລາວ-ໄອເຕັກ ວ່າ: ເລີ່ມຂັ້ນຕອນຜະລິດຕະພັນຈາກຈາກປໍສາ ປີ 1999, ປີ 2002 ຜະລິດອອກຈໍາໜ່າຍ ປະກອບດ້ວຍແຜ່ນຮອງຈານ, ຮອງຈອກ, ບົດຮຽນດັ່ງກ່າວ ໄດ້ມາຈາກ ອົງການໄຈກາ, ສ່ວນວັດຖຸດິບ ແມ່ນຊື້ເປືອກສາ ຈາກເມືອງກາສີ ປີໜຶ່ງໆ 600- 700ກິໂລ, ແຮງງານຕົ້ນຕໍໃນການຜະລິດມີພຽງ 3ແຮງງານ, ແຮງງານສໍາຮອງມີ 20ກວ່າແຮງງານ ຊຶ່ງແມ່ນຜູ້ຕໍ່າແຜ່ນ . ຜະລິດຕະພັນດັ່ງກ່າວ ຂາຍພາຍໃນປະເທດ, ຜູ້ສະໜັບສະໜູນຫຼັກ ແມ່ນອົງການໄຈກາ, ຂັ້ນຕອນ ຂອງການຜະລິດເຫຼົ່ານັ້ນ ກໍມີຄວາມຫຍຸ້ງຍາກ ເປັນຕົ້ນ ເມື່ອໄດ້ເປືອກປໍສາມາແລ້ວ ນໍາໄປແຊ່ນໍ້າ 2-3ຄືນ ຈຶ່ງນໍາໄປຕົ້ມ ຕັ້ງແຕ່ 8:00ໂມງເຊົ້າ- 17:00ໂມງແລງ, ເມື່ອເອົາອອກຈາກການຕົ້ມແລ້ວ ຈຶ່ງນໍາໄປແຊ່ນໍ້າອີກ 3ມື້ 3ຄືນ ຈຶ່ງນໍາເອົາໄປຕົ້ມຄືນອີກ ເປັນຄັ້ງທີ 2 ແລະ ກໍນໍາໄປແຊ່ນໍ້າອີກ 2ຄືນ ຫຼັງຈາກນັ້ນ ຈຶ່ງນໍາເອົາໄປຂູດເປືອກແກ່ອອກ ເລືອກເອົາແຕ່ເສັ້ນງາມໆ ເພື່ອທຸບເປັນແຜ່ນເຈັ້ຍໄດ້, ການທຸບ ແມ່ນໃຊ້ແຮງງານຄົນ. ຜະລິດຕະພັນ ແຜ່ນຮອງຈອກ, ຮອງຈານ, ຜ້າປູໂຕະນ້ອຍ, ກາງ, ແຜ່ນຜ້າໂຊລາຍນາກ, ລາຍພະທາດ, ກະເປົາຕັ້ງ, ກະເປົາຖື, ກະເປົາໃຫຍ່ຫຼື ຕາມຮູບແບບທີ່ລູກຄ້າສັ່ງຈ່ອງ. ຈາກການຜະລິດທີ່ມີຫຼາຍຂັ້ນຕອນຄືແນວນັ້ນ ແຕ່ພວກເຮົາກໍມີຄວາມພູມໃຈເຮັດ ເພາະ ເຫັນໄດ້ວ່າ ວັດຖຸດິບ ແມ່ນຫາໄດ້ຈາກປ່າທີ່ອຸດົມສົມບູນຢູ່ພາຍໃນປະເທດ. ປັດຈຸບັນ ເຫັນໄດ້ວ່າ ການຕະຫຼາດ ກໍຄື ລາຍຮັບແມ່ນພໍໄປໄດ້ ພໍກຸ້ມຄອບຄົວ ແລະ ມີສ່ວນແຮໄວ້, ຜະລິດຕະພັນ ມີຂາຍທາງອ໊ອບລາຍ ແລະ ຂາຍທາງອອນລາຍ ພິເສດ ມີລາຄາ(ຂາຍຍົກ ແລະ ຍ່ອຍ), ລູກຄ້າຫຼັກໆ ກໍແມ່ນ ອົງການໄຈ້ກາ, ເຖິງຢ່າງໃດກໍຕາມ ຜະລິດຕະພັນຈາກເປືອກປໍສາ ຍັງບໍ່ໄດ້ສົ່ງອອກຈໍາໜ່າຍທີ່ຕ່າງປະເທດເທື່ອ. ຈໍານວນ ແຮງງານສໍາຮອງນັ້ນ ແມ່ນໄດ້ຄ່າຕອບແທນຂຶ້ນກັບການຜະລິດ ສະເລ່ຍ 1ຄົນ ຈະໄດ້ຮັບ1ລ້ານກວ່າກີບ ຫາ 2ລ້ານກີບ. ຕະຫຼອດໄລຍະຂອງການຜະລິດ ໄລຍະລະດູແລ້ງ ຜະລິດໄດ້ຫຼາຍ, ສ່ວນລະດູຝົນ ການຜະລິດ ຈະພົບຄວາມຫຍຸ້ງຍາກ ເວລາຕາກເສັ້ນປໍສາຈະນານແຫ້ງ ເພາະຕ້ອງໄດ້ອາໄສຄວາມຮ້ອນ ຈາກແສງແດດເທົ່ານັ້ນ.
ທ່ານນາງສີດາຈັນ ບຸນທະສິງ ກ່າວຕື່ມ: ແຜນໃນຕໍ່ໜ້າ ຢາກຜະລິດສິນຄ້າຊະນິດອື່ນທົດແທນ ຖ້າຫາກວ່າ ບໍ່ໄດ້ເຂິງທີ່ນໍາໃຊ້ເຂົ້າໃນການຜະລິດປໍສາ ໝາຍຄວາມວ່າ ຖ້າມີເຂິງມາປ່ຽນ ກໍອາດຈະມີການຜະລິດໄດ້ຫຼາຍ ເພາະເຂິງເກົ່າ (ນໍາໃຊ້ມາ 20ປີ) ຄຸນນະພາບຂອງການນໍາໃຊ້ງານຫຼຸດລົງຫຼາຍ ຫາກມີເຂິງມາທົດແທນ ຈະໄດ້ສຸມໃຈໃສ່ຕໍ່ການຜະລິດ ແລະ ຂະຫຍາຍການຜະລິດ ໃຫ້ມີຄວາມເຂັ້ມແຂງ ຖ້າຫາກວ່າ ບັນດາທ່ານ ຢາກອຸດໜູນ ຜະລິດຕະພັນລາວທີ່ເຮັດຈາກປໍສາ ຕິດຕໍ່ໄດ້ທີ່: 020 96897077 , 030 5800508,
ຄໍາເຫັນ