ສະໜອງທຶນໃຫ້ກອງທຶນໃໝ່ ແລະ ເພີ່ມສິນເຊື່ອໃຫ້ກອງທຶນເກົ່າ ໃນວົງເງິນ 87 ຕື້ກີບ

ສູນກາງແນວລາວສ້າງຊາດ (ສນຊ)ແລະ ກຸ່ມບໍລິສັດພົງສະຫວັນ ຈໍາກັດ ໄດ້ຈັດກອງປະຊຸມທົບທວນການຈັດຕັ້ງປະຕິບັດໂຄງການກອງທຶນສາມັກຄີ ແລະ ພັດທະນາແນວລາວສ້າງຊາດ ໄລຍະປີ 2017-2023 ຂຶ້ນວັນທີ 21 ພຶດສະພາ ນີ້ຢູ່ ສນຊ ໂດຍມີທ່ານ ຄໍາໄຫຼ  ສີປະເສີດ ກໍາມະການສູນກາງພັກຮອງປະທານຜູ້ປະຈໍາການ ສນຊແລະ ທ່ານ ອ໊ອດ ພົງສະຫວັນ  ຮອງປະທານສູນກາງແນວລາວສ້າງຊາດ (ບໍ່ປະຈໍາການ) ມີບັນດາປະທານ, ຮອງປະທານແນວລາວສ້າງຊາດ 17 ແຂວງ, ນະຄອນຫຼວງວຽງຈັນພ້ອມດ້ວຍຄະນະຜູ້ບໍລິຫານຂັ້ນສູງກຸ່ມບໍລິສັດ ພົງສະຫວັນຈໍາກັດ, ຄະນະຊີ້ນໍາຈັດຕັ້ງປະຕິບັດໂຄງການກອງທຶນບ້ານສາມັກຄີ ແລະ ພັດທະນາແນວລາວສ້າງຊາດຂັ້ນສູນກາງ ແລະບັນດາແຂວງທີ່ມີກອງທຶນ ເຂົ້າຮ່ວມ.
ນັບແຕ່ປີ2017 ຮອດປັດຈຸບັນ ໂຄງການກອງທຶນສາມັກຄີ ແລະ ພັດທະນາແນວລາວສ້າງຊາດໄດ້ມຸ່ງໝັ້ນຊ່ວຍເຫຼືອປະຊາຊົນສ້າງເສດຖະກິດຄອບຄົວໃຫ້ເຕີບໃຫຍ່ຂະຫຍາຍຕົວແລະຫຼຸດພົ້ນຈາກຄວາມທຸກຍາກ ໂດຍການດໍາເນີນນະໂຍບາຍສົ່ງເສີມຊ່ວຍເຫຼືອປະຊາຊົນ ດ້ວຍ 3 ມາດຕະການຢ່າງເປັນຮູບປະທໍາ ເຊັ່ນ: ດໍາເນີນນະໂຍບາຍສະໜອງທຶນດອກເບ້ຍຕໍ່າໃຫ້ກອງທຶນບ້ານ,ໃຫ້ການຊ່ວຍເຫຼືອດ້ານວິຊາການດ້ວຍການຝຶກອົບຮົມແນະນໍາດ້ານເຕັກນິກວິຊາການດ້າການບໍລິຫານກອງທຶນດ້ານການຜະລິດກະສິກໍາເປັນສິນຄ້າ ແລະ ການນໍາໃຊ້ເຕັກໂນໂລຊີທັນສະໄໝ ເຂົ້າໃນການຜະລິດຂອງສະມາຊິກກອງທຶນຊ່ວຍດໍາເນີນການດ້ານການຕະຫຼາດ ການເກັບຊືື້ຜົນຜະລິດຈາກກອງທຶນສະໜອງຕະຫຼາດຕົວເມືອງ ໂຄງການສ້າງຕັ້ງກອງທຶນສາມັກຄີ ແລະພັດທະນາແນວລາວສ້າງຊາດ ຢູ່44ບ້ານ28 ເມືອງ ໃນ 11 ແຂວງ ລວມທັງນະຄອນຫຼວງວຽງຈັນ. ປັດຈຸບັນອົງການປົກຄອງທ້ອງຖິ່ນ ໄດ້ອອກຂໍ້ຕົກລົງສ້າງຕັ້ງກອງທຶນບ້ານ 44ບ້ານໃນນີ້ຢູ່ແຂວງຫົວພັນ 5 ກອງທຶນ,ແຂວງໄຊຍະບູລີ 3 ກອງທຶນ, ໄຊສົມບູນ 1 ກອງທຶນ ແລະ ນະຄອນຫຼວງວຽງຈັນ 1 ກອງທຶນ, ບໍລິຄໍາໄຊ 1 ກອງທຶນ, ຄໍາມ່ວນ 2 ກອງທຶນ, ສະຫວັນນະເຂດ20 ກອງທຶນ, ສາລະວັນ 3 ກອງທຶນ,ຈໍາປາສັກ5 ກອງທຶນ, ເຊກອງ 2 ກອງທຶນ ແລະ ແຂວງອັດຕະປື 1 ກອງທຶນ. ປັດຈຸບັນມີ 25 ກອງທຶນສາມາດເຄື່ອນໄຫວບໍລິການສະໜອງສິນເຊືີ່ອໄລຍະສັ້ນ, ກາງ ແລະ ໄລຍະຍາວດອກເບ້ຍ 10,6% ຕໍ່ປີໃຫ້ປະຊາຊົນຢ່າງກວ້າງຂວາງ ໂຄງການກອງທຶນສາມັກຄີ ແລະ ພັດທະນາແນວລາວສ້າງຊາດ ໄດ້ນໍາໃຊ້ງົບປະມານຫຼາຍກວ່າ 227,9 ຕືື້ກີບ, ໃນນີ້ສະໜອງໃຫ້ກອງທຶນບ້ານນໍາໃຊ້ເປັນສິນເຊື່ອ 162,13 ຕື້ກວ່າກີບ ຈ່າຍບໍລິຫານໂຄງການ ແລະ ວຽກງານປິ່ນອ້ອມ 83,86 ຕື້ກວ່າກີບ ກອງທຶນບ້ານໄດ້ເບີກຖອນນໍາໃຊ້ແລ້ວ 113,17 ຕື້ກວ່າກີບ ຍັງເຫຼືອໃນບັນຊີ 48,71 ຕື້ກວ່າກີບ ນໍາໃຊ້ໃນກິດຈະກໍາໂຄງການກອງທຶນ 47,01 ຕື້ກວ່າກີບ; ປ່ອຍກູ້ໃຫ້ປະຊາຊົນ 2.107 ຄອບຄົວ 54,44 ຕື້ກວ່າກີບ, ກອງທຶນບ້ານຊໍາລະຕົ້ນທຶນຄືນໃຫ້ໂຄງການແລ້ວ 7,22 ຕື້ກວ່າກີບ.
    ໂຄງການໄດ້ສະໜອງສິນເຊື່ອຈັດຊື້ພາຫະນະ ສະໜອງປຸ໋ຍ ແນວພັນພືດ, ຢາປາບສັດຕູພືດ ລະບົບນໍ້າຢອດແບບໂອໂຕມາຕິກ ມູນຄ່າຫຼາຍກວ່າ 51,8 ຕື້ກີບ, ມີສູນກະສິກໍາຕົວແບບ 8 ແຫ່ງ ທີ່ມີການລົງທຶນສູງ ໃນນີ້ກອງທຶນບ້ານຄຸ້ມຄອງໂດຍກົງ 6 ແຫ່ງ ແລະ ໂຄງການຄຸ້ມຄອງ 2 ແຫ່ງ ປະກອບມີເຄື່ອງກົນຈັກທັນສະໄໝ ຄື: ລະບົບເຮືອນຮົ່ມປູກພືດທົດແທນການນໍາເຂົ້າ 76 ຫຼັງ, ໂຮງອົບເຂົ້າ, ສາງເກັບມ້ຽນສິນຄ້າ, ໂຮງຜະລິດເຫັດ 3 ແຫ່ງ ແລະ ອື່ນໆ. ສົ່ງເສີມປະຊາຊົນດໍາເນີນໂຄງການປິ່ນອ້ອມກອງທຶນບ້ານຈໍານວນໜຶ່ງ ອັນພົ້ນເດັ່ນແມ່ນໂຄງການຕ້ານແລ້ງ-ຕ້ານຖ້ວມ ທີ່ສົ່ງເສີມປະຊາຊົນລ້ຽງປາເປັນອາຊີບ ຂຸດໜອງປາ 38ບໍ່ ແລະ ສະໜອງລູກປາ ໃຫ້ສະມາຊິກ 213.380 ໂຕ;  ປັດຈຸບັນສາມາດຂາຍອອກສູ່ຕະຫຼາດ ໂຄງການນາໄຮ່ໃຫຍ່ ມີເນື້ອທີ່ການຜະລິດ 600 ກວ່າເຮັກຕາ ສໍາເລັດການບຸກເບີກ 300 ເຮັກຕາ; ໂຄງການນີ້ແມ່ນສົ່ງເສີມຊາວນາຜະລິດເຂົ້າເປັນສິນຄ້າ ແລະ ສ້າງເປັນຕົວແບບໃຫ້ແຂວງອື່ນ ນອກນີ້ຍັງມີໂຄງການກໍ່ສ້າງ-ສ້ອມແປງຊົນລະປະທານ ແລະ ສະໜອງທຶນ 1,65 ຕື້ກີບ; ໃນການກໍ່ສ້າງຊົນລະປະທານ 7 ແຫ່ງ ຢູ່ແຂວງສະ ຫວັນນະເຂດ ສາມາດເພີ່ມເນື້ອທີ່ການຜະລິດ ຈາກ 492 ເຮັກຕາ ເປັນ 647 ເຮັກຕາ. ສົ່ງເສີມຜູ້ປະກອບການລ້ຽງສັດ ເຊັ່ນ: ຟາມໝູແຂວງໄຊຍະບູລີ 5.862 ໂຕ, ແຂວງຈໍາປາສັກ 6.650 ໂຕ ແລະ ໄກ່ຂອງກຸ່ມລ້ຽງໄກ່ແກ້ງກະເບົາ ແຂວງສະຫວັນນະເຂດ ມີໄກ່ ກວ່າ 1.000 ໂຕ ສ້າງລາຍຮັບໄດ້ດີສົມຄວນ ສົ່ງເສີມຜູ້ປະກອບການດ້ານກະສິກໍາປູກຝັງ ອັນພົ້ນເດັ່ນແມ່ນການສົ່ງເສີມສວນກາເຟ ໂດຍກອງທຶນບ້ານສາມັກຄີແນວລາວສ້າງຊາດບ້ານພູໂອຍ ເມືອງປາກຊ່ອງ ແຂວງຈໍາປາສັກ ໄດ້ເກັບຊື້ເມັດກາເຟນໍາປະຊາຊົນ ມາແປຮູບ ແລະ ສົ່ງອອກ ເປັນຄູ່ຄ້າ-ຂາຍໃຫ້ຕ່າງປະເທດ ໂດຍສະເພາະໄທ ແລະ ບັນດາປະເທດໃນເອີຣົບ. ສໍາເລັດກໍ່ສ້າງເຮືອນພັກຢູ່ເຂດໂຄງການລ້ອງຊານ ແລະ ພວມດໍາເນີນກໍ່ສ້າງໂຮງແຮມ 2 ແຫ່ງ ຢູ່ເມືອງວຽງໄຊ ແລະ ເມືອງຊໍາເໜືອ ແຂວງຫົວພັນ.
ຝຶກອົບຮົມໃຫ້ປະຊາຊົນດ້ານປູກຝັງ, ລ້ຽງສັດ ແລະ ນໍາພາຄະນະແນວລາວສ້າງຊາດ ແລະ ກຸ່ມຫັດຖະກໍາແຂວງອຸດົມໄຊ ໄປທັດສະນະສຶກສາວຽກງານຫັດຖະກໍາ, ການຈັກສານ, ຜ້າພື້ນເມືອງ ເຄື່ອງປັ້ນດິນເຜົາ ແລະ ການປະມົງນໍ້າຈືດ ຢູ່ແຂວງນ່ານ ພະເຍົາ ແລະ ຊຽງໃໝ່ ປະເທດໄທ ຝຶກອົບຮົມດ້ານການປູກພືດໃນເຮືອນຮົ່ມ (ເມລອນ, ໝາກເລັ່ນ, ໝາກໂມ, ອາງຸ່ນ, ໝາກແຕງຍີ່ປຸ່ນ, ບັດເຕີນັດ, ການຈັດການນໍ້າໃນເຮືອນຮົ່ມ, ການຈັດການປ້ອງກັນ-ກໍາຈັດສັດຕູພືດ ແລະ ອື່ນໆ, ການລ້ຽງສັດ ແລະ ການປະມົງໃຫ້ກອງທຶນ ແລະ ຄອບຄົວຕົວແບບທີ່ເຂົ້າຮ່ວມໂຄງການ ສົ່ງພະນັກງານລົງຊ່ວຍກອງທຶນທີ່ມີສູນກະສິກໍາ ແລະ ຕິດຕາມແນະນໍາລາຍງານສະພາບການຜະລິດ ຜ່ານລະບົບໂທລະສັບປະຈໍາອາທິດ, ປະຈໍາເດືອນ, ເກັບຊື້ຜົນຜະລິດຂອງກອງທຶນບ້ານຕາມລາຄາທີ່ຕົກລົງກັນ ປີ 2020-2023 ກອງທຶນບ້ານສາມາດຜະລິດພືດທົດແທນການນໍາເຂົ້າ (ເມລອນ, ໝາກໂມ, ໝາກເຫຼັ່ນ ແລະ ອື່ນໆ 23.229 ກິໂລ ມູນຄ່າຫຼາຍກວ່າ 477,5 ລ້ານກີບ.
    ສໍາລັບແຜນການຕໍ່ໜ້ານີ້ ສູນກາງແນວລາວສ້າງຊາດ ແລະ ກຸ່ມບໍລິສັດ ພົງສະຫວັນຈໍາກັດ ຈໍາກັດ ຈະສືບຕໍ່ລົງນາມສັນຍາຮ່ວມມືປະຕິບັດໂຄງການກອງທຶນສາມັກຄີ ແລະ ພັດທະນາແນວລາວສ້າງຊາດ ໄລຍະ 2 (ປີ 2025-2029) ເພື່ອສືບຕໍ່ຂະຫຍາຍກອງທຶນບ້ານສາມັກຄີ ແລະ ພັດທະນາແນວລາວສ້າງຊາດໃນທົ່ວປະເທດ ແລະ ປັບປຸງໃຫ້ມີປະສິດທິຜົນກວ່າເກົ່າ ສາມາດຕອບສະໜອງຄວາມຕ້ອງການໃນການພັດທະນາທ້ອງຖິ່ນ ຂະຫຍາຍຊົນລະປະທານເພີ່ມຂຶ້ນໃນທົ່ວປະເທດ ແລະ ນໍາໃຊ້ລະບົບໄຟຟ້າແສງອາທິດ. ເພື່ອຫຼຸດຜ່ອນຕົ້ນທຶນຄ່າໄຟ ລວມເຖິງໄຟຟ້າແສງອາທິດທີ່ສາມາດນໍາໃຊ້ໄດ້ທຸກກິດຈະກໍາກະສິກໍາ ຂະຫຍາຍ ແລະ ສົ່ງເສີມການຜະລິດເຂົ້າ ເພື່ອສົ່ງອອກຢູ່ເຂດທົ່ງພຽງຈຸດສຸມ ຂຸດໜອງ ແລະ ສົ່ງເສີມການລ້ຽງປາໃຫ້ທົ່ວທຸກແຂວງ ເພີ່ມການເກັບຊື້ຜົນຜະລິດ ແລະ ສ້າງໂຮງງານແປຮູບ ແລະ ຫຸ້ມຫໍ່ຜົນຜະລິດກະສິກໍາຕ່າງໆ ໂດຍສະເພາະໝາກກ້ວຍນໍ້າ, ຖົ່ວລຽນ, ໝາກມ່ວງ ແລະ ໝາກນັດ ໃຫ້ໄດ້ 1.661 ໂຕນຕໍ່ປີ ສ້າງໂຮງງານປຸ໋ຍອິນຊີ, ເຄມີ, ໂຮງງານເຮັດຫົວອາຫານສັດ ເພື່ອຕອບສະໝອງການປູກຝັງ ແລະ ລ້ຽງສັດພາຍໃນປະເທດ ຄຸ້ມຄອງສູນກະສິກໍາກອງທຶນບ້ານ ສ້າງໃຫ້ເປັນສູນຕົວແບບ ເປັນບ່ອນຮຽນຮູ້ຂອງປະຊາຊົນ ສະເພາະປີ 2024 ຈະສູ້ຊົນປັບປຸງ ແລະ ຂະຫຍາຍກອງທຶນໃຫ້ເຂັ້ມແຂງ ສະໜອງທຶນໃຫ້ກອງທຶນໃໝ່ ແລະ ເພີ່ມສິນເຊື່ອໃຫ້ກອງທຶນເກົ່າ ໃນວົງເງິນ 87 ຕື້ກີບ.
(ຂ່າວ-ພາບ:ຍຸພິນທອງ)