ທ່ານ ນາງ ລໍາພອຍ ສີອັກຄະຈັນ ຄະນະປະຈໍາພັກ ຮອງປະທານສະພາປະຊາຊົນ ນວ ກ່າວປິດກອງປະຊຸມ ໂດຍກ່າວໃຫ້ຮູ້ຜົນກອງປະຊຸມວ່າ: ກອງປະຊຸມໄດ້ບັນລຸຜົນສໍາເລັດ ຕາມຈຸດປະສົງລະດັບຄາດໝາຍທີ່ວາງໄວ້ ຊຶ່ງເຕັມໄປດ້ວຍບັນຍາກາດຟົດຟື້ນແຫ່ງການເສີມຂະຫຍາຍສິດປະຊາທິປະໄຕ, ການຍົກສູງຄວາມຮັບຜິດຊອບການເມືອງຂອງບັນດາທ່ານສະມາຊິກສະພາແຫ່ງຊາດ ຊຸດທີ IX ປະຈໍາເຂດເລືອກຕັ້ງທີ 1 ແລະ ສະມາຊິກສະພາປະຊາຊົນ ນວ ຊຸດທີ II. ກອງປະຊຸມຕີລາຄາສູງເຖິງຄວາມຮັບຜິດຊອບສູງໃນການຄົ້ນຄວ້າ, ປະກອບຄໍາເຫັນ, ຕັ້ງຄໍາຊັກຖາມ ແລະ ຄໍາແນະນໍາຢ່າງມີເຫດຜົນ, ມີເນື້ອໃນທີ່ເລິກເຊິ່ງ, ເຈາະຈົງ, ລະອຽດຖີ່ຖ້ວນ ແລະ ມີຄວາມເປັນເອກະພາບສູງໃນການຄົ້ນຄວ້າ, ພິຈາລະນາ ແລະ ຮັບຮອງເອົາ “ການສ້າງຕັ້ງຕາແສງ (ທົດລອງ) ຢູ່ເມືອງໄຊທານີ ນວ ຊຶ່ງມີຊື່ວ່າ: "ຕາແສງຊ້າງມີໄຊ"
ຜົນສໍາເລັດຂອງກອງປະຊຸມສະໄໝວິສາມັນ ເທື່ອທີ 1 ຂອງສະພາປະຊາຊົນ ນວ ຊຸດທີ II ໃນຄັ້ງນີ້ ແມ່ນເປັນການປະຕິບັດພາລະບົດບາດ, ສິດ ແລະ ໜ້າທີ່ ຂອງສະພາປະຊາຊົນ ນວ ຕາມທີ່ໄດ້ກໍານົດໄວ້ໃນລັດຖະທໍາມະນູນສະບັບປັບປຸງໃໝ່ປີ 2025, ແມ່ນການຜັນຂະຫຍາຍຕາມທິດຊີ້ນໍາຂອງຄະນະບໍລິຫານງານສູນກາງພັກກ່ຽວກັບການປັບປຸງລະບົບກົງຈັກການປົກຄອງຂັ້ນຕາແສງ ໃນຂອບເຂດທົ່ວປະເທດ ແລະ ເປັນການຮັບຮອງການສ້າງຕັ້ງຕາແສງທໍາອິດ ຢູ່ນະຄອນຫຼວງວຽງຈັນ.
ເພື່ອສືບຕໍ່ຈັດຕັ້ງປະຕິບັດເນື້ອໃນຜົນສໍາເລັດກອງປະຊຸມຄັ້ງນີ້, ກອງປະຊຸມຮຽກຮ້ອງມາຍັງອົງການປົກຄອງ ນວ, ອົງການປົກຄອງເມືອງໄຊທານີ ແລະ ພາກສ່ວນທີ່ກ່ຽວຂ້ອງຈົ່ງໄດ້ຜັນຂະຫຍາຍ ແລະ ຈັດຕັ້ງປະຕິບັດມະຕິກອງປະຊຸມຄັ້ງນີ້ໃຫ້ໄດ້ຮັບຜົນສໍາເລັດເປັນຮູບປະທໍາ.
(ຂ່າວ-ພາບ: ແສງຈັນ)
ຄໍາເຫັນ