 |
ພິທີມອບ-ຮັບ ຈັດຂຶ້ນໃນວັນທີ 9 ມິຖຸນານີ້ ທີ່ສະຖາບັນເລືອດແຫ່ງຊາດ, ໃຫ້ກຽດມອບໂດຍ ທ່ານ ສິດທິໄຊ ເກດຕະວົງ ຄະນະອໍານວຍການບໍລິສັດເບຍລາວ, ຮັບໂດຍ ທ່ານ ຈັນທະລາ ສຸກສາຄອນ ຫົວໜ້າສະຖາບັນເລືອດແຫ່ງຊາດ ພ້ອມດ້ວຍພະນັກງານທີ່ກ່ຽວຂ້ອງທັງສອງຝ່າຍເຂົ້າຮ່ວມ.
ທ່ານ ຈັນທະລາ ສຸກສາຄອນ ໃຫ້ສໍາພາດວ່າ: ໃນໂອກາດວັນຜູ້ບໍລິຈາກເລືອດໂລກ ທີ່ຈະເຖິງ, ຄະນະນໍາບໍລິສັດ ເບຍລາວ ໄດ້ນໍາເຄື່ອງບໍລິໂພກ ມອບໃຫ້ສະຖາບັນເລືອດແຫ່ງຊາດ ເພື່ອກຽມມອບຕໍ່ໃຫ້ກັບຜູ້ບໍລິຈາກເລືອດໂລກ 14 ມິຖຸນາ 2025 ຊຶ່ງປີນີ້ ຈະຈັດຂຶ້ນໃນວັນທີ 12 ມິຖຸນາ ທີ່ສູນການຄ້າ ລາວໄອເຕັກມໍ ຊັ້ນ 5 ເປັນການຮັບບໍລິຈາກເລືອດແບບເປີດກວ້າງ ຊຶ່ງໄດ້ເຊີນເອົາບັນດາທ່ານໃນນະຄອນຫຼວງວຽງຈັນ ຮັບບໍລິຈາກເລືອດໃນມື້ນັ້ນ. ຍ້ອນເຫັນໄດ້ຄວາມໝາຍສໍາຄັນ ຂອງວັນຜູ້ບໍລິຈາກເລືອດດັ່ງກ່າວ, ບໍລິສັດເບຍລາວຈຶ່ງໄດ້ຕອບສະ ໜອງເຄື່ອງບໍລິໂພກ, ບໍາລຸງສຸຂະພາບ ເປັນຕົ້ນແມ່ນ: ນໍ້າດື່ມ, ເຂົ້າໜົມ ແລະ ສະຕິງ ລວມມູນຄ່າທັງໝົດ 120 ລ້ານກີບ. ທ່ານ ຈັນທະລາ ສຸກສາຄອນ ກ່າວຕື່ມວ່າ: ໃນນາມສະຖາບັນເລືອດແຫ່ງຊາດ ຂໍຂອບໃຈມາຍັງການນໍາບໍລິສັດເບຍລາວ ທີ່ໄດ້ເຫັນຄວາມໝາຍສໍາຄັນ ຂອງວຽກງານປຸກລະດົມ ການບໍລິຈາກເລືອດ ເພື່ອຕອບສະໜອງຄວາມຕ້ອງການຄົນເຈັບ, ຂໍອວຍໄຊໃຫ້ພອນການນໍາຂອງບໍລິສັດເບຍລາວ ຕະຫຼອດຮອດພະນັກງານທຸກໆທ່ານ ຈົ່ງມີສຸຂະພາບແຂງແຮງ, ສໍາເລັດໃນການປະຕິບັດໜ້າທີ່ວຽກງານ. ສະນັ້ນ ຈຶ່ງຂໍເຊີນຊວນທຸກໆທ່ານ ຮ່ວມບໍລິຈາກເລືອດໃນວັນດັ່ງກ່າວ. ໃນແຕ່ລະວັນ ຄົນເຈັບແມ່ນມີຄວາມຕ້ອງການເລືອດຫຼາຍ ແຕ່ການສະໜອງເລືອດຂອງສັງຄົມ ຍັງບໍ່ພຽງພໍເທື່ອ ຂໍເຊີນຊວນບັນດາທ່ານ ທີ່ມີອາຍຸແຕ່ 17 ປີຂຶ້ນໄປ, ນໍ້າໜັກ 45 ກິໂລຂຶ້ນໄປ, ເພດຍິງ, ເພດຊາຍ ທີ່ມີສຸຂະພາບແຂງແຮງດີ ກໍສາມາດເຂົ້າໄປບໍລິຈາກເລືອດໄດ້ເລີຍ.
(ຂ່າວ; ພາບ: ແສງຈັນ, ສໍານານ)
ຄໍາເຫັນ