ສະຫວັນນະເຂດ ຍົກລະດັບຄວາມຮູ້ ວິທີການເຮັດເຂົ້າໜົມ

ໃນວັນທີ 5 ກຸມພາ 2024 ທີ່ສູນພັດທະນາສີມືແຮງງານ ແຂວງສະຫວັນນະເຂດ ໄດ້ຈັດຊຸດຝຶກອົບຮົມ ກ່ຽວກັບວິທີການເຮັດເຂົ້າໜົມໃຫ້ກັບຜູ້ທີ່ສົນໃຈ, ຊຶ່ງມີຜູ້ເຂົ້າຮ່ວມ 29 ຄົນ ທີ່ມາຈາກ 4 ເມືອງຄື: ເມືອງອຸທຸມພອນ, ເມືອງໄຊບູລີ, ອາດສະພອນ ແລະ ເມືອງຈໍາພອນ, ໂດຍການເຂົ້າຮ່ວມ ທ່ານ ສີສຸພັນ ງາມວົງສາ ຮອງຫົວໜ້າພະແນກແຮງງານ-ສະຫວັດດີການສັງຄົມແຂວງ.
ທ່ານ ທອງຂັນ ແສງນາວົງ ຮັກສາການ ອໍານວຍການສູນພັດທະນາສີມືແຮງງານແຂວງ ໄດ້ລາຍງານວ່າ: ເພື່ອປະຕິບັດຕາມແຜນໂຄງການຝຶກ ແລະ ພັດທະນາສີມືແຮງງານ ຕອບສະໜອງຕາມຄວາມຕ້ອງການຂອງຕະຫຼາດແຮງງານ, ປະຕິບັດຕາມແຜນພັດທະນາເສດຖະກິດ-ສັງຄົມຂອງແຂວງ, ຄວາມຕ້ອງການຂອງສັງຄົມ. ກະຊວງແຮງງານ-ສະຫວັດດີການສັງຄົມ ກໍຄືສູນພັດທະນາສີມືແຮງງານແຂວງ ຈັດການຝຶກ ແລະ ພັດທະນາສີມືແຮງງານ ໃນສາຂາອາຊີບ ວິທີການເຮັດເຂົ້າໜົມໃຫ້ກັບຜູ້ທີ່ສົນໃຈມັກຮັກໃນອາຊີບນີ້.
ທ່ານ ສີສຸພັນ ງາມວົງສາ ໄດ້ມີຄໍາເຫັນກ່າວເປີດວ່າ: ການຈັດຕັ້ງຝຶກວິທີເຮັດເຂົ້າໜົມກໍ່ເພື່ອພັດທະນາໃຫ້ປະຊາຊົນຜູ້ທີ່ບໍ່ມີວຽກເຮັດງານທໍາ ໄດ້ມີອາຊີບເສີມໃນການສ້າງເສດຖະກິດຄອບຄົວແກ້ໄຂຊີວິດການເປັນຢູ່ຕົນເອງໃຫ້ດີຂຶ້ນເທື່ອລະກ້າວ, ຊຶ່ງການຝຶກອົບຮົມກໍເພື່ອໃຫ້ຖືກຕາມຫຼັກສູດແທ້ໆ, ຝຶກແລ້ວຕ້ອງໄດ້ນໍາໃຊ້ໃຫ້ມີປະສິດທິຜົນ.
ສຳລັບໂຄງການພັດທະນາສີມືແຮງງານ ຕອບສະໜອງຄວາມຕ້ອງການຂອງຕະຫຼາດແຮງງານ ສາຂາວິຊາຊີບການເຮັດເຂົ້າໜົມໃນຄັ້ງນີ້, ແມ່ນຈະໄດ້ດຳເນີນໄປເປັນເວລາ 5 ວັນ (ວັນທີ 5-9 ກຸມພາ 2024 ຈິ່ງຈະສໍາເລັດ). 
(ຂ່າວ: ບຸນຊູ ພົມມະເທບ)