ສະຫວັນນະເຂດ ປະກາດຍົກຍ້າຍ ແລະ ແຕ່ງຕັ້ງພະນັກງານຮັບໜ້າທີ່ໃໝ່ 

ພະແນກການເງິນປະຈຳແຂວງສະຫວັນນະເຂດ ໄດ້ຈັດພິທີປະກາດຍົກຍ້າຍ ແລະ ແຕ່ງຕັ້ງພະນັກງານຮັບໜ້າທີ່ໃໝ່ ຢູ່ພາສີປະຈຳແຂວງ ຂຶ້ນໃນວັນທີ 3 ເມສາຜ່ນມາ ທີ່ສະໂມສອນຂອງຫ້ອງວ່າການປົກຄອງແຂວງ, ໂດຍການເຂົ້າຮ່ວມຂອງທ່ານ ບຸນປອນ ມະນີຈິດ ຮອງລັດຖະມົນຕີກະຊວງການເງິນ, ມີບັນດາພະນັກງານຫຼັກແຫຼ່ງພາຍໃນພະແນກການເງິນແຂວງ, ພາສີປະຈຳ ແລະ ອາກອນແຂວງ, ພະແນກການກ່ຽວຂ້ອງອ້ອມຂ້າງແຂວງເຂົ້າຮ່ວມ.
    ໃນພິທີ, ຄະນະຈາກກົມຈັດຕັ້ງພະນັກງານ ກະຊວງການເງິນໄດ້ຜ່ານຂໍ້ຕົກລົງຂອງທ່ານ ລັດຖະມົນຕີກະຊວງການເງິນ ສະບັບເລກທີ 1014/ກງ, ລົງວັນທີ 22 ມີນາ 2024 ວ່າດ້ວຍການຍົກຍ້າຍ ແລະ ແຕ່ງຕັ້ງພະນັກງານຮັບໜ້າທີ່ໃໝ່ ຢູ່ພາສີປະຈຳແຂວງສະຫວັນນະເຂດ. ໃນນີ້, ໄດ້ຕົກລົງຍົກຍ້າຍ ແລະ ແຕ່ງຕັ້ງ ທ່ານ ຄຳຂັນ ຕານລະມະນີ ຫົວໜ້າດ່ານພາສີສາກົນແດນສະຫວັນ ເປັນຮອງຫົວໜ້າພາສີປະຈຳແຂວງສະຫວັນນະເຂດ, ຍົກຍ້າຍ ແລະ ແຕ່ງຕັ້ງ ທ່ານ ຂວັນໄຊຊະນະ ຟອງສະໝຸດ ຫົວໜ້າດ່ານພາສີສາກົນຂົວມິດຕະພາບ 2  ເປັນຮອງຫົວໜ້າພາສີປະຈຳແຂວງສະຫວັນນະເຂດ, ຍົກຍ້າຍ ແລະ ແຕ່ງຕັ້ງທ່ານ ນາງ ອິນທະຫວາ ສາທຸພັນ ຮອງຫົວໜ້າດ່ານພາສີ ຂົວມິດຕະພາບ 2 ເປັນຫົວໜ້າຂະແໜງສັງລວມ, ແຕ່ງຕັ້ງ ທ່ານ ນາງ ດາລາວັນ ໄຊຍະແສງ ພະນັກງານວິຊາການ ເປັນຮອງຫົວໜ້າຂະແໜງສັງລວມ, ແຕ່ງຕັ້ງ ທ່ານ ເທພະລັກ ແສງລັດ ຮອງຫົວໜ້າຂະ   ແໜງສັງລວມ ເປັນຫົວໜ້າຂະແໜງກວດກາ ແລະ ກວດສອບຄືນການແຈ້ງພາສີ, ຍົກຍ້າຍ ແລະ ແຕ່ງຕັ້ງ ທ່ານ ພຸດທະມີໄຊ  ພັນທະນາໄລ ຫົວໜ້າຫ້ອງການພາສີ ປະຈຳເຂດເສດຖະກິດພິເສດສະຫວັນ-ເຊໂນ ເປັນຫົວໜ້າດ່ານພາສີສາກົນຂົວມິດຕະພາບ 2 ແລະ ທ່າບົກແຂວງສະຫວັນນະເຂດ, ຍົກຍ້າຍ ແລະ ແຕ່ງຕັ້ງ ທ່ານ ວຽງເພັດ ແກ້ວມະນີວົງ ຮອງຫົວໜ້າຂະແໜງສັງລວມ ເປັນຮອງຫົວໜ້າດ່ານພາສີສາກົນ ຂົວມິດຕະພາບ 2 ແລະ ທ່າບົກ ແຂວງສະຫວັນນະເຂດ ແລະ ມີບັນດາທ່ານທີ່ຖືກຍົກຍ້າຍ ແລະ ແຕ່ງຕັ້ງ ເປັນຮອງຫົວໜ້າເຂດເສດຖະກິດພິເສດສະຫວັນ-ເຊໂນ ແລະ ຮອງຫົວໜ້າດ່ານພາສີສາກົນຂົວມິດຕະພາບ 2 ແລະ ທ່າບົກສະຫວັນນະເຂດ ພ້ອມນັ້ນກໍ່ໄດ້ແຕ່ງຕັ້ງຮອງຫົວໜ້າດ່ານພາສີສາກົນແດນສະຫວັນຕື່ມອີກ.
ໃນໂອກາດນີ້, ຍັງໄດ້ຜ່ານຂໍ້ຕົກລົງຂອງທ່ານລັດຖະມົນຕີກະຊວງການເງິນ ສະບັບເລກທີ 1011/ກງ, ລົງວັນທີ 22 ມີນາ 2024 ວ່າດ້ວຍການແຕ່ງແຕ່ງຕັ້ງຮອງຫົວໜ້າສ່ວຍສາອາກອນປະຈໍາແຂວງສະຫວັນນະເຂດ. ໃນນີ້ ໄດ້ແຕ່ງຕັ້ງ ທ່ານ ວິໄລທອງ ທຳມະວົງ  ຫົວໜ້າຂະແໜງບໍລິຫານຄວາມສ່ຽງ ແລະ ກວດກາເປັນຮອງຫົວໜ້າສ່ວຍສາອາກອນປະຈຳແຂວງສະຫວັນນະເຂດ./.
(ຂ່າວ: ສະຫວັນ)