ສ້າງຂະບວນການຂັບຂີ່ປອດໄພ ໃສ່ໃຈລະບຽບກົດຈະລາຈອນ ຂຶ້ນທີ່ເດີ່ນຫ້ອງວ່າການແຂວງ ໂດຍການເຂົ້າຮ່ວມເປັນປະທານຂອງທ່ານ ພູວັງ ເກດແກ້ວພົມພອນ ຮອງເລຂາພັກແຂວງ ຜູ້ຊີ້ນໍາວຽກງານການເມືອງແນວຄິດ, ວຽກພັກ-ພະນັກງານ ແລະ ອົງການຈັດຕັ້ງມະຫາຊົນ, ມີຫົວໜ້າກອງບັນຊາການ ປກສ ແຂວງ, ຫົວໜ້າພະແນກ ຍທຂ ແຂວງ, ເລຂາຄະນະບໍລິຫານງານຊາວໜຸ່ມແຂວງ ຕະຫຼອດຮອດ ພະແນກການອ້ອມຂ້າງແຂວງ, ນະຄອນໄກສອນພົມວິຫານ, ອົງການຈັດຕັ້ງມະຫາຊົນ, ສະມາຄົມລົດຖີບແຂວງ ແລະ ຜູ້ປະກອບການຫ້າງຮ້ານກໍໄດ້ເຂົ້າຮ່ວມຢ່າງຫຼວງຫຼາຍ.
ທ່ານ ສີວິໄລ ແກ້ວພອນພິໄລ ຮອງເລຂາຄະນະບໍລິຫານງານຊາວໜຸ່ມແຂວງ ໄດ້ລາຍງານວ່າ: ການຈັດກິດຈະກຳຂະບວນການຂັບຂີ່ປອດໄພໃສ່ໃຈກົດລະບຽບຈະລາຈອນ, ຫຼຸດຜ່ອນອຸປະຕິເຫດຕາມທ້ອງຖະໜົນ ເພື່ອຂໍ່ານັບຮັບຕ້ອນກອງປະຊຸມ 3 ຂັ້ນຂອງພັກ, ວັນສໍາຄັນຕ່າງໆຂອງຊາດ-ຂອງພັກ ກໍຄືຂໍ່ານັບຮັບຕ້ອນກອງປະຊຸມໃຫຍ່ຜູ້ແທນຊາວໜຸ່ມທົ່ວແຂວງ ຄັ້ງທີ VIII ແລະ ງານສັບປະດາແຫ່ງຊາດເພື່ອຄວາມປອດໄພຕາມທາງຫຼວງ, ທັງເປັນການສຶກສາອົບຮົມ-ແນວຄິດ ແລະ ປູກຈິດສໍານຶກໃຫ້ກັບບັນດາຊາວໜຸ່ມ, ເຍົາວະຊົນ ແລະ ຜູ້ຂັບຂີ່ຍານພາຫະນະໃຫ້ມີຄວາມເປັນລະບຽບຮຽບຮ້ອຍ, ປະຕິບັດຕາມກົດລະບຽບຈະລາຈອນຢ່າງຖືກຕ້ອງ.
ຈຸດປະສົງກໍ່ເພື່ອເປັນການສຶກສາອົບຮົມປູກຈິດສຳນຶກໃຫ້ແກ່ບັນດາລູກຫຼານ, ບັນດາຊາວໜຸ່ມ-ເຍົາວະຊົນ ແລະ ທຸກພາກສ່ວນໃນສັງຄົມໃຫ້ເຂົ້າໃຈເຄົາລົບກົດຈະລາຈອນ ເພື່ອເຮັດໃຫ້ສະພາບການເຄື່ອນໄຫວໃນສັງຄົມບ້ານເມືອງເຮົາມີຄວາມສະຫງົບ ແລະ ມີຄວາມປອດໄພ ຊຶ່ງເປັນການສະແດງເຖິງຄວາມຮັບຜິດຊອບຕໍ່ບັນດາຂໍ້ກຳນົດກົດໝາຍຕ່າງໆຕາມພັກ-ລັດເຮົາໄດ້ວາງອອກ. ສໍາລັບຂະບວນຂັບຂີ່ລົດຖີບ-ລົດຈັກ ແມ່ນເລີ່ມອອກຂະບວນຈາກປະຕູເບື້ອງຕາເວັນອອກຂອງຫ້ອງວ່າການ ໄປຫາວົງວຽນອາຊຽນ ເສັ້ນທາງ A1 ເຂົ້າວົງວຽນໄດໂນເສົາ, ວົງວຽນພາຂວັນ ອອກໃສ່ເສັ້ນທາງດອນຫໍ (ກົງສູນໃຫຍ່ແຫ່ງ ສສ ຫວຽດນາມ) ເຂົ້າວົງວຽນກອງ ແລ້ວແຍກຍ້າຍກັນຢູ່ທີ່ນັ້ນ.
ເຊິ່ງພາຍໃນງານຄັ້ງນີ້ ຍັງມີກິດຈະກໍາຖາມ-ຕອບເພື່ອເອົາຂອງຂວັນລາງວັນເປັນໝວກກັນກະທົບ ແລະ ເສື້ອນຳອີກ.
ຄໍາເຫັນ